Ամուսինը դաժան ծեծի է ենթարկել կնոջը՝ զրկելով նրան փայծաղից

Վերաքննիչ քրեական դատարանում ավարտվեց Արման Հ.-ի գործով բերված վերաքննիչ բողոքի քննությունը:

Գործը քննվել է Սյունիքի մարզի ընդհանուր իրավասության դատարանում Դավիթ Սարգսյանի նախագահությամբ:

33-ամյա Արմանը մեղադրվել է տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Տուժողը Արմանի կինն է, նրա երկու մանկահասակ երեխաների մայրը:

Ըստ մեղադրանքի՝ 2016 թվականի մարտի 7-ին, ժամը 13-ի սահմաններում Արման Հ.-ն տանը, տեղեկանալով, որ մայրն ու կինը կենցաղային հարցերի շուրջ վիճել են իրար հետ, զայրացել է կնոջ վրա:

Նա խոհանոցում ոտքով երկու անգամ հարվածել է աթոռին նստած կնոջ որովայնին: Կինը վայր է ընկել, ապա դուրս է փախել:

Արմանը հետապնդել է կնոջը, հասել է նրան տնամերձ այգում ու քարով մեկ անգամ դարձյալ հարվածել է կնոջ որովայնին:

Հարվածների հետևանքով կնոջ մոտ առաջացել է օրգանի կորուստ՝ «որովայնի փակ վնասվածք, փայծաղի պատռվածք, ներքին արյունահոսություն»:

Կինը տեղափոխվել է հիվանդանոց, որտեղ կատարվել է որովայնահատում, հեռացվել է փայծաղը:

Դատարանում Արման Հ.-ն իրեն լիովին մեղավոր է ճանաչել, նրա միջնորդությամբ գործը քննվել է արագացված ընթացակարգով:

Տուժող կինը հայտնել է, թե հաշտվել է ամուսնու հետ, նրանից որևէ պահանջ չունի:

Դատարանը հաշվի է առել, որ Արման Հ.-ն ունի մտավոր առողջության խնդիրներ, ինչի համար նա ժամանակին ազատվել է պարտադիր զինվորական ծառայությունից:

Արմանը բանվորություն է անում ու պահում է հինգ հոգուց բաղկացած ընտանիքը: Նրա և տուժողի համատեղ ամուսնական կյանքի ընթացքում 2010 և 2011 թվականներին ծնվել է երկու երեխա:

Ըստ համապատասխան տեղեկանքների՝ Արման Հ.-ի ընտանիքը սոցիալապես անապահով է, ստանում է աղքատության ընտանեկան նպաստ:

Ընտանիքի միակ կերակրողը Արման Հ.-ն է:

Դատարանը հաշվի է առել, որ կնոջը ծանր վնասվածք պատճառելուց անմիջապես հետո Արմանը կնոջը տեղափոխել է հիվանդանոց, զբաղվել է նրա խնամքով: Կինը ներել է նրան, շարունակել է ապրել նույն ընտանիքում:

Նախաքննության ընթացքում Արման Հ.-ն կալանքի տակ է եղել միայն երկու օր, դատարանը մերժել է նրան երկու ամսով կալանքի տակ առնելու միջնորդությունը:

Դատարանն արձանագրել է, որ Արմանի կողմից ազատազրկման ձևով պատիժը իրապես կրելու դեպքում ընտանիքը կհայտնվի առավել ծանր սոցիալական վիճակում:

Արման Հ.-ն մեղավոր է ճանաչվել կնոջ առողջությանը դիտավորությամբ ծանր վնաս պատճառելու համար՝ ՀՀ քրեական օրենսգրքի 112 հոդվածի 1-ին մասով, դատապարտվել է 3 տարի ազատազրկման, նրա նկատմամբ կիրառվել է պայմանական դատապարտություն, և սահմանվել է 3 տարի փորձաշրջան:

Այս դատավճռի դեմ վերաքննիչ բողոք էր բերել Սյունիքի մարզի դատախազի տեղակալ Ավետիսյանը:

Բողոքաբերը խնդրել էր պայմանական դատապարտության կիրառումը Արմանի նկատմամբ վերացնել, նրան դատապարտել իրական ազատազրկման՝ 3 տարի ժամկետով:

Վերաքննիչ դատարանում մեղադրողը հանդես եկավ իր բողոքի հիմնավորմամբ:

Նա շեշտեց, որ Արման Հ.-ի կողմից կատարվել է հանրային բարձր վտանգավորություն ունեցող արարք, Արմանը ոտնձգել է մարդու առողջության ու կյանքի դեմ, տուժողը արդյունքում կորցրել է օրգանը՝ փայծաղը:

Դատախազը նշեց, որ ընդհանուր իրավասության դատարանը դատավճռում ամրագրել է՝ իբր Արման Հ.-ն է դեպքից հետո կնոջը տեղափոխել հիվանդանոց: Սակայն իրականում շտապօգնություն ահազանգել է հարևանը: Տուժած կնոջը հիվանդանոց են տեղափոխել շտապօգնության մեքենայով:

Դատավճռում նշված է նաև, որ Արման Հ.-ն զղջացել է կատարածի համար: Մեղադրողի կարծիքով՝ դա այնքան էլ արժանահավատ չէ: Հիվանդանոց տեղափոխված կինը հայտարարել է, թե վնասվածքը ստացել է վայր ընկնելու հետևանքով: Նույնն ասել է նաև Արման Հ.-ն: Նրան երկու օր հաջողվել է մոլորեցնել քննություն կատարողներին, մինչև որ բացահայտվել է իրականությունը:

Ըստ դատախազի ունեցած տեղեկությունների՝ Արման Հ.-ի ընտանիքում մշտապես վիճաբանություններ են տեղի ունենում: Տուժող կինը, որ շարունակում է ապրել Արմանի հետ համատեղ, կարելի է ասել՝ ինչ-որ չափով վտանգված է:

Դեպքի օրն Արմանը կնոջ նկատմամբ բռնություն է գործադրել նախ խոհանոցում՝ ոտքով երկու հարված է հասցրել նստած կնոջ որովայնին: Կինն ընկել է, սկսել է փսխել: Հետո կարողացել է դուրս փախչել: Արմանը հետապնդել է փախչող կնոջը, հասել է, մոտ տարածությունից բռնցքաչափ քարով դարձյալ հարվածել է կնոջ որովայնին: Նման արարք կատարած անձը, ըստ մեղադրողի բողոքի, պետք է ազատազրկման ձևով պատիժ կրի, միայն այդ դեպքում պատիժը համաչափ կլինի արարքին:

Որքան որ տարօրինակ էր՝ դատախազի բողոքի դեմ վերաքննիչ դատարան գրավոր առարկություն էր ներկայացրել տուժող կինը:

Նա առարկել էր բողոքի դեմ, հայտնել էր, թե հաշտվել է ամուսնու հետ, երեխաների հետ շարունակում է ապրել նրա տանը և խնդրում է նրան չազատազրկել, քանի որ նա է ընտանիքի միակ կերակրողը: «Եթե բավարարեք դատախազի բողոքը, եթե ամուսնուս ազատազրկեք, ես ու իմ երկու երեխաները կկործանվենք»,- գրել էր ամուսնու կողմից ոտքերով ու քարով դաժանաբար ծեծված, փայծաղը կորցրած կինը…

Ակնհայտ էր, որ Արման Հ.-ն մտավոր առողջության հետ կապված խնդիր ունի: Նա հարցերը ուշ էր ընկալում, չհիշեց, թե քանի տարեկան է ավագ երեխան, ասաց, թե նա դպրոցական է:

Դատարանը հարցեր տվեց Արմանին՝ կատարած արարքի վերաբերյալ: Արմանը նշեց, որ այլևս նման բան չի կրկնվի: Նա ասաց, թե կինը «տեր չունի՝ ծնողներ, հարազատներ», գնալու տեղ էլ չունի: Բացի այդ Արմանը կնոջ մասին ասաց, թե նա «լսող է՝ մի բան ասում ենք՝ անում ա, խելոք ա…»:

Ի՞նչ անի, որ խելոք չլինի անտեր, երկու մանկահասակ երեխա ունեցող, Արմանից տնտեսական կախման մեջ գտնվող կինը, ում, ըստ երևույթին, ոչ միայն Արմանը, նաև նրա մայրն է ճնշում ու մտավոր խնդիրներ ունեցող որդուն հրահրում է հանցավոր արարք կատարել՝ երկու երեխա ծնած կնոջը դաժան ծեծի ենթարկել, հարվածներ հասցնել որովայնի շրջանին, ինքն էլ՝ մայր ու կին լինելով, չի միջամտում, չի կանխում…

Արմանն ասաց, թե շարունակում է բանվորություն անել: Աշխատավարձով փակում է խանութում՝ գնած մթերքի դիմաց առաջացած պարտքերը, մնացած փողը տուն է տանում, հոգ է տանում երեխաներին… Արմանի հետ դատարան ներկայացած բարեկամը հաստատեց. «Արմանը լավ հեր ա»…

Վերաքննիչ դատարանը՝ Մանուշակ Պետրոսյան, Ռուբիկ Մխիթարյան, Արմեն Դանիելյան կազմով, հաշվի առավ Արման Հ.-ի ընտանիքի վիճակը, այն, որ նա է ընտանիքի միակ կերակրողը, նրան ազատազրկելու դեպքում ընտանիքը կհայտնվի առավել ծանր վիճակում:

Մեղադրողի վերաքննիչ բողոքը մերժվեց:

Ընդհանուր իրավասության դատարանի դատավճիռը՝ պայմանական դատապարտության կիրառմամբ, մնաց անփոփոխ՝ օրինական ուժի մեջ:

Արմանը շնորհակալություն հայտնեց, հավաստիացրեց, որ այլևս ընտանիքում բռնություն չի գործադրի, հանցավոր արարք չի կատարի…