«Զգեստս հատուկ այդ օրվա համար էր կարված». Էլեն Ազնավուրյանի և սիրելիի կազմակերպած խնջույքը անակնկալ նշանադրությունից մեկուկես ամիս անց

Դերասանուհի Էլեն Ազնավուրյանի համար 2021 թվականի տարեմուտը հիշարժան է եղել: 2 տարի ընկերություն անելուց հետո Էլենի սիրելին՝ Բորիսը, Ամանորի գիշերը նրա համար անակնկալ նշանադրություն էր կազմակերպել: Զույգը եկեղեցում նշանադրվել էր, ստացել Աստծո օրհնությունը, բայց խնջույք չէր ունեցել:

Փետրվարի 14-ին Էլենն ու Բորիսը խնջույք են կազմակերպել նշանդրեքի առթիվ։ Tert.am Life-ի հետ զրույցում դերասանուհին պատմել է նշանադրության մանրամասները և ասել, որ ի սկզբանե իրենց հարաբերությունները շատ լուրջ են եղել, նշանվելուց հետո առանձնապես ոչինչ չի փոխվել:

«Ամանորի գիշերը Սուրբ Մարիամ Աստվածածին եկեղեցի էինք գնացել պատարագին մասնակցելու, սիրելիս անակնկալ մատուցեց ու եկեղեցում նշանադրության արարողություն եղավ: Բոլորը տեղյակ էին բացի ինձնից, ես միայն գիտեի, որ որոշելու ենք մեր նշանադրության օրը, մտքովս չէր անցնում, որ կնշանվենք: Իսկապես չէի սպասում, երբ քահանան՝ Տեր Զաքարիան, հարցրեց՝ պատրա՞ստ եմ դառնալ Բորիսի կինը, հուզմունքից ձախ ձեռքս մեկնեցի՝ մտածելով, որ ամուսնանում ենք: Շոկի մեջ էի, այդ ապրումներից մի քանի ժամ ուշքի չէի գալիս»,- ասաց նա և հավելեց, որ մատանին նշանածի մայրն էր ընտրել, բայց լրիվ իր սրտով է։

Էլենի խոսքով՝ որոշել են փետրվարի 14-ին իրենց հարազատների հետ հավաքվել և նշել առիթը։ «Այդ օրն այնքան լարված էի, որ գրեթե ոչինչ չկերա: Մատանի դնելու արարողություն այլևս չեղավ, ուղղակի հետաքրքիր օր ունեցանք: Ամեն ինչ ես էի կազմակերպել, տորթի ձևը, ոճն ինքս էի ընտրել, ես արագ կողմնորոշվում եմ, թե ինձ ինչ է պետք, բայց հետո տնտղում եմ՝ արժե՞, թե՞ ոչ: Հետաքրքիր է, որ երկար մտածելուց հետո հասկանում եմ՝ ճիշտ էի որոշել: Զգեստս ևս ես եմ ընտրել, հատուկ այդ օրվա համար էր կարված, սկզբում լրիվ այլ զգեստ էի ընտրել, բայց մտափոխվեցի: Ամեն ինչ շատ լավ անցավ, արտերկրից անսպասելի հյուրեր ունեցանք: Ծրագրում ենք այս տարի ամուսնանալ, բայց հարսանիքի օրը դեռ չենք որոշել»,- նշեց նա:

Էլենն ու Բորիսը ծանոթացել են 2 տարի առաջ իրենց ընդհանուր ընկերների միջոցով:

«Բորիսն ինձ դրանից մի քանի ամիս առաջ էր տեսել, որպես դերասանուհի ճանաչում էր: Նա անընդհատ ընդհանուր ընկերներ է փնտրել, որպեսզի մեզ ծանոթացնեն, բայց ասում էր՝ իբր պատահական է ամեն ինչ ստացվել։ Իրականում Բորիսի՝ իմ կյանքում հայտնվելուց հետո շատ բան է փոխվել, հիմա որոշումներ կայացնելու հարցում ավելի հասուն եմ: Նախկինում ազատ ժամանակս անկարևոր բաների վրա էի ծախսում, հիմա ավելի ճիշտ եմ հաշվարկում, ինչ-որ քայլ անելուց առաջ ավելի լուրջ եմ մտածում: Բորիսը չափազանց բարի է, թեև կողքից մտածում են՝ գոռոզ է, ինձ շատ է սիրում: Բորիսի մեջ առաջինն ինձ անմիջականությունը գրավեց, բայց սկզբում շատ պաշտոնական էր ինձ հետ շփվում: Ուղղակի զգացի, որ նա է այն միակը, ամեն ինչ անսպասելի եղավ»,- ընդգծեց Էլենը:

Դերասանուհին շեշտեց, որ սերն իր համար պարզությունը, ազնվությունն ու միմյանց հասկանալն է:

«Մեր շփման սկզբնական շրջանում վեճերն ավելի շատ էին, հիմա շատ բան է փոխվել: Որքան շատ ենք շփվում, այնքան միմյանց ավելի լավ ենք ճանաչում, վստահությունն ավելի է մեծանում, վեճերը քչանում են: Առաջինը Բորիսն է հաշտության քայլ է անում, չի թողնում, որ երկար նեղացած մնամ, մեր նեղանալը տևում է մաքսիմում կես ժամ»,- ասաց նա։

Էլենը նկատեց, որ միմյանց հաճախ են անակնկալներ մատուցում. «Այդ առումով շատ նման ենք: Այս պահին ինձ համար ամենալավ անակնկալն այն է, երբ Բորիսը Երևան է գալիս, ինձ նախապես չի ասում, որպեսզի անսպասելի լինի: Բորիսն ատամնաբույժ է, այս պահին Ստեփանավանում է աշխատում, հաճախ չենք տեսնվում: Ճիշտ է, բարդ է, բայց, փառք Աստծո, կան զույգեր, որոնք հազարավոր կիլոմետրերով հեռու են, բայց կարողանում են հարաբերությունները պահպանել: Մենք միմյանցից հեռու ենք ընդամենը 2 ժամով, պետք է գնահատել, ինչ ունես»:

Լուսանկարները՝ Միլ Հովսեփյանի