«Փոքրիկ քմահաճույքներ ունի, որոնց տեղի ենք տալիս». Արտաշես Մխիթարյանը՝ որդու 4-ամյակի, տորթի ընտրության և նվերների մասին

Դրամատիկական թատրոնի փոխտնօրեն, դերասան Արտաշես Մխիթարյանն ու կինը` Մարիամը, նշել են իրենց որդու՝ Մաքսիմի 4-ամյակը: Tert.am Life-ի հետ զրույցում Արտաշեսն ասաց, որ օրը նշել են մանկական սրճարանում:

«Մաքսը շրջապատված էր իր հասակակիցներով՝ մեր ընկերների, հարազատների երեխաներով: Տորթի ընտրությամբ ես և կինս ենք զբաղվել, դրա վրա որդուս սիրելի մուլտհերոսներն էին՝ պանդայից մինչև ընձուղտ: Որդիս չէր խառնվել ընտրությանը, բայց մենք գիտեինք, թե իրեն ինչ դուր կգա, ինչը հաճելի կլինի: Մաքսի արձագանքը դրական էր, սիրում է խնջույքների մասնակցել: Երևի նրանից է, որ մեզ հետ ամենուր տանում ենք, շատ կապված ենք: Նույնիսկ մեծերի խնջույքներին կարող է գալ ու պարել, ուրախանալ»,- պատմեց նա:

Հայրիկի խոսքով՝ Մաքսն արդեն սկսել է հետաքրքրվել նվերներով: «Նրան հետաքրքրում է ոչ թե կոնկրետ նվերը, այլ տուփը: Այս տարի ռոբոտ ենք նվիրել, որի հետ դեռ խաղում է: Մեզնից հատուկ նվեր չէր խնդրել, առանձնապես պահանջկոտ երեխա չէ, բայց փոքրիկ քմահաճույքներ ունի, որոնց տեղի ենք տալիս: «Չի կարելի»–ներ, իհարկե, ևս կան, Մաքսին համոզելը բարդ է, բայց, ի վերջո, համոզվում է: Դեռ փոքր է, ընկալումներն այլ են, բայց պայքարում ենք և արդյունք տեսնում: Ե՛վ ես, և՛ կինս զրուցում ենք նրա հետ, ամեն ինչ պահից է կախված»,- պատմեց դերասանը:

2 տարի է, ինչ Մաքսիմը մանկապարտեզ է հաճախում: Ըստ Արտաշեսի՝ սկզբում չէր ուզում գնալ, հետո սկսել է սիրով հաճախել. «Հիմա, երբ 2 օր չի գնում, նորից չի ուզում գնալ, բայց երբ գնում է, տուն գալիս, պատմում է իր առօրյայից»:

Հայրիկն ընդգծեց, որ որդին շատ նախասիրություններ ունի: «Որդիս շատ է սիրում լողալ, եթե ամբողջ օրը լողավազանում լինենք, միևնույն է, չի բավարարվի: Զարմանալին այն է, որ լողալ չգիտի, սովորելու առաջին քայլերն ենք անում: Սիրում է նաև, երբ քնելուց առաջ հեքիաթ եմ պատմում, ընտրությունն ինձ է թողնում: Բակային խաղերին այնքան էլ չի մասնակցում, որովհետև մանկապարտեզից հետո մեզ հետ է ժամանակ անցկացնում, օրն արագ ավարտվում է: Հանգստյան օրերին էլ փորձում ենք միասին շատ ժամանակ անցկացնել»,- ասաց նա:

Արտաշեսը նկատեց, որ որդու մեջ չի տեսնում իր մանկությունը, իր ժամանակներն այլ էին, մտածողությունը՝ ևս: «Հիմա ամեն ինչ շատ ավելի գունավոր, լուսավոր է, ընտրության հնարավորությունները՝ շատ: Երեխաների մեծ մասը սմարթֆոններից կախվածություն ունի, Մաքսն էլ բացառություն չէ: Պայքարում ենք, որպեսզի քիչ օգտվի: Չնայած հասկանում ենք՝ դրա անհրաժեշտությունը կա, երեխան չպետք է սահմանն անցնի: Օրվա մեծ մասը մանկապարտեզում է լինում, երբ տանը սմարթֆոնից օգտվելու ցանկություն է ունենում, թույլ ենք տալիս, բայց ոչ երկար ժամանակով»,- նշեց Արտաշեսը:

Դերասանը նաև պատմեց, որ որդին, դեռ չծնված, թատրոն էր գնում: «Հիմա էլ գալիս է թատրոն, ներկայացումներ դիտում, բայց կարճ ժամանակով, կարող է մեկ գործողություն դիտել, հետո ինձ պատմել: Լավ հանդիսատես է, նաև շատ բարձր ծափահարում է: Չեմ պատկերացնում, որ որդիս կդառնա բեմում կանգնած մեկը, բայց հեռուստասերիալում խաղալու փորձ ունեցել է: «Սարի աղջիկ» հեռուստասերիալում հենց իմ տղային էր մարմնավորում, ընտրվել էր քասթինգով: Մաքսի հետ աշխատեցի, հեշտ ստացվեց նկարահանվելը: Նկարահանող խումբն ասում էր, որ ես ոչինչ չանեմ, իրենք էին շփվում, լսում էր: Օրեր էին լինում, երբ նկարահանման չէր, հարցնում էր՝ չե՞նք գնում: Իմ գենը մի փոքր կա, բայց ես իրեն երբեք չեմ ուղղորդի մասնագիտության հարցում: Կզբաղվի այն գործով, որն ինքը կընտրի և կսիրի: Դեմ եմ նրան, որ երեխային պարտադրում են կամ ավանդույթ պահում, որ ծնողների մասնագիտությունն ընտրի»,- եզրափակեց նա: