«Հայրենիք» կուսակցության առաջին զորախումբը շուտով կմեկնի մարտական հերթապահության. զորախմբի հարամանատարն Արթուր Վանեցյանն է

«Հայրենիք» կուսակցության առաջին զորախումբը շուտով կմեկնի մարտական հերթապահության: Կուսակցության մամուլի քարտուղար Սոս Հակոբյանը Tert.am-ի հետ զրույցում հայտնեց, որ բազմաթիվ մարդիկ արձագանքել են կուսակցության ղեկավար Արթուր Վանեցյանի մարտակոչին, իսկ զորախմբի հարամանատարը հենց Վանեցյանն է:

«Կազմակերպչական աշխատանքներն ամփոփման փուլում են, դրանից հետո Պաշտպանության նախարարությունը կկատարի նշանակում, և կուսակցության առաջին զորաջոկատը կմեկնի մարտական հերթապահության»,-ասաց Հակոբյանը:

Նրա տեղեկացմամբ՝ մարտակոչին արձագանքած և զորախմբին միացած քաղաքացիների մեջ կան Հայաստանի տարբեր վայրերից մարդիկ՝ ինչպես կուսակցականներ, այնպես էլ անկուսակցականներ։

Հիշեցնենք, որ Արթուր Վանեցյանը մարտակոչով հանդես էր եկել հոկտեմբերի 22-ին՝ նշելով, որ առաջնագծում պինդ կանգնած մեր ընկերներին սատարում ու փոխարինում է պետք:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։