Պուտինը դաս է տվել պորտաբույծներին․ լավ կլիներ՝ Սերժ Սարգսյանն ընդօրինակեր նրան

Shame.am-ը գրում է․

ՌԴ նախագահ Վլադիմիր Պուտինն այսօր ևս մեկ դաս է տվել իր «զինակիցներին», ինչը վատ չէր լինի, եթե փոխառեին նաև Հայաստանում։ Այսպես, Պուտինն այսօր դեմ է հանդես եկել Ռուսաստանի «ականավոր» գիտնականներին և սպառնացել է թողնել նրանց առանց հացի ու գողություն անելու համար սողանցքների։ Մասնավորապես, Պուտինն ասել է, որ նախագահի գործերի կառավարչության, կրթության նախարարության, ՆԳՆ-ի և ԱԴԾ-ի աշխատակիցները, որոնք ընտրված են Ռուսաստանի գիտությունների ակադեմիայի (ՌԳԱ) կազմում, հնարավորություն կստանան զբաղվելու միայն գիտական գործունեությամբ՝ իշխանության մարմիններում աշխատելու փոխարեն։ Այս մասին ռուսաստանյան պետության ղեկավարը հայտարարել է Գիտության և կրթության խորհրդի նիստում՝ հիշեցնելով, որ մինչ այդ խնդրել էր գործընկերներին չգրել ատենախոսություններ և չմասնակցել Ռուսաստանի գիտությունների ակադեմիայի ընտրություններին, քանի որ «դժվար է համատեղել գիտական և կառավարչական գործունեությունը»։

«Այնուամենայնիվ, մեր որոշ գործընկերներ նախագահի գործերի կառավարչությունից, կրթության նախարարությունից, ներքին գործերի նախարարությունից, պաշտպանության նախարարությունից, ԱԴԾ-ից և որոշ այլ գերատեսչություններից մասնակցել են ընտրությանը (գիտությունների ակադեմիայում- խմբ.) և ընտրվել են»,- ասել է Պուտինը։ Հետո նա դիմել է ՌԳԱ նախագահ Եվգենի Ֆորտովին հետևյալ հարցով. «Ինչո՞ւ Դուք արեցիք դա։ Նրանք այնպիսի խոշոր գիտնականներ են, որ առանց նրանց Ակադեմիան յոլա գնալ չի՞ կարող։ Առաջին հարց։ Եվ երկրորդ հարցը. հիմա ի՞նչ անեմ ես»։
Խեղճ Ֆորտովը, որ հայտնվել էր աննախանձելի վիճակում, արդարանում էր, թե ընտրությունների բոլոր մասնակիցները հավաստիացրել են, որ ստացել են իրենց ղեկավարների թույլտվությունը։ Այդ ժամանակ Պուտինը կրկնեց իր հարցը. «Հարցը դա չէր։ Նրանք այնպիսի խոշոր գիտնականներ են, որ պետք է թղթակից անդամներ ու ակադեմիկոսնե՞ր լինեն»։ «Վլադիմիր Վլադիմիրովիչ, նրանք անցել են ամբողջ մրցույթը, առանց որևէ բացթողնման ու բացառության։ Ես Ձեզ զեկուցել եմ, որ մեզ մոտ ընտրության պրակտիկան այնպիսին է, որ այդ մարդը վեց անգամ պետք է լսվի և վեց անգամ նրա համար քվեարկում են»,- բացատրել է Ֆորտովը։ «Ուրեմն, նրանք խոշոր գիտնականներ են... Այդ դեպքում երկրորդ հարցով Ձեզ չեմ տանջի, ես կարծում եմ, որ ես պետք է նրանց հնարավորություն տամ զբաղվելու գիտությամբ, որովհետև, դատելով ըստ ամենայնի, նրանց գիտական գործունեությունն անհամեմատ ավելի կարևոր է, քան ինչ-որ ամենօրյա վարչական պարտականությունների կատարումն իշխանության և կառավարման մարմիններում»,- ասել է Պուտինը։

Ինչպես տեսնում ենք, Վլադիմիր Պուտինը կտրականապես չի ընդունում ամեն տեսակ անարգանք առողջ բանականության հանդեպ։ Իսկապես, եթե մի որևէ նախարար կամ նահանգապետ խոշոր գիտնական է, գիտությունների դոկտոր, ինչպես մեր Լիսկան ու Տարոնն են, ապա ի՞նչ է անում նա իշխանության մարմիններում։ Ավելի լավ չէ՞, որ նա իրեն նվիրի գիտությանն ու շարժվի նոբելյան մրցանակների ուղղությամբ։ Իհարկե, այդպես էլ պետք է լինի։ Եվ կարելի է չկասկածել, որ մեկ տարի հետո Վլադիմիր Պուտինը կմաքրի ռուսական գիտությունն ամեն տեսակ տարոնակերպ տարրերից ու կվերադաստիարակի գիտության ոլորտի ռուսաստանցի չինովնիկներին։

Հիշեցնենք, որ երկար տարիներ մենք խորհուրդ ենք տալիս Հայաստանի քաղաքական ղեկավարությանը՝ բացառել գիտության անարգանքը չինովնիկների և օլիգարխների կողմից։  Բայց, ցավոք, նախագահ Սարգսյանը լռում է, և գիտությունը Հայաստանում ծաղկում է, իսկ գիտության դոկտորներն ու նրանց գիտական արարումներն անթիվ են։ Եվ այս ամենը՝ ի հաշիվ առողջ բանականության, բարոյականության, տարրական պարկեշտության։

Հուսանք, որ միասնական տնտեսական, պաշտպանական, հումանիտար, և որ գլխավորն է՝ բարոյական տարածքում Ռուսաստանի հետ ինտեգրման շրջանակում ՀՀ նախագահ Սերժ Սարգսյանը կհանգի որոշակի եզրակացությունների և մի քանի խոսք կասի, ինչից հետո Հայաստանի գիտական գործիչների մեջ «իզժոգա» կառաջանա դիսերտացիաների հանդեպ, և նրանք կզբաղվեն իրենց առտնին գործերով՝ գիտությունը թողնելով իր սպասավորներին։ Այլապես, «նորահայ գիտնականները» երբեք չեն հասկանա, որ չի կարելի անընդհատ անարգել այն ամենը, ինչ կա երկրում, և կարելի է լիովին բավարարվել միայն տնտեսության ու պետության օրենքների անարգանքով։