19-ամյա հայուհին՝ ադրբեջանցիների հերթական հերոսուհի․ տեսանյութ

Ադրբեջանական այսպես կոչված« Հայ-ադրբեջանական խաղաղարարական հարթակին» հերթական հայն է միացել, գրում է ադրբեջանական քարոզչական լրատվամիջոց Haqqin.az-ը: Վահե Ավետյանին, Վահան Մարտիրոսյանին ու Սյուզաննա Ջաղինյանին այժմ միացել է Ստեփանակերտում ապրող ոմն ակտիվիստ, գրող 19-ամյա Լուսինե Ներսիսյանը: Ադրբեջանական կայքի հատուկ թղթակից համարվող Վահան Մարտիրոսյանի հարցին, թե ինչ վիճակ է այժմ Արցախում, Լուսինեն պատասխանել է. «Ցավոք, ոչ մի լավ բան ասել չեմ կարող: Ղարաբաղում տոտալ աղքատություն է, բացի այդ, մարդիկ ապրում են մշտական վախի ու ահաբեկչության մթնոլորտում: Թոշակներն ու աշխատավարձերն ահավոր ցածր են և ոչ մի կերպ չեն կարող ապահովել բնակչության՝ թեկուզև ամենատարրական կարիքները: Հասարակ ժողովուրդն իսկապես խղճուկ գոյություն է պահպանում, իսկ գործող իշխանությունն ամեն ինչ անում է, որ ժողովրդին վախի մեջ պահի»:
Անդրադառնալով իր ստեղծագործությունների մասին հարցին, Լուսինեն պատասխանել է. «Գրում եմ մանկուց, իմ պոեզիան ամեն ինչի մասին է: Կան հայրենասիրության մասին բանաստեղծություններ, որոնք ծնվել են այն անարդարությունից, որին բախվում ենք ես և ղարաբաղցիներն ամեն օր: Հայաստանում ու Ղարաբաղում ստեղծագործ մարդու համար ոչ մի հեռանկար չկա: Բացարձակապես: ԼՂ-ում արվեստն իջեցվել է ամենացածր մակարդակի վրա: Ղարաբաղում անգամ ժողովրդական համույթ չկա: Ամեն ինչ բարձիթողի է: Այստեղ, ինչպես և Հայաստանում, արվեստն իշխանություններին պետք չէ»:
Այնուհետև Վահանը հարց է տվել. «Ինչ կասեք այսպես կոչված ժամանակակից հայկական գրականության մասին, ասում են, թե այն հիմա դարձել է տարրական պոռնոգրաֆիա: Հենց այն գրողներն են աջակցություն ստանում Մշակույթի նախարարության ու Գրողների միության կողմից, ովքեր պոռնոգրաֆիա են գրում»: Զրուցակիցը պատասխանել է. «Լիովին համամիտ եմ, Հայաստանում և Ղարաբաղում այդպիսի «գրականությունը», ցավոք, մեծ պահանջարկ ունի ու միանշանակ տանում է դեգրադացիայի»:
Պատերազմի մասին հարցին էլ պատասխանել է. «Ես կտրականապես դեմ եմ պատերազմին, ինչպիսին էլ որ այն լինի: Իսկ ղարաբաղյան պատերազմը փաստացիորեն Հայաստանին դրդել է ուրիշի հողերի օկուպացիային ու դադարեցրել բոլոր ոլորտների զարգացումը: Տուժում են բոլորն, իսկ ամենաշատը՝ ժողովուրդը, որ հոգնել է պատերազմից: Ապրիլյան պատերազմն ապացուցեց, որ իշխանություններն իրենց ժողովրդին ուղարկում են կոտորածի՝ թնդանոթի միս դարձնելով»:

Լուսինե Ներսիսյանի ֆեյսբուքյան էջն այժմ ենթարկվում է հայ օգտատերերի զայրույթի ու վիրավորական խոսքերի տարափին: