Արտակ Շաբոյանին լուրջ վտանգ է սպառնում

«Լրագիր»

Տնտեսական մրցակցության պաշտպանության պետական հանձնաժողովը հայտարարել է, թե տեղի է ունեցել շաքարավազի գնի թանկացում եւ ուսումնասիրում է թանկացման հիմնավորվածությունը:
Հանձնաժողովն այսպիսով ընթացք է տվել վարչապետ Կարեն Կարապետյանի առաջարկին: Նա ՏՄՊՊՀ նախագահ Շաբոյանին հորդորել էր հանգիստ թողնել գարեջրի շուկան, որտեղ մրցակցություն կա, եւ զբաղվել առաջին անհրաժեշտության ապրանքների շուկայով:
Այս շուկայում, ինչպես հայտնի է, տերուտիրականը ԱԺ պատգամավոր Սամվել Ալեքսանյանն է, կամ նրան «փոխկապակցված անձինք»: Այս առումով, Շաբոյանը հայտնվել է բավական երկիմաստ վիճակում, քանի որ ներկայում հասկանալի չէ, թե ինչ է իրենից պահանջվում:
Բանն այն է, որ Արտակ Շաբոյանի նախորդը՝ Դավիթ Հարությունյանը (չշփոթել կառավարության աշխատակազմի ղեկավարի հետ) փորձ էր կատարել առաջին անհրաժեշտության ապրանքների շուկայում կիրառել Սահմանադրության նորմերը, մասնավորապես մրցակցության մասով: Այդ ժամանակ մամուլում տեղեկություններ եղան, որ Սամվել Ալեքսանյանն անձամբ «այցելել» էր Դավիթ Հարությունյանին եւ նրա գլխին պահել ատրճանակը: Եվ ՏՄՊՊՀ երիտասարդ նախագահն, ընդամենը 4 ամիս պաշտոնավարելով, գերադասեց հեռանալ, քան գործել ատրճանակի փողի տակ:
Նա ռոմանտիկ էր եւ թերեւս հավատացել էր, որ հանձնաժողովը տնտեսական մրցակցությունը պաշտպանելու համար է: Իսկ Շաբոյանը արագ հասկացավ, որ այդ հանձնաժողովը ոչ թե մրցակցությունը, այլ մենաշնորհները պաշտպանելու համար է, ինչպես պետական մյուս օղակները: Ընդ որում, հապավումն էլ էր համընկնում՝ Տնտեսական մենաշնորհների պաշտպանության պետական հանձնաժողով:
Դրանից հետո նա պարբերաբար տուգանում էր Սամվել Ալեքսանյանին «փոխկապակցված» բիզնեսները, ով եւս հասկացել էր, որ ճիշտը չնչին տուգանքներ վճարելն է՝ դիրքերն անսասան պահելու համար: Իսկ Շաբոյանը ոչ միայն պարբերաբար տուգանում էր, այլեւ հիմնավորում այս շուկայում մենաշնորհների օբյեկտիվությունը:
Ներկայում կառավարություն է փոխվել, փոխվում են նաեւ խաղի կանոնները, փոխվել են «նախկին համակարգի» տնտեսական բլոկի առանցքային պաշտոնյաները, ի դեպ՝ բացառությամբ Շաբոյանի: Բացի այդ, հայտարարվել է պայքար մենաշնորհների դեմ, որը հասկանալի չէ՝ իրականում ինչ է նշանակում:
Այս պայմաններում, Շաբոյանը կարող է տուգանել Սամվել Ալեքսանյանին, եւ դրանով էլ ամեն ինչ ավարտվի: Սակայն, դա կարող է դուր չգալ վարչապետին, քանի որ այդ դեպքում կստացվի, որ նա էլ է զբաղված աչքակապությամբ: Եվ հնարավոր է նա լուծի Շաբոյանի պաշտոնանկության հարցը, նկատի առնելով, որ նա «հնի մնացուկ» է եւ համարժեք չէ նոր խնդիրներին:
Մյուս կողմից, եթե Շաբոյանը լսի վարչապետին եւ ավելի խորը գնա ու բացահայտի շաքարավազի շուկայի բնույթն ու կառուցվածքը, կարող է կրկին հայտնվել Սամվել Ալեքսանյանն՝ ատրճանակով: