Տիգրան Արզաքանցյանը միշտ եղել է բանակի կողքին. նա 15 մլն դոլար է հատկացրել

Այլ առիթով նշել եմ, որ հատկապես հետպատերազմական ժամանակաշրջանում չափազանց կարևոր է աշխարհասփյուռ մեր հայրենակիցների ներդրումն ու մասնակցությունը Հայաստանի և Արցախի ավերված տնտեսության և բանակի վերականգնման գործում։ Հատկապես այն հայերը, որոնք թե՛ դրսում, և թե՛ մեր երկրում կայացել են որպես հաջողակ բիզնեսմեններ, հասարակական-քաղաքական գործիչներ պետք է մեկտեղեն ջանքերը երկիրն այս աղետաբեր ընթացքից դուրս բերելու համար։ Իհարկե, դա չի լինի Նիկոլ Փաշինյանի իշխանության օրոք կամ նրա իշխանության հետ օբյեկտիվ պատճառով՝ Հայաստանն ու Արցախը այս օրվան են հասել բացառապես այդ մարդկանց ապաշնորհ և առանձին դրվագներում նաև հակապետական գործունեության արդյունքում։ Պարտված իշխանությունները պետք է հեռանան, որպեսզի հայ ժողովուրդը կարողանա շտկի իր մեջքը և առաջ նայի՝ զարգացնելով տնտեսությունը, հզորացնելով բանակը։ Ի դեպ, ինչ վերաբերում է բանակին։ 44-օրյա պատերազմի ընթացքում միլիոնավոր մեր հայրենակիցներ Հայաստան Համահայկական հիմնադրամին միլիոնավոր դոլարներ են փոխանցել, որոնք պետք է օգտագործվեին բանակի և զինվորի կարիքների համար։ Սակայն առ այսօր խնդրահարույց է այդ գումարների ծախսման ուղղություններն ու նպատակները։ Հիմնադրամի գումարների մի մասը փոխանցվել է Կառավարությանը ինչ-որ ծախսերի համար, որի իրավունքը չկար, մի մասն էլ հայտնի չէ, թե ինչ է եղել։ Ինչևէ, ներկայումս, առաջիկա քաղաքական գործընթացներին ընդառաջ, ոչ միայն Հայաստանում, այլև արտասահմանում աշխատող և կայացած գործարարներ և քաղաքական գործիչներ են հայտ ներկայացրել մասնակցելու սպասվող ընտրություններին։ Նման ցանկություն ունի ԱԺ նախկին պատգամավոր, գործարար Տիգրան Արզաքանցյանը։ Դեռ հայտնի չէ՝ Արզաքանցյանը կուսակցություն կհիմնադրի, թե՞ որևէ ուժի կսատարի, սակայն պատրաստակամ է իր ռեսուրսները, կապերն ու գիտելիքները ծառայեցնել մեր երկրին։ 

Ի դեպ, պարզվում է Արզաքանցյանը, մշտապես կարևորել է մարտունակ Զինված ուժեր ունենալը, հետևաբար մշտապես եղել է բանակի կողքին։ Դիցուք, 2008թ.-ին Տիգրան Արզաքանցյանը 15 մլն դոլար է հատկացրել բանակին։ Աջակցություն է ցուցաբերել նաև 44-օրյա պատերազմի ընթացքում։ Այդուհանդերձ, կարևոր է արձանագրել, որ պայթյունավտանգ տարածաշրջանում, որտեղ մենք ենք ապրում, պետք է լինենք միասնական, եթե շարունակենք բաժանարար գծեր քաշել սևերի ու սպիտակների, հների ու նորերի նորից հանգելու ենք նույն վիճակին՝ այս անգամ պետականության վերջնական կորստով։ 

Եվ վերջապես՝ մենք, որպես հավաքական ազգ, պետք է կարողանանք ի շահ մեր երկրի օգտագործել բոլոր այն կարող ուժերի և գործիչների ռեսուրսները, ովքեր հենց իրենք՝ կամովին ցանկանում են դա անել։

Արտակ Գալստյան