ԲՀԿ հանդարտ ընթացքը խորապես մտահոգում է քաղաքական հակառակորդներին

«Բարգավաճ Հայաստան» կուսակցությունը խորհրդարանական արտահերթ ընտրության մասնակիցների թվում եզակիներից է, որ խոսում է իր ծրագրերի մասին, ներկայացնում արածն ու առաջիկա անելիքները, հանդարտ աշխատում ՀՀ քաղաքացիների հետ։ Այս հանգամանքը, իրոք, հարուցել է քաղաքական հակառակորդների խորը մտահոգությունը, և վերջիններս առիթը բաց չեն թողնում ցեխարձակելու ԲՀԿ-ի և նրա առաջնորդ Գագիկ Ծառուկյանի դեմ։ Մինչ իշխանությունն ու ընդդիմադիրները իրար են բզկտում ու անվանարկում, «Բարգավաճ Հայաստանը» ամրապնդում է իր դիրքերը։ Այդ հանգամանքը չէր կարող աննկատ մնալ, հատկապես փորձառու և լուրջ կառույցներ ունեցող, խորհրդարանական երկրորդ խմբակցությունն ունեցող ԲՀԿ-ի դեպքում, և վերջին շրջանում ԲՀԿ-ի դեմ հարձակումներն ահագնացել են։ Ըստ էության, ԲՀԿ հակառակորդ քաղաքական ճամբարներում խիստ անհանգստացած են կուսակցության և նրա ղեկավարի հանդարտ ընթացքով, ովքեր առանց ավելորդ ջղաձգումների առաջ են ընթանում, զբաղված են դասական քաղաքականությամբ։ 

ԲՀԿ-ն խոսում է միայն իր ծրագրերի մասին, չի մտնում ներքաղաքական բազարների մեջ, դիսկուրսը բացառապես ծրագրերի շուրջ է։ Բնական է, որ ընտրողների քվեի համար իրենց ճղող ուժերը հրաշալի հասկանում են ԲՀԿ պահվածքի արդարացվածությունը։ 

Ընտրողն այսօր կարիք չունի հայհոյանքներ ու վիրավորանքներ լսելու, գզվռտոց տեսնելու։ Հայաստանի Հանրապետության քաղաքացին պատերազմից հետո ցանկանում է երկրի իրական վերականգնում, իրատեսական ծրագրեր, լուրջ մասնագետների խոսք, որը վերջնարդյունքում վերածվելու է գործի։ Եվ սա է ընտրություններում շոշափելի արդյունք գրանցելու, անգամ իշխանություն գալու ուղին։

Կարեն Այվազյան