«Ես կասեմ իմ խոսքը». Սամվել Բաբայան

«Առաջին լրատվական»-ի զրուցակիցն է ԼՂՀ պաշտպանության նախկին նախարար Սամվել Բաբայանը։

- Պարոն Բաբայան, Վարդան Օսկանյանն այսօր հարցազրույց է տվել և ասել է, որ մինչ օրս անձամբ չի հանդիպել Գագիկ Ծառուկյանի հետ դաշինքները միավորելու հարցով, բայց կոնտակտներ պահում է նրա հետ։ Սա փաստո՞ւմ է, որ ճիշտ են մամուլի այն տեղեկությունները, որ Դուք եք վարում այդ բանակցությունները թե՛ Ծառուկյանի և թե՛ Սեյրան Օհանյանի հետ։

- Ես տեղյակ չեմ ոչ մի բանակցությունից։ Կարող եմ այդքանն ասել։ Ես որևէ թիմի հետ ընդհանրապես ոչ մի բանակցություն չեմ տանում։ Ես, կարող է, ինչ-որ անձանց հետ հանդիպեմ, ինչ-որ հարցերի շուրջ զրուցենք, բայց ձեր ասածը իրականությանը չի համապատասխանում։

- Այսինքն՝ հանդիպում եղել է, բայց նախընտրական հարցեր չե՞ք քննարկել։

- Այո, ես ընդհանրապես հանդիպում եմ այն մարդկանց հետ, ովքեր ծանոթ են ինձ, ցանկություն են հայտնում հանդիպել ինձ, ես էլ հանդիպում եմ։ Բայց որ այդ հանդիպումների նպատակը դաշինքներ ստեղծելն է, դաշինքներ միավորելը՝ դա իրականությանը չի համապատասխանում։

- Պարոն Բաբայան, իսկ Դուք արդեն կողմնորոշվե՞լ եք, թե որտեղ եք լինելու այս ընտրություններին։

- Ես ոչ մի տեղ չեմ լինելու, ես ոչ մի կուսակցության անդամ չեմ դառնա, որևէ կուսակցության բլոկում չեմ լինի։

- Իսկ որևէ դաշինքի կազմում կլինե՞ք։

- Այն բլոկը, որը ես համարեմ ճիշտ, որը հասարակության շահերից է բխելու, նրան օգնելու եմ, օգտակար եմ լինելու։

- Իսկ արդեն կողմնորոշվե՞լ եք, թե որ բլոկն է հասարակության շահերից բխում։

- Դեռևս ես չեմ տեսնում այդ ուժին։ Պրոցեսները կավարտվեն, ես կհայտնեմ իմ տեսակետը։ Թերևս մյուս շաբաթվա վերջին ամեն ինչ պարզ կլինի։ Սկզբունքային հարցեր կան, որոնք պարտադիր են։ Դեռ ոչ մի բան չի կատարվել։ Երբ այդ կարևոր պրոցեսները ավարտվեն, ես կասեմ իմ ասելիքը։

- Բայց մամուլը արդեն իսկ Ձեզ կապում է Օսկանյան-Օհանյան բլոկի հետ։

- Ոչ, դեռ որոշակի կողմնորոշվածություն չկա։ Իրականում դրանք մտացածին լուրեր են։ Ամեն մարդ իր ցանկությունն է հայտնում։

- Դուք ասացիք, որ օգնելու եք այն ուժին, որին համակրեք։ Ինչո՞վ է լինելու Ձեր այդ օգնությունը։

- Ամեն ինչով։ Ինչ հնարավորություն ունեմ։ Իմ բոլոր հնարավորությունները, որ ունեմ, դնելու եմ այդ ուժի համար։ Իսկ թե ինչ է դա լինելու՝ ժամանակը ցույց կտա։