Դավիթ Գալստյանի ընկերությունը հետախուզական և հարվածային ԱԹՍ-ների արտադրություն էր նախատեսել. նախապատրաստական աշխատանքները կատարված են

Հունվարի 25-ին հայտնի դարձավ, որ ՀՀ զինված ուժերի ավիացիան համալրվել է ժամանակակից, բազմաֆունկցիոնալ նոր ուղղաթիռներով, որոնք նախատեսված են դեսանտային, կրակային, տրանսպորտային և սանիտարական խնդիրներ կատարելու համար։

168am-ի տեղեկություններով, Մի-171Շ (Ми-8АМТШ) ուղղաթիռների գործարքը և մատակարարման լոգիստիկայի հետ կապված խնդիրներն իրականացվել և կարգավորվել են զենքի մատակարար Դավիթ Գալստյանի (Պատրոն Դավիթ) միջոցով, որն այս պահին հրթիռների գործով գտնվում է կալանքի տակ:

Պայմանագրով նախատեսված է եղել թվով 4 ուղղաթիռի մատակարարում:

2007-ին Մի-171 ուղղաթիռի արժեքը 8 միլիոն դոլարի սահմանում էր:

Դավիթ Գալստյանի մասով, նշենք նաև, որ 168.am-ի տեղեկություններով, ռուսական ընկերության հետ համագործակցությամբ Դավիթ Գալստյանի ընկերություններից մեկը նախատեսել էր ՀՀ-ում սկսել հետախուզական և հարվածային ԱԹՍ-ների արտադրություն:

Սկզբնական փուլում մասերը պետք է բերեին դրսից և արդեն ՀՀ-ում հավաքեին ԱԹՍ-ները՝ ռուսական կողմի վերահսկողությամբ: Երկրորդ փուլում ծրագրված էր անհրաժեշտ մասերը ևս Հայաստանում արտադրել:

Նախքան արցախյան վերջին պատերազմը նախապատրաստական աշխատանքները կատարվել են՝ վայրի ընտրություն, շինարարական աշխատանքներ, և պետք է արդեն հոսքագծերը բերվեին և տեղադրվեին, երբ սկսվեց պատերազմը: Ներկա պահին գործընթացը կանգնած է:

Հիշեցնենք, որ 2018-ի օգոստոսին հայտարարություն եղավ Royalsys Engineering LTD ընկերության (ընկերության բաժնետերն ու նախագահը Դավիթ Գալստյանն է (Պատրոն Դավո մականունով), որը Հայաստանում մի քանի այլ ընկերությունների բաժնետեր է. այդ ընկերությունները մասնագիտացած են ռազմական արդյունաբերության մեջ) և ռուսական «Կալաշնիկով» կոնցեռնի միջև կնքված պայմանագրի մասին, որով նախատեսվում էր Հայաստանում հիմնել «Կալաշնիկով»-ի նոր՝ AK-12 և AK-15 նմուշների արտադրություն։

2020-ի ամռանը ՀՀ-ում բացվեց «Կալաշնիկովի» գործարանը, որին մասնակցել էր նաև ՀՀ վարչապետ Նիկոլ Փաշինյանը: Ինչպես տեղեկացվել էր՝ սկզբից այն իրենից ներկայացնելու էր AK-103-ի հավաքման գործարան, որտեղ աշխատելու է շուրջ երեք տասնյակ աշխատակից, հիմնականում՝ նախկին սպաներ: Տարեկան կտրվածքով նախատեսվում է հավաքել մի քանի տասնյակ հազար հատ AK-103: Պայմանագիրը 10 տարվա համար է նախատեսված:

168.am-ը գրել էր, որ «Նեյտրոն» գիտաարտադրական միավորման խորհրդի նախագահ Դավիթ Գալստյանը սկսելու է նաև փամփուշտների արտադրություն, և, որ այն հետագայում ոչ միայն լրացնելու է հայկական զինուժի պահանջները, այլև արտահանվելու է՝ հաշվի առնելով խորհրդային ինքնաձիգների օգտագործման ծավալներն աշխարհում, միաժամանակ այն փաստը, որ, ըստ էության, սպառվում են ՌԴ-ի՝ Խորհրդային Միությունից մնացած փամփուշտների պաշարները:

Մենք գրել էինք նաև, որ «Նեյտրոնի» խորհրդի նախագահ Դավիթ Գալստյանն ինտենսիվորեն զբաղվում է ՀՀ-ում գիշերային տեսադիտարկման համակարգերի արտադրություն հիմնելու գործով: Դրանք նախագծվել էին ՀՀ-ում, որին մասնակցել են նաև դրսի մասնագետներ, հաշվի են առնվել մեր բանակի պահանջները, աշխարհագրական պայմանները:

Անդրադառնալով հրթիռների գործին, ըստ որի՝ Գալստյանին մեղադրում են ժամկետանց և անորակ ավիացիոն հրթիռներ մատակարարելու և պետությանը 4,6 միլիոն դոլար վնաս հասցնելու մեջ, նշենք, որ Գալստյանի մատակարարած՝ «Ս-8 ԿՈՄ» չկառավարվող հրթիռների ձեռքբերման համար ՌԴ ՊՆ-ն 2019-2021 թվականներին առանձնացրել է ընդհանուր 9.7 միլիարդ ռուբլի:

Հավելենք, որ հրթիռների գործով անցնում են ՀՀ պաշտպանության նախկին նախարար Դավիթ Տոնոյանը, ՀՀ ԶՈՒ ԳՇ պետ Արտակ Դավթյանը, ԶՈՒ ԳՇ պետի նախկին տեղակալ Ստեփան Գալստյանը, զենքի մատակարար Դավիթ Գալստյանը, ՀՀ ԶՈՒ ավիացիայի վարչության նախկին պետ Ավետիք Մուրադյանը, նույն վարչության ավիացիոն տեխնիկական ունեցվածքի ծառայության պետ Արտյոմ Համբարյանը, ավիացիայի վարչության գլխավոր ինժեներ Վլադիմիր Բաբայանը: