Նիկոլ Փաշինյանը կրկին խոսեց ՍՈւ-երի մասին՝ մեկնաբանելով իր երկու հայտնի հայտարարությունները

Վարչապետ Նիկոլ Փաշինյանն ԱԺ-կառավարություն հարց ու պատասխանի ժամանակ անդրադարձավ իր երկու հայտարարություններին, որոնք շրջանառվում են սոցիալական ցանցերում։ ԱԺ փոխխոսնակ Ալեն Սիմոնյանը նշեց, որ 2020թ. հուլիսի 3-ին վարչապետ Նիկոլ Փաշինյանը Ֆեյսբուքի իր էջում կատարել էր հետևյալ գրառումը. «Մեր Սու30CM-ները երեկ «մարտական խոցումով» առաջին վարժական թռիչքներն են իրականացրել, փորձարկելով երկինք-երկիր հրթիռներ՝ «գրոհային գործողության» համար։ Բոլոր թիրախները խոցվել են բարձր ճշգրտությամբ»։ Սոցցանցերում հայտարարությունը համադրվում է վերջերս արված այն հայտարարության հետ, որ «այո, մենք ինքնաթիռն առել ենք, բայց հրթիռները չենք հասցրել ձեռք բերել մինչև պատերազմը»։

Նիկոլ Փաշինյանն ասաց, որ այս երկու հայտարարությունների մեջ ոչ մի հակասություն չկա։

«Նախ արձագանքենք, որ Սու30CM ինքնաթիռները գեժամանակակից հզոր զենք են։ Բայց այդ զենքը  իր ամբողջության մեջ է իր հրթիռներով և սարքավորումներով։ Եվ կարծում եմ՝ ակնհայտ է, որ ինքնաթիռի և հրթիռների արտադրողները նույն սուբյեկտները չեն, այսինքն նուն տեղում չէ արտադրվում։ Հետևաբար, դրանք ոչ թե ամբողջական է ձեռք բերվում, այլ հատվածական՝ տարբեր սուբյեկտներից։ Սու30CM ինքնաթիռները Հայաստան են եկել 2020 թվականի մայիսին, և այո, իրականացրել են վարժական թռիչքներ և օգտագործել են հրթիռներ, որոնք նախկինում Հայաստանի զինանոցում եղած են եղել։ Կոնկրետ ռազմական իրավիճակում նրանց օգտագործման կամ չօգտագործման վերաբերյալ որոշումները կայացվել են ըստ այդմ, թե եղած սպառազինությունն ինչքանով են հնարավորություն տալիս, որպեսզի այդ ինքնաթիռները կատարեն իրենց առաջ դրված մարտական խնդիրները»,- ասաց Փաշինյանը։