Արտակարգ դեպք․ բժիշկների ներարկումից հետո շտապօգնություն դիմած քաղաքացին մահացել է

News.am

Վայոց Ձորի Ջերմուկ քաղաքում նոյմբերի 3-ին շտապօգնություն կանչած քաղաքացուն բժիշկները դեղ են ներարկել, որից հետո քաղաքացին գիտակցությունը կորցրել է եւ մահացել: Ինչպես NEWS.am-ին տեղեկացրին ՀՀ քննչական կոմիտեի մամուլի ծառայությունից, քաղաքացուն մի շարք ներարկումներ են կատարվել, հաշվի չի առնվել նրա ալերգիկ լինելու հանգամանքը, որի արդյուքնում քաղաքացին գիտակցությունը կորցրել է եւ մահացել: Նոյեմբերի 7-ին Վայոց Ձորի մարզային քննչական վարչությունում քրեական գործ է հարուցվել՝ ՔՕ 130-րդ հոդվածի 2-րդ մասով՝ Բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը: Նշանակվել է դիակի դատաբժշկական փորձաքննություն, որի եզրակացությունը դեռ չի ստացվել:

Ըստ shamshyan.com-ի՝ նոյեմբերի 3-ին «Ջերմուկ» բժշկական կենտրոն ահազանգ է ստացվել, որ Գ. Գրիգորյանի ինքնազգացողությունը վատացել է եւ անհրաժեշտ է շտապօգնության բժիշկների օգնությունը։ Նշված հասցե են ժամանում շտապօգնության բժիշկներ Արտակ Գեւորգյանն ու Նվարդ Հակոբյանը, ովքեր օգնություն են ցուցաբերել Գ. Գրիգորյանին եւ, ըստ նախնական տեղեկությունների, իրենց մասնագիտական պարտականությունները կատարել են անփույթ եւ անբարեխիղճ. հաշվի չեն առել անգամ այն հանգամանքը, որ Գ. Գրիգորյանը նրանց հայտնել է, որ ինքը ալերգիկ է եւ խնդրել է, որպեսզի իրենց չներարկեն։ Սակայն, բժիկները հաշվի չեն առել այդ հանգամանքը եւ կատարել են մի շարք ներարկումներ, ինչի արդյունքում էլ Գ. Գրիգորյանը կորցրել է գիտակցությունը եւ մահացել։ Բժիշկներ Ա. Գեւորգյանն ու Ն. Հակոբյանը ստորագրությամբ բաց են թողնվել։ ՀԿԳ ավագ քննիչ Ա. Գեւորգյանի որոշմամբ նշանակվել են մի շարք փորձաքննություններ, այդ թվում՝ դիակի դատաբժշկական։