Ինչու է դոկտոր-պրոֆեսորը լքել ՀՀԿ-ն

Վանաձորի պետական համալսարանի նախկին պրոռեկտոր, բանասիրական գիտությունների դոկտոր, պրոֆեսոր Վանո Եղիազարյանը ՀՀԿ-ից դուրս գալու դիմում է ներկայացրել: Ֆեյսբուքի իր էջում նա գրել է. «Ահա... Հովիկ Աբրահամյանի հայտարարության հետ բացարձակապես կապ չունի, նրան չի էլ հասնի, բայց դե, ոչինչ, մի կերպ կդիմանամ...

Ես՝ Վանո Եղիազարյանս, հրապարակայնորեն հայտարարում եմ, որ դուրս եմ գալիս ՀՀԿ-ից, այսուհետ իմ կուսակցությունը գրականությունն է, ազատ ու անկախ հայ մարդու և մտավորականի կոչումը, որի համազգային կուսակցապետը տիեզերական վարդապետ Գրիգոր Նարեկացին է, մարզայինը՝ ամենայն հայոց բանաստեղծ Հովհաննես Թումանյանը, ովքեր երբեք չեն դավել իրենց կուսակից ընկերներին՝ հայ գրողին ու գիտնականին:

Անպատվաբեր է մնալ մի կուսակցության շարքերում, որի հիմքում ազգային գաղափարաբանությունն է, սակայն իրականում ազգը պառակտող ու խառնակիչ գործունեություն է իրականացնում՝ հարազատին հանելով հարազատի, բարեկամին՝ բարեկամի, հային՝ հայի դեմ»:

«Առաջին լրատվական»-ը Վանո Եղիազարյանից հետաքրքրվեց, թե երբ էր պրոֆեսորը անդամագրվել ՀՀԿ-ին, և որն էր նման որոշում կայացնելու պատճառը: Ի պատասխան՝ նա նշեց. «Անտեղի եք հետաքրքրվում: Ավելի լուրջ քաղաքական դեմքեր կան, զբաղվեք նրանցով: Ես մտավորական մարդ եմ և չեմ ուզում որևէ կուսակցության անդամ լինել: Ես վեպ եմ գրել, առաջիկայում կհրապարակեմ, դրանով կզբաղվեք: Աշխատեք այլևս չզանգել»,- ասաց նա՝ անջատելով հեռախոսը և անպատասխան թողնելով հարցը, թե հատկապես ինչը իրեն դրդեց լքել կուսակցությունը: