Սուրենյանը վատ լուրեր ունի

Առաջիկա 5 օրերին նույնպես եղանակային էական փոփոխություններ չեն լինելու, և «Հիդրոմետ» ծառայության օդերևութաբանության կենտրոնի պետ Գագիկ Սուրենյանը ոչ մի լավատեսական կանխատեսում չունի եղանակային պայմանների վերաբերյալ։

Tert.am-ի հետ զրույցում Գագիկ Սուրենյանն ասաց. «Ես բազմից ասել եմ, որ Հայկական լեռնաշխարհի վրա ձևավորվել է հզոր անտիցիկլոն, որը մթնոլորտային բարձր ճնշման գոտի է և օդային պատ, որն արգելք է հանդիսանում Արևմուտքից, Միջերկրական ծովի շրջաններից բոլոր տեսակի տեղումնաբեր ցիկլոնների, տաք հոսանքների՝ դեպի Հայաստանի Հանրապետություն ներթափանցման համար»:

Ըստ Գագիկ Սուրենյանի՝ Թուրքիայում արդեն 5-6 օր է՝ առատ ձյան աննախադեպ տեղումներ են, և այս պահին էլ այնտեղ հզոր ցիկլոն է գործում, առանձին բնակավայրերում ձյան շերտը հասնում է 3 մետրի, իսկ այս խոնավ օդային տեղումնաբեր զանգվածները հասնում են մինչև Էրզրում, Կարս, Վան՝ այդ գծի վրա: Եվ քանի որ դրանից այն կողմ, դեպի Հայաստանի տարածք անտիցիկլոնը պատնեշ է առաջացրել, այդ զանգվածները չեն կարողանում ներթափանցել մեր հանրապետության տարածք:

«Եվ քանի որ առաջիկա 5 օրերին այդ անտիցիկլոնային դաշտը, այդ օդային պատնեշը գերակշռելու է մեր հանրապետության տարածքում, ներկա պահին ոչ մի լավատեսական բան մենք չենք կարող ասել։ Օդի ջերմաստիճանը չի փոխվի, ամպամածությունը կպահպանվի: Միայն ցերեկային ժամերին հնարավոր է, որ որոշակի նոսրացում լինի ամպամածության, գիշերն ու առավոտյան նորից խտացում, մառախուղ և այլն»,-ըստ որում, Գագիկ Սուրենյանն ընդգծեց, որ ներկա պահին հանրապետության ողջ տարածքում չէ, որ նման ցածր ջերմային ֆոն է:

Երեկ կենտրոնի օդերևութաբանները Կապանի հատվածում գրանցել են մինչև +11, Գորիսում` +8, Բագրատաշենում, Իջևանում, Դիլիջանում, Օձունում՝ +8-9, Լոռիում՝ +5-7: Իսկ լեռնային շրջաններում՝ Սևան, Գավառ, Շորժա, Վարդենիս, Ապարան և այլ բնակավայրերում ցերեկային ժամերին ջերմաստիճանը հիմնականում եղել է -1, միայն Արարատյան դաշտում՝ -7-ից -10:

Այսինքն` Արարատյան դաշտը և Երևանը կրկին իրենց ցածր ջերմային ֆոնով զանազանվում են հանրապետության բոլոր շրջաններից: