Ազգուտակով՝ պաշտոնյա. Աբրահամյան եղբայրները

«Հրապարակ»-ը գրում է

«Ազգուտակով՝ պաշտոնյա» շարքի հաջորդ հերոսը Աբրահամյան եղբայրներն են: Արա Աբրահամյանը Ռուսաստանի հայերի միության նախագահն է, ցանկանում էր մտնել քաղաքականություն, մասնակցել ընտրություններին, սակայն հետ կանգնեց այդ մտքից: «Պատրաստվում էի մասնակցել, սակայն խնդիրներ առաջացան, երկար բացակայեցի՝ մոտ 7 ամիս, հիմա էլ կան մի քիչ անձնական խնդիրներ, պետք է նորից բացակայեմ: Ես հիմա մեկնելու եմ և վերադառնալու են մարտի կեսերին: Ես որոշում եմ կայացրել չմասնակցել ընտրություններին»,-վերջին ասուլիսում հայտարարեց Արա Աբրահամյանը:

Ընտանիքը

Նա ծնվել է Մալիշկա գյուղում՝ մեծ ընտանիքում՝ բաղկացած վեց երեխաներից, ունի չորս եղբայր և մեկ քույր: Մայրը Պայծառ Աբրահամյանն է, հայրն էլ Արշավիր Աբրահամյանը, չորս եղբայրներ են՝ Ալեքսանդր, Սերգեյ, Գագիկ, Արմեն, քույրն էլ՝ Կարինեն: Արա Աբրահամյանի կինը Նատալյա Աբրահամյանն է, ունի երեք երեխա՝ Յուլյա, Վլադիսլավ, Աննա: «Ես կերազեի ռուսերեն լավ իմանալ, բայց չկարողացա, ցավոք: Մարդիկ ուսուցիչ են վարձում, որ սովորեն, ես ամուսնացա ռուս աղջկա հետ, որ սովորեմ, բայց չկարողացա...»,- նշել է Արա Աբրահամյանը: Յուլյան 28 տարեկան է, ապրում է ԱՄՆ-ում, նա երգչուհի է, անգամ տեսահոլովակ ունի՝ բավականին «սադրիչ» էպիզոդներով: Նրա քույրը ընդամենը 17 տարեկան է, անունը Աննա է: Արա Աբրահամյանը ունի նաեւ որդի՝ Վլադիսլավ, ով 23 տարեկան է:

Եղբայրներն ու քույրը

Աբրահամյանի երեք եղբայրներն էլ միևնույն ժամանակ պատգամավորական գործունեություն են ծավալել, սակայն տարբեր խմբակցություններում: Գագիկ Աբրահամյանը (Բռլյանտի Գագո) Արա Աբրահամյանի ՀՀԿ-ական եղբայրն է: Վերջինս նախկին պատգամավոր է, ով խորհրդարանում էր հայտնվել ՀՀԿ-ի համամասնական ցուցակով` 2007թ. խորհրդարանական ընտրություններից հետո: Մինչ այդ նա 1990-1995թթ. եղել է Գերագույն խորհրդի պատգամավոր, ապա 1995-1999թ. Ազգային ժողովի պատգամավոր: Նա «Ջեյ Սի էյ» ալմաստի գործարանի տնօրենների խորհրդի նախագահն է, այստեղից էլ առաջացել է նրա մականունը՝ «Բռլյանտի Գագո»: Շատ է խոսվում երկու վարչապետների՝ «Հաղթանակ» զբոսայգու դիմացի նախկին ծառաշատ այգում կառուցված դղյակների մասին: Այդ այգում, թերևս, անհամեմատ ամենամեծ տարածքն ու շքեղ դղյակը պատկանում է Գագիկ Աբրահամյանին: Վերջինիս պատկանում է մոտ 17 հազար հա տարածք, դա ավելին է, քան բոլոր վարչապետների ու մյուս հարևաններինը միասին վերցրած: 

Աբրահամյանի մյուս եղբայրը` Սերյոժան, 2007թ. Ազգային ժողովի պատգամավոր էր ընտրվել համամասնական ընտրակարգով «Օրինաց երկիր» կուսակցությունից: Մինչ այդ` 2003-2007թ. նա պատգամավոր էր ընտրվել թիվ 54 ընտրատարածքից և խմբակցություններում ընդգրկված չի եղել: 2007թ. պատգամավոր էր նաև Աբրահամյանի մյուս եղբայրը` Արմեն Աբրահամյանը, ով պատգամավոր էր դարձել ԲՀԿ համամասնական ցուցակով:

Մամուլը գրել էր, որ նրա երեք եղբորորդիներն ու երեք քրոջ որդիները չեն ծառայել բանակում՝ հիվանդ լինելու պատճառով: Արմավիրում ապրող Արա Աբրահամյանի քույրը՝ Կարինե Աբրահամյանը ունի երեք որդի՝ Վարդան, Կարեն, Նարեկ, ոչ մեկ չեն ծառայել բանակում, սակայն Նարեկը աշխատանքի էր ընդունվել Ազգային անվտանգության խորհուրդում: Վարդանը ամուսնացած է Ստեփան Դեմիրճյանի դստեր՝ Լուսինեի հետ: Կարինե Աբրահամյանի ամուսինը՝ Սարգիս Խաչատրյանը «Արմավիրի» հիվանդանոցի գլխավոր տնօրենն է: Աբրահամյան Գագիկը ունի մեկ տղա Արամ անունով, որը չի ծառայել բանակում: Աբրահամյան Սերգեյի որդին՝ Արշավիրը նույնպես չի ծառայել բանակում: Մամուլը գրել էր նաեւ, որ Աբրահամյանները ջանք ու եռանդ չեն խնայում Արմեն Աբրահամյանի որդուն՝ Աբրահամին եւս բանակից ազատելու համար:

Նշենք, որ Աբրահամյաններին միջին օղակի պաշտոնները չեն հետաքրքրում, իսկ իրենց ազգականներին հիմնականում տեղավորում են իրենց պատկանող բազմաթիվ ընկերություններում:

Նյութի աղբյուրը ` http://hraparak.am/?p=130902&l=am/