Լուսանկարներ և մանրամասներ Մենչի հումորային նոր սերիալից

Այսօր մեկնարկում է Արմեն Պետրոսյանի՝ Մենչի հումորային նոր նախագիծը՝ «Սիրո հասակը», որտեղ խաղում են Գոռ Հակոբյանը, Լուզիա Ներսիսյանը, Գրիգոր Դանիելյանը, Աղաս Մանուկյանը, Եվա Բաղդասարյանը, Գարիկ Սեփխանյանը, Անիտա Ավետիսյանը, Մխիթար Ավետիսյանը, Էմմա Սապունջյանը, Վահան Թովմասյանը, Էրմինա Զախարովան, Ելենա Բորիսենկոն, Իլոնա Մկրտչյանը և այլք։

Tert.am Life-ը ներկայացնում է լուսանկարներ նկարահանման հրապարակից և մանրամասներ:

24 մասանոց հումորային սերիալի հիմքում սիրային պատմություն է այն մասին, թե ինչպես է մի կին սիրահարվում իրենց 15–20 տարի փոքր տղայի։ Կնոջը մարմնավորում է Լուիզա Ներսիսյանը, տղային՝ Գոռ Հակոբյանը։

«Ամբողջ ֆիլմում առկա է սերունդների բախում: Մեր գլխավոր հերոսուհին գտնում է իր սերը, բայց թե ով կլինի իր սերը, կհասկանանք ֆիլմը դիտելուց հետո: Լուիզա Ներսիսյանի հետ շատ եմ աշխատել, ֆիլմում կան նաև դերասաններ, որոնց հետ առաջին անգամ եմ աշխատում, սակայն, տեսնելով առաջին սերիաները, հասկացա, որ ընտրությունը ճիշտ էր: Հեռուստադիտողները կզարմանան՝ տեսնելով իրենց կողմից սիրված մարդկանց՝ այլ իրավիճակներում»,- ասաց Մենչն ու հավե;եց, որ նախագծի սցենարի հեղինակներն են Գրիգոր Դանիելյանն ու Գարիկ Սեփխանյանը:

Մենչի խոսքով՝ նախագիծը նախատեսված է 1 եթերաշրջանի համար և ունի ավարտուն վերջաբան։ Երկրորդ եթերաշրջան առայժմ չեն նախատեսում։ «Եթե որոշենք շարունակել, նախ պետք է սցենարային շարունակության գիծ գտնենք, որովհետև ոչ բոլոր սցենարներն ես կարողանում համարժեք շարունակել։ Եթե պիտի անես ավելի վատ, իմաստ չունի շարունակել։ Այս դեպքում պատմությունն ավարտվում է։ Թե ինչ կորոշենք հետո, ինքս էլ չգիտեմ»,– ասաց նա։