Տարվա կորուստները

2016 թվականը նշանավոր էր ոչ միայն ձեռքբերումներով, այլ նաև կորուստներով, որոնք քիչ չէին:

Մարդիկ, ովքեր այս տարի հեռացան կյանքից

Արմեն Երիցյան- Ինչպես շատերն են սիրում ասել՝ արտակարգ իրավիճակների արտակարգ նախարար Արմեն Երիցյանը, ով համանուն կառույցի հիմնադիրներից էր համարվում և ում օրոք Արտակարգ իրավիճակների նախարարությունը անհամեմատ բարեկարգվել էր, դեկտեմբերի 13-ին անգիտակից վիճակով տեղափոխվել էր հիվանդանոց: Գեներալ-մայորը տեւական ժամանակ տառապում էր ծանր հիվանդությամբ, ինչն էլ հանգեցրեց նրա վաղաժամ մահվան: 

Սամվել Հովսեփյանը (Ադմիրալ)- 58 տարեկան հասակում մահացավ արցախյան ազատամարտի մասնակից, «Ազատամարտիկների դաշինքի» խորհրդի անդամ Սամվել Հովսեփյանը, ով հայտնի է Ադմիրալ Սամո մարտական անունով: Գնդապետի առողջական վիճակը կտրուկ վատացել էր՝ քառօրյա պատերազմի սկսման օրերից մոտ երկու ամիս առաջապահ դիրքերում մնալուց հետո։ Նրա թոքերի վրա ուռուցքներ էին գոյացել։

Օֆելյա Համբարձումյան- 91 տարեկանում կյանքից հեռացել է ՀՀ ժողովրական արտիստուհի Օֆելյա Համբարձումյանը: Նա տիպիկ հայ երգչուհի էր, հայ ժողովրդական, գուսանական և աշուղական, ինչպես նաև՝ կոմպոզիտորական երգերի անզուգական կատարող, արժանացել էր «Մեսրոպ Մաշտոց» շքանշանի: Եվ պատահական չէ, որ ժողովուրդը նրան կոչում էր «Հայ բեմի թագուհի»:

Սուրեն Թադևոսյան- Իսպանիայում երկարատև հիվանդության հետևանքով կյանքից հեռացավ հայտնի ռեժիսոր և պրոդյուսեր Սուրեն Թադևոսյանը: Թադևոսյանն 40 տարեկան էր, 16 հեռուստանախագծերի, երկու հեռուստասերիալների հեղինակ, նկարահանել էր հարյուրավոր տեսահոլովակներ։ Թադևոսյանը բազմաթիվ մրցանակների դափնեկիր էր, 2010 թ.–ին ճանաչվել էր «Տարվա լավագույն ռեժիսոր»:

Դավիթ Հովհաննես- 71 տարեկանում կյանքից հեռացավ հայ բանաստեղծ, թարգմանիչ, ՀՀ մշակույթի վաստակավոր գործիչ Դավիթ Հովհաննեսը: Նա ավարտել էր Երևանի պետական համալսարանի բանասիրության ֆակուլտետը, աշխատել Հայաստանի պարբերական մամուլում, «Հայֆիլմ» կինոստուդիայում, անտիկ և արտասահմանյան գրականության պատմություն դասախոսել Հայաստանի մի շարք բուհերում: 1975 թվականից Հայաստանի Գրողների միության անդամ էր:

Վարուժան Այվազյան- 58 տարեկանում վախճանվեց արձակագիր, 1996 թ.-ից ՀԳՄ անդամ, «Գարուն» գրական-գեղարվեստական ամսագրի և «Ապոլոն» հրատարակչության գլխավոր խմբագիր Վարուժան Այվազյանը:

Միքայել Դանիելյան- Օգոստոսի 24-ի առավոտյան իր տանը հանկարծամահ է եղել Հելսինկյան ասոցիացիայի նախագահ, իրավապաշտպան Միքայել Դանիելյանը: Միքայել Դանիելյանը Հելսինկյան ասոցիացիան հիմնադրել է 1997թ․:2009թ․ Հայաստանում ԱՄՆ դեսպանատան կողմից ստացել էր «Ազատության պաշտպանի մրցանակը»:

Հրաչյա Թամրազյան-63 տարեկանում կյանքից հեռացավ նաև անվանի գիտնական, բանաստեղծ, թարգամանիչ, Մեսրոպ Մաշտոցի անվան Մատենադարանի տնօրեն, ԳԱԱ թղթակից անդամ Հրաչյա Թամրազյանը: Թամրազյանը բազմաթիվ մենագրությունների և գիտական հոդվածների ու ուսումնասիրությունների հեղինակ է։ Նրա ուսումնասիրությունները հիմնականում առնչվում են միջնադարագիտության՝ մասնավորապես նարեկացիագիտության բնագավառին:

Գեղամ Գրիգորյան- 65 տարեկանում կյանքից հեռացավ հայ անվանի օպերային երգիչ (տենոր) և բեմադրիչ, Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար, Լիտվական ԽՍՀ վաստակավոր արտիստ, ՀԽՍՀ ժողովրդական արտիստ, «Մովսես Խորենացի» և «Հայրենիքին մատուցած ծառայությունների համար» 1-ին աստիճանի մեդալակիր Գեղամ Միհրանի Գրիգորյանը:

Ալիխանե Մամեն-Կյանքի 69-րդ տարում վախճանվեց քուրդ ճանաչված բանաստեղծ, հրապարակախոս Ալիխանե Մամեն: Ալիխան Մամեի Մուսոյանը գրում էր քրդերեն եւ հայերեն՝ դպրոցական տարիներից տպագրվելով գրական մամուլում: Նրա հեղինակած ստեղծագործությունները, գրքերը նոր գույն էին քրդական եւ հայ գրականության ներկապնակում, այդ ամենի աղբյուրն էլ քրդական եւ հայկական բանահյուսությունն էր:
Նա Հայաստանի Գրողների Միության քուրդ գրողների բաժանմունքի նախագահն էր, հիմնադրել էր մի շարք հասարակական կազմակերպություններ:

Քառօրյա պատերազմի հերոսները- Արմենակ Ուրֆանյան, Ռոբերտ Աբաջյան, Ադամ Սահակյան, Քյարամ Սլոյան և այլք: Հայրենիքը պաշտպանելիս զոհված 63 զինծառայողները և 12 ազատամարտիկները հերոսացան ապրիլյան պատերազմում: Նրանք աչքի ընկան իրենց սխրագործություններով և խիզախությամբ. հայրենիքը պահող արծիվներն ընկան քառօրյա մարտերում: