Սերժ Սարգսյանը խոսել է Գագիկ Ծառուկյանի մասին

«Լրագիր»-ը գրում է․

ՀՀԿ նախընտրական ցուցակը որոշված չէ, քննարկումները շարունակվում են, օրենքով նախատեսված ժամկետում այն կներկայացվի Կենտրոնական ընտրական հանձնաժողով: Այս մասին ՀՀԿ խորհրդի այսօրվա նիստից հետո ասաց ՀՀԿ մամուլի քարտուղար Էդուարդ Շարմազանովը: Նախընտրական շտաբի ղեկավարի անունը որոշվել է, բայց առայժմ հանրությունից թաքուն է պահվում:
Նա մեջբերումներ արեց Սերժ Սարգսյանի՝ ՀՀԿ խորհրդի նիստում ունեցած ելույթից: Ասաց, որ ընտրությունների օրը ապրիլի 2-ին նշանակելը հակասահմանադրական չէ, բայց հաշվի առնելով ապրիլյան գործոնը, ՀՀԿ-ն պատրաստ է փոխել ընտրությունների օրը:
«Եթե բոլոր քաղաքական դերակատարները գան քաղաքական պայմանավորվածության, որ երեք, չորս կամ հինգ օրով հետաձգեն ընտրության oրը, ապա ՀՀԿ-ն այստեղ որևէ քաղաքական խոչընդոտ չի տեսնում: Մենք պատրաստ ենք բոլոր քաղաքական ուժերի հետ քննարկելու այս հարցը», ասաց նա:
Ըստ Շարմազանովի՝ այս օրերին շատ խոսվեց տարբեր դաշինքների կազմավորման մասին: ՀՀԿ-ն կողմ է դրանց: «Մենք ասում էինք, որ սահմանադրական բարեփոխումներից հետո Հայաստանում կուսակցությունների դերակատարումը շեշտակի բարձրանալու է, և տեղի է ունենալու կուսակցությունների խոշորացում, որը դրական է: Այսօր մենք տեսնում ենք, որ կուսակցությունները միավորվում ու դաշինքներ են կազմում, ինչին ՀՀԿ-ն դրական է վերաբերում», ասաց նա:
Սերժ Սարգսյանն անդրադարձել է նաև տեղեկություններին, որ Գագիկ Ծառուկյանը ՀՀԿ պրոյեկտն է:
“Ասում են՝ ՀՀԿ-ի պրոյեկտն է, կեղծ ընդիմություն է, նման բան չկա: Հավատացեք Աստծուն, ես ինչ ասում եմ՝ նախագահի ելույթից եմ ասում”,- հավելեց նա:
Անդրադառնալով ՀՀԿ-ից սպասվող արտահոսքին՝ Շարմազանովն ասաց, որ Սերժ Սարգսյանի խոսքով՝ դա անհեթեթություն է: «ՀՀԿ-ն կենդանի օրգանիզմ է, կարող է մի քանի հոգի էլ դուրս գան, առաջին անգամ չէ: Վերջին ամիսներին ՀՀԿ-ին անդամագրվել է 11 հազար մարդ”, նշեց նա:
Շարմազանովը հավելեց, որ ՀՀԿ խորհրդի կազմից դուրս է մնացել 9 մարդ, որոնց թվում հայտնի գործիչներ չկան, հիմնականում դիվանագիտական ոլորտի ներկայացուցիչներ են: Սյունիքի նախկին մարզպետ Սուրիկ Խաչատրյանի անունը, նրա խոսքով, խորհրդից դուրս մնացողների ցանկում չի եղել: