ՀՀԿ դպրոցի ուսանողների երկշաբաթյա դասընթացն ու եռօրյա «փարթին»

«Հրապարակ»-ը գրում է․

ՀՀԿ «պարտշկոլան» արդեն ավարտել է ամառային դպրոցի դասընթացները։ Դրանք տեւեցին ընդամենը երկու շաբաթ, որից հետո ԱԺ նախագահ Գալուստ Սահակյանը շրջանավարտներին հանձնեց ավարտական վկայականները։ Առաջիկա օրերին պարզ կդառնա, թե դասերին մասնակցած մոտ 20 ուսանողից քանիսն առանց քննության կփոխադրվի աշնանային դպրոց եւ քանիսն ստիպված կլինի քննություն հանձնել։ Ուշագրավ է, որ ՀՀԿ քաղաքական դպրոցի այս 20 ուսանողներից միայն 4-5 հոգին է, որ ՀՀԿ անդամ չէ, մյուսները երիտհանրապետականներ են։ Փաստորեն, ՀՀԿ երիտասարդները, ի տարբերություն մանդատ ու պաշտոն ստացած իրենց ավագ գործընկերների, որոշել են ոչ միայն անդամատոմսով, այլեւ գաղափարախոսությամբ ու գիտելիքներով էլ ՀՀԿ-ական դառնալ ու առաջ գնալ։ Պարզ է, որ ՀՀԿ-ն, քանի դեռ իշխանություն է, շատ երիտասարդների համար առաջխաղացման ամենահեշտ ու կարճ ուղին է՝ անկախ նրանից, թե ինչ է մտածում հասարակությունն իրենց ու իրենց կուսակցության մասին։ Մի բան լավ է, որ իշխող կուսակցությունն սկսել է գնահատել գիտելիքն ու ինտելեկտը՝ հույս կա, որ շմայսների ու թոխմախների փոխարեն առաջ կմղվեն կրթություն ստացած կարիերիստները, ոչ թե ծեծող-ջարդող-կեղծող ՀՀԿ-ականները։

Այս իմաստով կարեւոր է, թե ինչ առարկաներ են դասավանդում ՀՀԿ-ի դպրոցում, եւ ովքեր են դասավանդողները։ ՀՀԿ ամառային դպրոցի առարկաներից գլխավորը եղել է ՀՀԿ-ի պատմությունն ու գաղափարախոսությունը, որը դասավանդել է ՀՀԿ փոխնախագահ, ՀՀԿ գաղափարական մասի ներկայացուցիչ Մուշեղ Լալայանը։ Հավանաբար մտածել են, որ ցանկացած երիտհանրապետականի համար պետք է հայոց պատմությունից առավել կարեւոր լինի իր կուսակցության պատմությունը, որն այսօր կերտում, իսկ գուցեեւ հարամում է հայոց պատմությունը։ Մուշեղ Լալայանը նաեւ ՀՀԿ-ի գաղափարախոսական հենքը՝ նժդեհագիտություն է դասավանդել։ Դասավանդվել է նաեւ արտաքին քաղաքականություն՝ իր տարբեր բաժիններով՝ Իրան, Ռուսաստան, Թուրքիա, ԵՄ, ԵՏՄ։

Իրանի մասը կարդացել է իրանագետ Վարդան Ոսկանյանը, ԵՄ-ն՝ ՀՀԿ խմբակցության անկուսակցական պատգամավոր, իր դիրքորոշմամբ ավելի շատ արեւմտամետ Կարեն Բեքարյանը։ Ռուսաստանի թեմայով խոսել է Ալեքսանդր Իսկանդարյանը, բնականաբար՝ ռուսերեն, քանզի նա հայերեն խոսել այդպես էլ չսովորեց։ Արտաքին հարաբերությունները, այդ թվում՝ կուսակցության «արտաքին հարաբերություններ» առարկան դասավանդել է ՀՀԿ մյուս փոխնախագահ, կրթության եւ գիտության նախկին նախարար Արմեն Աշոտյանը։ Դասախոսների թվում է եղել նաեւ ՀՀ նախագահի օգնական Վարուժան Ներսեսյանը։ Դասավանդվել է նաեւ իմիջ, որը կարդացել է իմիջի ու PR-ի մասնագետ, ԵՊՀ դասախոս Նոնա Մելքոնյանը, սոցիալ-մեդիա մարկետինգ՝ Սեդա Վարդանյան, տեղեկատվական անվտանգություն՝ Կարեն Վրթանեսյան։

Եղել են նաեւ առարկաներ պետական կառավարման հիմունքների, էներգետիկ անվտանգության եւ այլ թեմաներով։ Ավարտելուն պես, նույն օրը՝ օգոստոսի 10-ին, ՀՀԿ ամառային դպրոցի շրջանավարտները կազմակերպել են իրենց ավարտական փարթին կամ «վիպուսկնոյը»։ Այդ առիթով նրանք երեք օրով մեկնել են Ծաղկաձոր՝ ինչ-որ կուսակցական հանգստյան տանն ամառային դպրոցի բարեհաջող ավարտը նշելու եւ երեք օրով երկշաբաթյա ծանր քաղաքական-կուսակցական դասերից ռելաքս լինելու։