Ինչպես պատժեցին Տիգրան Սարգսյանին

ՀԱԿՈԲ ԲԱԴԱԼՅԱՆ, «Լրագիր»

Երեւանում հանդիպել ու ԵՏՄ հեռանկարների վերաբերյալ են զրուցել Սերժ Սարգսյանն ու ԵՏՄ հանձնաժողովի նախագահ Տիգրան Սարգսյանը: Սարգսյանը պարբերաբար հանդիպում է ԵՏՄ անդամ երկրների նախագահների կամ վարչապետների հետ: Օրեր առաջ նա հանդիպել էր օրինակ Պուտինին, Պուտինից հետո հանդիպում է Սերժ Սարգսյանին: Ինչ որ բան փոխանցում է Պուտինից Սարգսյանին, թե ոչ: Դժվար է ասել, թեեւ Պուտինը դեռեւս օգոստոսի 10-ին Սերժ Սարգսյանին ցույց տվեց, որ ոչինչ պետք չէ սպասել: Նա հայտարարեց, թե ամեն ինչ լավ է, Հայաստանի ՀՆԱ-ն էլ ԵՏՄ շնորհիվ աճում է 10 տոկոսով:
Սերժ Սարգսյանը Պուտինին չասաց ոչինչ, իսկ ահա Տիգրան Սարգսյանին այսօր ասել է, թե «ցավոք, անդամակցությունը (ԵՏՄ) համընկավ միջազգային տնտեսական գործընթացների հետ, որոնք բացասաբար ազդեցին երկրի տնտեսության վրա, և մեր քաղաքացիների վերաբերմունքը Եվրասիական տնտեսական միությանը դեռևս, մեղմ ասած, սպասողական է, թեև չանդամակցելու պարագայում, ես վստահ եմ՝ բացասական մոտեցումներն ավելի շատ կլինեին»:
Այլ կերպ ասած, Սերժ Սարգսյանը հայտարարել է, թե Հայաստանի քաղաքացիների «աչքը ջուր կտրեց» ԵՏՄ էֆեկտ սպասելով, իսկ իրականում էֆեկտը հակառակն է:
Տիգրան Սարգսյանը խոսել է այն աշխատանքի մասին, որ կատարում են ԵՏՄ էֆեկտիվությունը բարձրացնելու ուղղությամբ, ասելով, թե Սերժ Սարգսյանը մեծ ջանք եւ ուշադրություն է դարձնում այդ հեռանկարին: Սարգսյանը շնորհակալություն է հայտնել Սերժ Սարգսյանին հանդիպման եւ ԵՏՄ օրակարգի հանդեպ մշտական ուշադրության համար:
Տիգրան Սարգսյանը երեւի թե լռել է Սերժ Սարգսյանի անուշադրության մասին: Բանն այն է, որ եթե Սերժ Սարգսյանն ուշադիր լիներ օրինակ Տիգրան Սարգսյանի հոդվածներին, օրինակ 2012 թվականի օգոստոսին ռուսական մամուլում լույս տեսածին, ապա ներկայում ԵՏՄ անդամակցության էֆեկտ չէր սպասի, այլ պարզապես կհրաժարվեր անդամակցել մի մաքսային միության, որի հետ Հայաստանը չունի ընդհանուր սահման:
«Բա որ ասում էի», այսօր մտքում թերեւս ասել է Տիգրան Սարգսյանը: Իսկ նա իսկապես ասում էր, որ Հայաստանի տնտեսական ինտեգրացիայի հիմնական ուղղությունը պետք է լինի Եվրոպան, իսկ Մաքսային միությունը խնդիր է, քանի որ չկա ընդհանուր ցամաքային սահման: Երեւի Սերժ Սարգսյանն ուշադիր չի եղել Տիգրան Սարգսյանի հոդվածի հանդեպ: Կամ չի հավատացել Սարգսյանին, կասկածել է, որ նա այդպես ինչ որ ծուղակ է պատրաստում իր համար:
Իհարկե, Տիգրան Սարգսյանն էլ հետո հանկարծ դարձավ Եվրասիական միության ջատագով, իսկ այժմ արդեն «մեծ ղեկավար» է այդ միությունում, թեեւ չի բացառվում, որ նրան պարզապես այդպես պատժել են իր դիրքորոշման եւ հոդվածի համար, ասելով` դե հիմա եկ ու զբաղվիր այն գործով, որը համարում էիր սխալ եւ անհեռանկար: