Մեղրիի միջանցքում սահմանապահ, մաքսային և մյուս ծառայությունները մեկ այլ, թեկուզ բարեկամ երկրի զիջելն անթույլատրելի է, դրանով կկորցնենք մեր ինքնիշխանությունը. Գագիկ Աղաջանյան (տեսանյութ)
ՔաղաքականությունՊետք է ուսումնասիրել նախևառաջ Հայաստանի հարավով կառուցվելիք նոր ճանապարհի կամ միջանցքի տնտեսական արդյունավետությունը և նոր միայն քննարկել անվտանգության հարցը, բայց այդպիսի հաշվարկներ դեռևս չկան. թուրքական կողմը հայտարարել է, որ Մեղրիի միջանցքի առկայության դեպքում պատրաստ է Նախիջևանից Իգդիր, այնտեղից էլ դեպի Կարս երկաթգիծ կառուցել: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Ապավեն» ընկերության ղեկավար, գործարար Գագիկ Աղաջանյանը:
«Միակ տեղը, որտեղից Հայաստանը չի շրջանցվել, հարավն է, եթե Հայաստանը տա այդ միջանցքը, կշրջանցվենք նաև հարավից։ Հայաստանը ցանկացած դեպքում դեպի աշխարհ դուրս գալու համար պետք է դիմի հարևաններից մեկին, խնդրողի դերում ենք, փոխարենը ի՞նչ ենք առաջարկում՝ ոչինչ։ Հայաստանի համար կկիրառվի տարիֆային սանդղակի առավելագույն թիվը։ Միգուցե կա փաստաթուղթ կամ բանավոր պայմանավորվածություն Մեղրիի միջանցքի մասին, դա կլինի ազգային դավաճանություն»,- ասել է գործարարը:
Ըստ Աղաջանյանի՝ միջանցքի փոխարեն պետք է խոսել Մեղրիով ավտոմոբիլային կամ երկաթուղային ճանապարհի մասին, որի շահագործման իրավունքը կարելի է տալ նաև այլ երկրների. «Եթե սահմանապահ, մաքսային, ֆիտոսանիտարական ծառայությունները հանձնում ենք երրորդ կողմին, կորցնում ենք մեր ինքնիշխանությունը և վերահսկողությունը, դա անթույլատրելի է։ Ադրբեջանը բանակցում է միայն Մեղրիով միջանցք ստանալու հարցը, հօգուտ Հայաստանի ճանապարհների շրջափակման հարցը չի քննարկում։ Ադրբեջանի պրոպագանդան ուղղված է Մեղրիի միջանցքն ստանալուն, դա իրենց համար կենսական նշանակություն ունի, միակ խոչընդոտը մենք ենք»:
«Ապավեն» ընկերության ղեկավարի կարծիքով՝ Հայաստանը պետք է ստանա դրան համարժեք մեկ այլ ճանապարհ՝ ռազմաստրատեգիական նշանակությամբ. «Խոսքը դեռևս միայն երկաթուղով բեռնափոխադրումների մասին է, ո՛չ ուղևորափոխադրումների, ո՛չ էլ բեռնատար մեքենաների մասին խոսք չկա։ Թուրքիան Հայաստանից ներկրվող ապրանք պաշտոնապես չի ընդունում, մինչդեռ մեր արգելանքը բացարձակ չէ, այն վերաբերում է հիմնականում սննդամթերքին, իսկ թուրքական հումք և սարքավորումներ ներմուծվում են»:
Գագիկ Աղաջանյանի պնդմամբ՝ Հայաստանի տնտեսությունը չունի այնպիսի ապրանքներ կամ ծառայություններ, որոնց ներկրմամբ Ադրբեջանն ու Թուրքիան շահագրգիռ կլինեն. «Այդ երկրները սուբսիդավորում են գյուղատնտեսությունը, այդ ոլորտում մենք մրցունակ չենք։ Ի՞նչ այլ արտադրություն ունենք՝ մեքենաշինությո՞ւն, թե՞ մի այլ բան, որը կարող է հետաքրքրել մեր հարևաններին։ Տրանսպորտային ոլորտի ծառայություններ կարող էինք մատուցել, եթե Հայաստանը կարողանայինք դարձնել տարանցիկ երկիր, որի տարածքով անցնում են ապրանքներ։ Մենք Ադրբեջանի հետ չունենք այնպիսի տնտեսական ընդհանուր շահեր, որ անտեսեինք անվտանգության գործոնը»,- ամփոփել է «Ապավեն» ընկերության ղեկավարը:
1
2
3
4
5
1
3
5
1
3
5
