«Կուզես» հիթի շարունակությունը՝ «Կհամոզեմ»․ Արամ MP3–ն՝ նկարահանման ժամանակ սառը ցնցուղ ընդունելու դաժանության և երջանիկ սիրո մասին

Երգիչ Արամ MP3–ն երեկ ներկայացրեց իր նոր՝ «Կհամոզեմ» երգը, որը «Կուզես»–ի տրամաբանական շարունակությունն է։ Tert.am Life–ի հետ զրույցում Արամը պատմել է երգի ստեղծման պատմության, բարդ նկարահանումների և այն եռագրություն դարձնելու մասին։

«Քանի որ «Կուզես»–ը շատ ստացված էր, 2 տարվա դադարից հետո ուզում էի կրկին բալլադային երգ թողարկել, բայց մտավախություն կար։ Առհասարակ, ստացված գործից հետո միշտ կա վախ, որ գուցե հաջորդը լավ չլինի։ Ի սկզբանե գաղափար չի եղել շարունակելու «Կուզես»–ի թեման, սակայն ընթացքում ստեղծվեց հենց այդպիսի երգ։ Այն 10 ամսվա պատմություն ունի։ Նույն թիմով ենք աշխատել, երաժշտությունը կրկին գրել են Կարենն ու Սևակը, Ավետը ջանք ու եռանդ չխնայեց բառերի համար։ Ընթացքում հասկացանք, որ թեմայի շարունակություն է ստացվում, գուցե, որովհետև թիմը նույնն էր՝ ԿարենՍևակի մեղեդին, Ավետի ձեռագիրը, իմ երգելը։ Մեր մոտեցումը զգացմունքին նույնն էր, ինքնաբերաբար ստացվեց եռագրության երկրորդ մաս»,– պատմեց Արամն ու հավելեց, որ գուցե երրորդ մաս էլ լինի։

««Կուզես»–ը սիրո ստեղծման փուլի մասին էր, երբ տղան առաջարկում է իր սերը, իսկ այստեղ արդեն ապրում են իրար հետ, ոչ մի խնդիր, հարց–պատասխան չունեն։ Ցանկացած զույգի մոտ գալիս է լռության պահ, երբ իրար լիարժեք հասկացած են։ Հարաբերություններն իդեալական են, պակասում է միայն ժամանակը բառիս բուն իմաստով, ուղղակի ուզում ես հետ տալ ժամանակը, որպեսզի գիշերը երկարի, չլուսանա, որովհետև գիշերն ավելի ռոմանտիկ ու զգացմունքային է»,– նկատեց երգիչը։

Տեսահոլովակի ռեժիսորն Արամայիս Հայրապետյանն է։ Արամը պատմեց, որ նկարահանումներն իրականացրել են «Մեր բակի» խաչմերուկում՝ Թումանյան–Սպենդիարյան փողոցների հատման կետում։

«Նախապես դիմել էինք Ոստիկանություն, փակել էինք փողոցը, քանի որ ահավոր բանուկ է։ Նկարահանումներն անցան երևանյան միջավայրում։ Հարևանները նայում էին, նկարում։ Մենք մինչև ժամը 12–ը ժամանակ ունեինք, քանի որ 12–ից հետո աղմուկ անել չի կարելի։ Մի կադրով ենք նկարահանել, իհարկե, փորձել էինք արել, բայց մոտ 20 դուբլից ստացվեց։ 12։15 հասցրեցինք ավարտել։ Հարևանները նայում էին, նկարում, ասում, մի հատ էլ նկարահանեք։ Հայկական ջան–ջիգյարով, երևանյան կոլորիտով անցան նկարահանումները,– պատմեց երգիչ ու հավելեց, որ ավելի վաղ որոշել էր այլևս չնկարահանվել արհեստական անձրևի տեսարանում, քանի որ դա շատ դաժան է։ –Ես որոշել էի էլ երբեք արհեստական սառը ցնցուղի տակ չմտնել, քանի որ դառը փորձ ունեմ, դա սարսափելի բան է։ Այդ անգամ ինձ փրկեց լողորդների համար նախատեսված կոստյումը, որը թույլ չտվեց, որ մարմինս սառչի, կարողացա նույնիսկ նվագել։ Սակայն պարողների դեպքում դա հնարավոր չէր։  Մի բան չէր ստացվում, արագ–արագ չորանում էին ու նորից նկարահանում։ Եթե մինչև այդ հարևաններն ասում էին՝ էլի նկարեք, հենց ջրցան մեքենայից «անձրևը» եկավ, սկսեցին խղճալ մեզ»։

Երգչի խոսքով՝ իր համար ռիսկային էր այս ժանրում ներկայանալը, հատկապես, «Կուզեսի» հաջողությունից հետո, սակայն փորձը ցույց է տալիս, որ լսարանն իրեն ընդունում է այս կերպարում։

«Ինձ ռիթմիկ երգերի հետ են ասոցացնում։ 2 տարվա ընդմիջումը նորմալ էր, որպեսզի ինձ մարսեին էս ժանրում, որից շատ վախենում էի, մտածելով, որ պարային երգերից հետո բարդ կլինի ինձ ընկալել բալլադի մեջ։ Միաժամանակ ինձ շատ են ասում՝ մենակ այսպիսի երգեր կատարիր։ Ինքս էլ եմ հասկանում, որ այսպիսի երգերով կարողանում ես ցույց տալ ձայնիդ դիապազոնը, տեմբրդ, ռիթմիկ երգերի մեջ կենտրոնանում ես բիթի վրա, սակայն կարծում եմ այսպիսի ընդմիջումը լավ է։ Ինձ ուրախացնում է, որ ինձ այս ժանրում էլ են ընկալում։ Վերջերս Սոնայի հետ զուգերգ թողարկեցինք, որը ևս շատ սիրվեց»,– ասաց երգիչը։

Արամը նաև նկատեց, որ շատ կարևոր է, որպեսզի երգն իր հոգուն դիպչի․ «Մի քանի անգամ է՝ համոզվում եմ, եթե երգը քեզ հուզում է, հուզում է նաև հանդիսատեսին։ Իհարկե, իմ մոտեցումն իմ երգերին այլ է։ Ես դրանք չեմ լսում մի պարզ պատճառով․ մինչև ձայնագրումը այնքան եմ լսել, որ էլ չեմ կարողանում, բայց երբ լսում ես ու մի պահ փշաքաղվում, քեզ հուզում է, ոչ թե մեխանիկորեն երգում ես, հասնում է նաև հանդիսատեսին։ Այս երգն ինձ հուզեց և առաջին արձագանքներն Ինստագրամից, սոցցանցերից արդեն շատ ոգևորող են»։