27-ի առավոտյան գնաց ու չվերադարձավ. 31-ամյա փոխգնդապետը պարգևատրվեց հետմահու
ՀասարակությունՄանվել Կարապետյանը զոհվեց սեպտեմբերի 28-ին՝ դիպուկահարի կրակոցից, երբ փորձում էր ընկերոջ դին իջեցնել դիրքից:
Համեստ, նվիրյալ, իսկական հայրենասեր ու լավ հրամանատար: Այսպես են բոլորը հայրենի Զույգաղբյուրում բնութագրում փոխգնդապետ Մանվել Կարապետյանին: Ծառայության 12 տարիները Թալիշում ու Մատաղիսում է անցկացրել: Մահկանացուն էլ հենց այդտեղ՝ Թալիշում, կնքեց սեպտեմբերի 28-ին՝ դիպուկահարի կրակոցից, երբ փորձում էր ընկերոջ դին իջեցնել դիրքից:
Գումարտակի հրամանատար, փոխգնդապետ Մանվել Կարապետյան. ծնվել է 1988 թվականին Շիրակի մարզի Զույգաղբյուր գյուղում։ ՀՀ ՊՆ Վազգեն Սարգսյանի անվան ռազմական համալսարանն ավարտելուց հետո 2009 թվականին ծառայության է անցել Մատաղիսում։ Մասնակցել է Ապրիլյան պատերազմին։
31-ամյա փոխգնդապետը, ծնողների խոսքով, ծնված էր հայրենիքի պաշտպան լինելու համար: «Համեստ էր շատ: Երբեք ցույց չէր տալիս, որ գումարտակի հրամանատար է, փոխգնդապետ: Ասում էի՝ որդի՛ս մեկ-մեկ զինվորական համազգեստով ու ուսադիրներով գյուղ արի: Փաթաթվում էր, ասում էր. «Պա՛, վերջացրու»: Նրա համար զինվորներն ամենակարևորն էին: Նրան իր զինվորների կողքից հետ չէին պահում նաև 3 ու 5-ամյա դուստրերը: Այնքան սիրեց Արցախի հողը, որ երիտասարդ կնոջն էլ իր հետ տարավ Արցախ»,-մեզ հետ ունեցած զրույցում հիշում է հայրը՝ Արծրուն Կարապետյանը:
Զինվորական Մանվելը դարձել է հոր առաջարկով, բայց նույնիսկ նա չէր կարող պատկերացնել, որ որդու մեջ հայրենասիրական ոգին այդքան մեծ է: «Ասում էր՝ պա՛, հետ դարձի ճանապարհ չկա»: Թալիշը հրամանատարն այնքան է սիրել, որ Հայաստան տեղափոխվելու հնարավորությունից հրաժարվել է: «Շատ առաջարկներ է ունեցել, բայց ասում էր՝ իսկական զինվորը պետք է Արցախում լինի»,-ասում է հայրը:
«Մանվելը շատ հարգված մարդ էր, ես հպարտ էի, որ իր նման մարդ կա իմ կողքին»,- նշում է Մանվել Կարապետյանի այրին՝ Վիկտորյա Հովհաննիսյանը:
Ամուսնացել են 2014 թվականի նոյեմբերին, հարսանիքից մեկ ամիս անց տեղափոխվել են Թալիշ, որտեղ Մանվելն արդեն 5 տարի ծառայում էր։
«Միասին այնտեղ ապրել ենք մինչև քառօրյա պատերազմը (2016-ի ապրիլ-խմբ.): Այդ ժամանակ մեծ աղջիկս ծնվել էր, նրա հետ եկա Հայաստան, սակայն 8 ամիս անց կրկին տեղափոխվեցինք Արցախ, բայց արդեն Մատաղիս: 2018 թվականին էլ ծնվեց մեր երկրորդ բալիկը:
Ամսի 27-ի առավոտյան արագ-արագ հագնվեց ու գնաց: Գնաց այնպիսի արագությամբ, որ ոչ ինձ, ոչ երեխեքին հաջող չարեց»,-պատմում է կինը:
Վիկտորյան երեխաների հետ պատահական մեքենայով եկավ Հայաստան: «Մի կերպ ենք փրկվել, որովհետև մեր նկուղում եղած ժամանակ արդեն 20 հոգանոց ջոկատը մտած է եղել Մատաղիս։ Եթե 10-20 րոպե ուշ դուրս գայինք այնտեղից, ապա հենց նկուղում մեզ էլ կսպանեին»,-ասում է Վիկտորյան:
ԼՂՀ նախագահի հրամանագրով՝ Արցախի հանրապետության պետական սահմանը պաշտպանելիս ցուցաբերած բացառիկ քաջության ու արիության համար Արցախի հանրապետության պաշտպանության բանակի N զորամասի երրորդ հրաձգային գումարտակի հրամանատար փոխգնդապետ Մանվել Կարապետյանը հետմահու արժանացել է «Մարտական խաչ» առաջին աստիճանի շքանշանի:
1
2
3
4
5
1
2
3
4
5
2
