Նոր Տարվա մասին. նշել, թե՞ չնշել

2020 թ-ի սեմպտեմբերի 27-ից Լեռնային Ղարաբաղում պատերազմ է. պատերազմ իր բոլոր ծանր հետևանքներով, թե՛ մարդկային կյանքերի գնով, թե՛ ֆինանսական ճգնաժամի, թե՛ հոգեբանական սթրեսի:

Մարդիկ սիրտ չունեն ուրախանալու, տոնելու, մինչև անգամ ապրելու:

Այս ամենից է բխում նաև վերջին շրջանում համացանցում լայն տարածում գտած #նորտարվասիրտչկա ֆլեշմոբը: Մարդիկ անդադար տարածում և միանում են ֆլոշմոբին՝ վերջինիս նպատակը համարելով Նոր Տարվա վրա ծախսվող գումարների փոխանցումը հիմնադրամին և զոհված քաջորդիների հիշատակի չանարգումը:

Եկեք հասկանանք.

Հասարակական տեսանկյունից...

1000-ից ավելի զոհված հայորդիների ցավը բոլորինս է, պատերազմի ցավը բոլորինս է, կորուստը բոլորինս է...

1000-ից ավելի զոհերի համար սգում ենք բոլորս, նրանց հիշատակը հարգում ենք բոլորս, մեզ ամեն տեսակի փոքր ուրախություններից զրկում ենք բոլորս, և վերջապես բոլորս էլ ունենք հայր, եղբայր, որդի, ամուսին և սիրած անձնավորություն սահմանին, բայց...

Նոր Տարի չնշելով ոչ ոքի չենք օգնի և չենք անարգի:

ՀՀ-ում շատ ու շատ ընտանիքներ ամանորը դիմավորում են 50-100.000 դրամի սահմաններում, շատ ու շատ ընտանինքների երեխաներ միայն այդ օրերին են «շոկոլադ ուտում» կամ որևէ տոնակատարության մասնակցում (ցավալի է, բայց՝ փաստ), և վերջապես այս ամենից զատ, շատ ու շատ ընտանիքներում այս Նոր Տարին նոր կյանքի սկիզբ կարող է դառնալ:

Երբ մեր հայրերը, եղբայրները, ամուսիններն ու զավակները հաղթանակած տուն վերադառնան, ոչ ոք չի ունենա որևէ բարոյական կամ իրավական իրավունք արգելել նրանց ու նրանց ընտանիքներին նշել այդ հաղթանակը:

1000-ից ավելը զոհվել է. 100.000-ից ավելը հաղթանակը սրտում հետ է գալու...

Տնտեսական տեսանկյունից կարճ ...

Գաղտնիք չէ, որ Նոր Տարվա օրերին խանութները եռում են մարդկանց հոսքից, գաղտնիք չէ, որ այդ օրերին գրանցվում է ամենաշատ առևտուրը:

Հետևություն. ավելի շատ է վճարվում հարկ, ավելի շատ մուտք է լինում պետական բյուջե... ավելի շատ գումար է տնտեսում պետությունը, գրանցվում է տնտեսական աճ (թեկուզ չնչին):

Ի՞նչ անել...

1000-ից ավելի զոհերի հիշատակը հարգելու համար և հիմնադրամին աջակցելու համար կարելի է պարզապես՝

1. Երևանի կենտրոնում չկանգնեցնել 70.000.000 արժողությամբ տոնածառ և այդ գումարը փոխանցել հիմնադրամին

2. Ռեստորաններում միլիոնավոր գումարների զարդարանքեր, հրավառություններ անելու փոխարեն այդ գումարը փոխանցել հիմնադրամին (մի տարի էլ նշեք տանը)

3. 50-200.000 դրամանոց տոնածառ զարդարելու փոխարեն այդ գումարը փոխանցել հիմնադրամին

4. Սեղանին ամենաթանկարժեք ուտեստները դնելու փոխարեն (հարևաններին զարմացնելու համար) այդ գումարը փոխանցել հիմնադրամին

5. Միայն Երևանի  համար 325.000.000 դրամ ծախսելու փոխարեն (ինչպես դա եղավ 2020 մուտք գործելիս) այդ գումարը փոխանցել հիմնադրամին

... կամ մեր զոհված զինվորների ընտանիքներին:

#նորտարվասիրտչկա ֆլեշմոբի հեղինակներին և տարածողներին կխնդրեմ չազդել մարդկանց հոգեբանության վրա և չտրամադրել նրան, որ Նոր Տարի նշելով նրանք անարգում են մեր զոհված զինվորների հիշատակը և կամ դրա փոխարեն պետք է գումարները փոխանցել հիմնադրամին (նշել, թե ո՛չ՝ յուրաքանչյուրի անհատական իրավունքն ու կամքն է:)

Նոր Տարին պետք է նշել, քանի որ սա կարող է լինել մեր հաղթանակի Նոր Տարին, անկախ Արցախի Նոր Տարին, անկոտրուն, միասնական և հպարտ ՀԱՅ ազգի Նոր Տարին...

Պե՛տք է նշել, քանի որ մենք ՀԱՂԹԵԼՈՒ ԵՆՔ, իսկ հաղթանակները հայ ազգը մի՛շտ նշում է...


Աննա Ղազարյան

Newsarm.live