Կապիշոնով, կասկածելի դեմքով տատիկներ երրորդմասցի Լյովիկի սպանության գործով
Հասարակություն
Էրեբունի եւ Նուբարաշեն վարչական շրջանների ընդհանուր իրավասության դատարանում այսօր շարունակվեց քրեական հեղինակություն Երրորդմասցի Լյովիկի եւ նրա երկու ընկերոջ սպանության գործով հերթական դատական նիստը:
Դատարանը՝ դատավոր Արտուշ Գաբրիելյանի նախագահությամբ, շարունակեց ուսումնասիրել դեպքի օրը գործով երեք ամբաստանյալի շարժը «արձանագրած» տեսագրությունները: Խոսքը վերաբերում է Էրեբունի վարչական շրջանում գտնվող տարբեր օբյեկտներից առգրավված տեսախցիկների արձանագրություններին: Դրանք հետազոտվեցին դատական նիստերի քարտուղարուհու համակարգչով: Գործով ամբաստանյալներին տեսագրություններում ոչ միայն «չհայտնաբերեց» պաշտպանական կողմը, այլ նաեւ գործով մեղադրող դատախազները:
Մասնավորապես, զննության արձանագրություններն ուսումնասիրելիս դատախազը նախ նշում էր, թե որ տեսանյութի որ րոպեում են երեւում երեք անձը եւ նրանց տեղափոխած տաքսի ավտոմեքենան, սակայն դատարանում հրապարակված տեսանյութերից որեւէ բան հասկանալի չէր: Մեկ ժամից ավելի տեւած զննությամբ` որեւէ դրվագում չերեւացին երեք «կապիշոնով» երիտասարդը, առավել եւս` ամբաստանյալներ Գաստիկը, Ծըգլը եւ Տլեն: Այսինքն՝ քննիչն արձանագրության մեջ նշել էր, որ, ասենք, տվյալ տեսանյութում այսինչ ժամին, այսինչ րոպեին երեք անձ մոտենում են ցայտաղբյուրին, այդ երեք անձը Գաստիկը, Ծգըլն ու Տլեն են:
Բայց տեսանյութի դիտման ընթացքում քննիչի նշած ժամին ու րոպեին երեք անձը ցայտաղբյուրին չեն մոտենում: Անցուդարձ անողները շատ են, բայց ցայտաղբյուրին մոտեցողներ՝ ոչ: Այս կապակցությամբ ամբաստանյալների պաշտպան Լուսինե Սահակյանը դատարանին խնդրեց արձանագրել, որ զննության արձանագրությունն իրականությանը չի համապատասխանում: ««Կապիշոնով» կասկածելի դեմքով տատիկներ անցան»,- զննության աձանագրությունն ուսումնասիրելիս կատակում էր պաշտպանական կողմը:
Տեսանյութերի ուսումնասիրությունը նյարդայնացնում էր գործով ամբաստանյալներին եւ դահլիճում ներկա գտնվող անձանց, քանի որ դրանցում գործին վերաբերող որեւէ հանգամանք, ըստ էության, ի հայտ չեկավ: Այս կապակցությամբ նիստը նախագահող դատավոր Արտուշ Գաբրիելյանը նկատողություն արեց ամբաստանյալներից Սարգիս Գրիգորյանին՝ Ծըգլին, ասելով. «Ինչո՞ւ եք շտապում, ինչի՞ց եք ուշանում, մեկ է ՝ գնալու եք, խցում նստեք, հեն ա` էստեղ նստած եք, գոնե դատարանում օդը մաքուր է»: Ինչին ի պատասխան Ծըգլն արձագանքեց. «Սենց բաներ տեսնում՝ ներվայնանում եմ: Նստած նայում ենք, թե ով ինչ առեւտուր արեց», իսկ Գաստիկն էլ ասաց. «Ձեզ հարգում եմ (նկատի ունի դատավորին,-հեղ.), դրա համար եմ եկել, թե չէ՝ չէի գա»: Դատարանում իր վրդովմունքն արտահայտեց նաեւ Գաստիկի քեռին եւ դուրս եկավ դատարանի դահլիճից, ինչից հետո դատավորը հորդորեց նիստերին նյարդայնացող անձանց՝ չգալ դատերին: «Ինձնից շատ, հաստատ, ոչ մեկ չի ներվայնանում»,- նշեց նա:
Տեսագրություններ կային, որոնց տեւողությունն ավելի քան մեկ ժամ էր եւ քննիչը չէր նշել, թե որ րոպեին է արձանագրվել երեք ամբաստանյալների շարժը: Սա պատճառ դարձավ, որ մեղադրող դատախազ Արամյանը եւս մեկ անգամ միջնորդի հետաձգել նիստը, որպեսզի մեղադրանքի կողմը դիտի հետազոտելի տեսանյութերը, համեմատի քննիչի կազմած զննության արձանագրության հետ: Այս միջնորդությանն ի պատասխան ամբաստանյալների պաշտպան Լուսինե Սահակյանը խնդրեց չհետաձգել դատական նիստը, ապա դժգոհեց.
«Նախ եւ առաջ հիշեցնեմ, որ մեղադրող դատախազը պետք է հսկողություն իրականացներ գործի նկատմամբ, ավելին մեղադրանքը պաշտպանելիս պետք է ծանոթ լիներ ապացույցներին: Արդեն երրորդ դատական նիստն ենք հետաձգում այն պատճառով, որ մեղադրողները պետք է տեսանյութերի րոպեները բերեն, մեզ ցույց տան, թե ինչ է կատարվում: Ամեն դատական նիստին գալիս ենք, բացում ենք տեսանյութը, պարզվում է՝ մի բան էն չի, ու նիստը հետաձգում ենք: Հիմա ի՞նչն է խնդիրը՝ ֆայլերը կան, րոպեները նշված են, նայենք՝ քննիչի արձանագրած երեք անձը տվյալ րոպեին անցնո՞ւմ են, թե՞ չեն անցնում, զննության արձանագրությունը տեսանյութին համապատասխանո՞ւմ է, թե՞ չէ: Նիստերի անընդհատ հետաձգելն ինչի՞ համար է: Եթե ֆայլի մեջ րոպե գրված չլիներ, մեղադրողի միջնորդությունը տրամաբանական կլիներ, բայց եթե տեսնում ենք, որ զննության արձանագրությունն իրականությանը չի համապատասխանում՝ մեղադրողն ումի՞ց՝ ի՞նչ է պարզելու:
Չմոռանանք, որ վերջին հաշվով ամբաստանյալներն անազատության մեջ են գտնվում: Դուք էլ, հարգելի դատարան, անընդհատ նայում եք իրենց, ասում եք՝ մի՛ խոսացեք, մի՛ շնչեք, մի՛ արտաշնչեք: Դուք պետք է հասկանաք, որ իրենք էլ մարդ են ու գտնվում են անազատության մեջ՝ այս ապացույցներով: Նստած նայում ենք ու գուշակում ենք՝ էն ի՞նչ շողք անցավ, էն Գաստի՞կն էր, թե՞ չէ, էն Ծգը՞լն էր, թե՞ չէ: Եւ էս ապացույցներով էս մարդիկ էսքան ժամանակ անազատության մեջ են: Հետաձգումներն ամբաստանյալների հաշվին են, որովհետեւ մենք ազատության մեջ ենք, իրենք են տուժում»: Թեեւ պաշտպանն առարկեց մեղադրողի միջնորդության դեմ՝ այնուամենայնիվ, դատարանը բավարարեց այն՝ եւս մեկ «շանս» տալով մեղադրող դատախազին:
Այսպիսով՝ դատական նիստը հետաձգվեց. սույն գործով հաջորդ դատական նիստը տեղի կունենա դեկտեմբերի 6-ին, ժամը 12:00-ին:
1
2
3
4
5
1
2
3
4
5
2
5
