ՀԱԿ-ը խոստանում է կտրուկ բարձացնել կենսաթոշակները, նվազեցնել գազի սակագինն ու ներել գյուղացիների վարկերը

ՀԱԿ խմբակցության ղեկավար Լեւոն Զուրաբյանն այսօր ԱԺ ճեպազրույցների ժամանակ հայտարարեց. «Մենք ընտրություններում հաղթանակի դեպքում շեշտակի կբարձրացնենք կենսաթոշակները, 25 տոկոսով կնվազեցնենք գազի գինը, կանցկացնենք վարկային համաներում գյուղացիների համար եւ նրանց ուսերից կթոթափենք այն բեռը, որն այսօր անտանելի է դարձրել իրենց կյանքը: Մեզ կարող են ասել՝ ինչի՞ հաշվին ես դա անելու: Կասենք: Մենք հարկերն էլ ենք պարզեցնելու, հասցնելու ենք առնվազն այն մակարդակին, որ այսօր գոյություն ունի Վրաստանում: Պարզ հաշվարկի վրա կարվի, այսօր գործարարական կապիտալը ՀՀ-ից փախչում է, փախչում է նաեւ Վրաստան, որտեղ գործում են այդ պարզեցված հարկերը»: Նա վստահեցրեց, որ իրենց կատարած բարեփոխումների արդյունքում, որի մեջ մտնում է նաեւ մենաշնորհների վերացումը, ստվերի կրճատումը, իրենք շեշտակի կավելացնեն բյուջեի եկամուտները: Ըստ նրա, ստվերը կամովի դուրս կգա, ոչ թե վարչական ռեսուրսներով դա կարվի. «Կարեն Կարապետյանը Գյումրիում հայտարարեց, որ ՀՀ-ում մենաշնորհ չկա: Ես էլ կարող եմ հայտարարել, որ ՀՀ-ում չկա Կարեն Կարապետյանի կառավարություն, ինձ կհավատա՞ք, չեք հավատա: Բա ինչո՞ւ ես պետք է հավատամ նման տրյուկներին»: Իշխանությունների քայլը՝ արգահատելի դեմքերից, ըստ պարոն Զուրաբյանի, նրա համար է, որ ընտրությունները հորով-մորով անեն:

Հռիփսիմե ՋԵԲԵՋՅԱՆ, Aravot.am