Տոտո Կուտունիոն փրկվել է մահից

73-ամյա իտալացի երգիչ Տոտո Կուտոնիոն շոկի մեջ է, քանի որ պետք է Սիրիա մեկներ ՌԴ ՊՆ այն օդանավով, որը կործանվել էր Սեւ ծովում։ «Ես նրանց հետ Սիրիա պետք է մեկնեի, բայց մենեջերս համոզեց չխախտել համերգի գրաֆիկը»,– փոխանցում է Italia-ru–ն։

«Ես շոկի մեջ եմ այս ողբերգությունից հետո, քանի որ մի ամիս առաջ Ռուսաստանի բանակի Ալեքսանդրովի անվան երգի եւ պարի համույթի երգչախմբի ներկայացուցիչները կապվել էին մենեջերիս հետ, որպեսզի ինձ Սիրիա հրավիրեին շոուի ժամանակ համատեղ ելույթ ունենալու, որը պետք է կայանար դեկտեմբերի 29-ին։ Ես պետք է սկզբում մեկնեի Մոսկվա, իսկ այնտեղ միանայի երգչախմբին։ Բայց իմ համերգային գրաֆիկում համերգներ էին պլանավորված, եւ մենեջերը համոզեց ինձ հրաժարվել։ Ես սկսում եմ հավատալ ճակատագրին…»։

Հիշեցնենք, որ դեկտեմբերի 25-ին Սեւ ծովում ՌԴ ՊՆ Տու-154 օդանավի կործանման հետեւանքով 92 մարդ է զոհվել. 84 ուղեւոր եւ անձնակազմի 8 անդամ: Օդանավում Ալեքսանդրովի անվան երգի եւ պարի անսամբլի արտիստներ են եղել՝ Վալերի Խալիլովի գլխավորությամբ, երեք հեռուստաալիքների լրագրողներ (Առաջին ալիք, «Զվեզդա», ՆՏՎ), զինծառայողներ ու եւս մի քանի մարդ, այդ թվում՝ «Արդար օգնություն» հիմնադրամի գործադիր տնօրեն Ելիզավետա Գլինկան (որը հայտնի է որպես Դոկտոր Լիզա) եւ ՊՆ մշակույթի բաժնի ղեկավար Անտոն Գուբանկովը:

Օդանավը ռադարների էկրաններից անհետացել է դեկտեմբերի 25-ին, Մոսկվայի ժամանակով 05:27-ին, Սոչիից թռիչքից հետո: Այն Սոչի էր ժամանել մերձմոսկովյան Չկալովսկից, վառելիքի լիցքավորման նպատակով: Սիրիական Լաթաքիա ուղեւորվող օդանավը կործանվել է թռիչքից գրեթե անմիջապես հետո: