Տղամարդիկ են շատ, թե կանայք․ դեմոգրաֆիկ վիճակը Հայաստանում

«Փաստ» օրաթերթը գրում է.

Այս մասին իմանում ենք Ազգային վիճակագրական ծառայության կայքում տեղ գտած հրապարակումից: Մասնավորապես, ըստ ուսումնասիրության՝ Հայաստանի 2 միլիոն 998 հազար 577 մշտական բնակչությունից 1 միլիոն 569 հազար 535 կանայք են, իսկ մնացած 1 միլիոն 429 հազար 42–ը՝ տղամարդիկ:
Ինչ վերաբերում է կանանց և տղամարդկանց թվի համամասնությանը քաղաքային և գյուղական բնակավայրերի մասով, ապա գյուղական համայնքում այն գրեթե հավասար է, իսկ քաղաքներում կրկին ավելի շատ են կանայք: Այսպես, գյուղերում բնակվող կանանց թիվը կազմում է 551 հազար 623, իսկ տղամարդկանցը՝ 539 հազար 948: Քաղաքային բնակավայրերի դեպքում պատկերն այսպիսին է՝ 1 միլիոն 17 հազար 912 կանայք են, իսկ 889 հազար 94–ը՝ տղամարդիկ:
Ըստ www.armstat.am կայքի հրապարակման՝ Հայաստանի բնակչությունը բնութագրվում է ժողովրդագրական ծերացումով և թվաքանակի նվազումով՝ պայմանավորված ծնելիության ցածր մակարդակով և բարձր արտագաղթով:
Հայաստանում կատարված ուսումնասիրությունների տվյալներով՝ 0–14 տարեկան և 63 տարեկանից բարձր տարիք ունեցող կանանց թիվը գրեթե միանման է: 0–14 տարեկանները 274 հազար 949 են, իսկ 63–ից բարձր տարիք ունեցողները՝ 231 հազար 995: Միաժամանակ 15–29 տարեկան երիտասարդ կանանց թիվը կազմում է 346 հազար 573, իսկ 30–62 տարեկաններինը՝ 716 հազար 18:
Տղամարդկանց դեպքում էլ 0–14 տարեկանների և 15–29 տարեկանների թվերն են միմյանց մոտ: Այսպես 0–14 տարեկան տղաները կազմում են 313 հազար 899, 15–29 տարեկանները՝ 342 հազար 982, 30–62 տարեկանները՝ 616 հազար 497, իսկ 63 տարեկանից բարձր տարիք ունեցող տղամարդիկ էլ՝ 155 հազար 664:
Ըստ ԱՎԾ–ի կատարած ուսումնասիրության՝ ՀՀ–ում մարդիկ ավելի երկար են ապրում, ամուսնանում ավելի ուշ և քիչ երեխաներ ունենում:
Այսպես, 2015 թ. կանանց կյանքի սպասվող տևողությունը ծննդյան պահից կազմել է 78,2 տարի, ինչը շատ ավելի երկար է, քան 1958 թ.–ին, երբ կյանքի միջին տևողությունը կազմել էր 70 տարի: Տղամարդկանց կյանքի սպասվող տևողությունը 2015թ.–ին կազմել է 71,7 տարի, 1958 թ.–ին՝ 67 էր: Առաջին ամուսնության միջին տարիքն աճել է տղամարդկանց և կանանց համար: 2015 թ.–ին կանանց առաջին ամուսնության միջին տարիքը կազմել է 26,2, իսկ տղամարդկանցը՝ 29,4: Սա զգալիորեն ավել է, քան 1990 թ.–ին, երբ կանանց առաջին ամուսնության միջին տարիքը կազմել էր 22,8, իսկ տղամարդկանցը՝ 25,8:
Պտղաբերությունը կամ մեկ կնոջ հաշվով երեխաների միջին թվաքանակը, սկսած 1990 թ.–ից արագորեն նվազել է` հատկապես գյուղական վայրերում: 1990 թ.–ին գյուղական վայրերում կանայք իրենց կյանքի ընթացքում ունենում էին միջինը 3,2 երեխա՝ մեկ կնոջ հաշվով, քաղաքային վայրերի՝ 2,3 երեխայի համեմատ: Ցուցանիշների նվազման հետևանքով, եթե 2014 թ.–ին գրեթե վերացել էր գյուղական ու քաղաքային ցուցանիշների միջև առկա տարբերությունը, ապա 2015 թ.–ին գյուղական վայրերում ցուցանիշը զգալիորեն նվազել է քաղաքայինի համեմատ, և պտղաբերության գործակիցը կազմել է 1,5՝ քաղաքային վայրերի 1,7 երեխայի համեմատ:

Շարունակությունը` «Փաստ» օրաթերթի այսօրվա համարում: