Համազգային դիետա
Հասարակություն
Նոր տարվա նախաշեմին գրանցվող գնաճը սովորական երևույթ է դարձել, ինչպես որ սովորական են դրա դեմ պայքար ծավալելու, բայց արդյունքում ոչինչ չանելու խոստումները: Հիմա էլ պատկերը նույնն է և արդեն իսկ ունի քննադատողներ ու մեկնիչներ: Դրանց թվում է նաև ԱԺ ՀՀԿ խմբակցության պատգամավոր Սուքիաս Ավետիսյանը, ով շատ մտահոգված հայացքով ասում է. «Կարծում եմ, որ գների բարձրացումը շատերի կողմից ոչ միայն ապօրինի է, այլև՝ անշնորհքություն է: Առիթից օգտվելով՝ նոր տարվա կապակցությամբ գները բարձրացնում են, ձեռքերը տաքացնում են...»
Սովորաբար այդ «շատերը» երբեք անուն-ազգանուն ու հասցե չեն ունենում, նրանց մեղադրում են, սակայն չեն պատժում: Իսկ պատժելու անհրաժեշտություն կարծես թե չկա, քանի որ, համաձայն Ավետիսյանի դիտարկումների, մենք մեր էներգիան պիտի վատնենք ոչ թե գնաճը կասեցնելու վրա, այլ պիտի ազգովի անցում կատարենք «գոտիների ձգման» քաղաքականությանը: Այլ կերպ ասած, պիտի սկսենք չափի մեջ մնալ ու քիչ ծախսեր անել:
Հարցին, թե հատկապես ո՞ր ծախսերը կարևոր չեն, ինչի՞ վրա կարելի է տնտեսել, պատգամավորը պատասխանել է. «Ես կարծում եմ, որ մեր ազգաբնակչությունը լավ կլինի, որ ավելի ճիշտ սնվի, քիչ ծախսի հագուկապի վրա... Մեծ սեղանները, առատ սեղանները կարելի է չափի մեջ անել: Ունեցած միջոցները կարելի է արդյունավետ տեղաբաշխել»:
Անմիջապես նկատենք, որ սա իրոք հեղափոխական մոտեցում է: Իսկապես, ի՞նչ կարիք կա այդքան ուտելու, եթե կարելի է մի որոշ ժամանակ քաղցած մնալ և արդյունքում խոշոր խնայողություններ անել: Նույնը՝ հագուկապի հարցում: Հետո՞ ինչ, որ դրսում խորը ձմեռ է, կարող ենք բավարարվել նաև ամառային զգեստներով, փոխարենը մեզ կազատենք անտեղի ստրեսներից ու կունենանք մի երկիր, որտեղ դժգոհներ այլևս չեն լինի, որտեղ գնաճը չի ազդի մարդկանց կենսամակարդակի վրա, և որտեղ պատգամավորները Նոր տարին կդիմավորեն առանց գոտիների:
1
2
3
4
5
1
2
3
4
5
2
5
