Պուտինի հույսը. նոր գործիք Արցախի հարցում

ՌԴ նախագահ Պուտինը ասել է, թե հույս ունի, որ շուտով չի օգտագործվի «Լեռնային Ղարաբաղի հակամարտություն» արտահայտությունը եւ հնարավոր կլինի անցնել այլ խնդիրների, որոնց մեկն արդիական է՝ մարդասիրական հարցեր:

«Հակամարտություն» արտահայտությունը այլեւս չի լինի, որովհետեւ փոխվել է իրադրության տրամաբանությունը եւ Արցախն այլեւս Ռուսաստանի ներքո՞ է։ Հետեւաբար հարց է առաջանում՝ ու՞մ հետ պետք է լինի Բաքուն «հակամարտության» մեջ՝ Ռուսաստանի՞, Արցախում այլեւս ռուսական ռազմական ներկայության պայմաններում: Հետեւաբար,կա ռուսական ներկայություն, ուրեմն չկա հակամարտություն, ըստ Պուտինի:

Մոսկվան գործի է դնում մարդասիրական բաղադրիչը, ոչ միայն եղած օբյեկտիվ խնդիրների, այդ դրա շնորհիվ նաեւ թերեւս քաղաքական հարցերի լուծման համատեքստում: Արդյոք խոսքը կարող է վերաբերել այն տարածքներին, որոնք ըստ համաձայնության պետք է անցնեն Ադրբեջանի վերահսկողության ներքո, բայց ըստ մարդասիրության պահանջում են բոլորովին այլ տրամաբանությամբ լուծումներ:

Միաժամանակ, ՌԴ արտգործնախարար Լավրովը հայտարարել է, որ ՌԴ-ն աշխատում է Արցախ միջազգային մարդասիրական կազմակերպություններ ներգրավելու ուղղությամբ:

Այստեղ առանցքային է դառնում այն, թե մարդասիրության բաղադրիչը որքան է շոշափելու Արցախի հարավը, մասնավորապես Հադրութի շրջանը, որն ամենեւին «5+2» փաթեթի շրջանակից չէ: Չէ՞ որ դա արդեն հակամարտություն է: Թե՞ մարդասիրություն: Այստեղ գուցե շատ բան կախված է նաեւ նրանից, թե Հադրութի խնդիրը որքան արդյունավետ կբարձրացնեն շրջանի տեղահանված բնակչությունը եւ նրանց աջակցության պատրաստակամություն հայտնած Մինսկի խմբի մյուս երկու համանախագահ երկրները:

Ավելին...