ՊՆ նախկին փոխնախարարը չի կարողանում ինքնուրույն քայլել. նրան բերել են հիվանդանոց (բացառիկ տեսանյութ)

Տևական ժամանակ է ինչ ArmLur.am-ն ահազանգեր է ստանում ՀՀ պաշտպանության նախկին փոխնախարար Վահան Շիրխանյանի հարազատների կողմից այն մասին, որ Շիրխանյանն առողջ, իր ոտքով քայլելով մտել է կալանավայր, իսկ հիմա չի կարողանում ինքնուրույն տեղաշարժվել: Հիշեցնենք, որ Շիրխանյանի փաստաբան Հայկ Ալումյանը նախօրեին լրագրողների հետ զրույցի ժամանակ հայտնել էր, որ Շիրխանյանը բանտում թոքի կաթված էր տարել, ինչից հետո վիրահատել էին և անոթի մեջ ֆիլտր տեղադրել: «Այժմ այդ պողպատե ֆիլտրը տեղից շեղվել է, ոտիկներով խրվել արյունատար անոթի մեջ: Մեծ է ներքին արյունահոսության վտանգը և սա միայն մի խնդիրն է, ինչի մասին ես բարձրաձայնեցի»,-ասել էր պաշտպանը: ՀՀ ԱԱԾ մեկուսարանում գտնվող ՀՀ նախկին փոխնախարար Վահան Շիրխանյանի առողջության խնդրով հրապարակավ մտահոգություն հայտնեց նաև ՀՀ Մարդու իրավունքների պաշտպան Արման Թաթոյանը: Եվ բարձրացված լրատվական մեծ աղմուկից հետո, երեկ ՀՀ Արդարադատության նախարարության Քրեակատարողական վարչությունը դիմեց ՀՀ առողջապահության նախարարությանը՝ Վահան Շիրխանյանի քաղաքացիական հիվանդանոցում այդ հետազոտությունները պետպատվերի շրջանակում անվճար հետազոտելու համար: ArmLur.am-ը քիչ առաջ տեղեկացավ, որ Վահան Շիրխանյանին «Երևան-Կենտրոն» քրեակատարողական հիմնարկից տեղափոխել են «Աստղիկ» բժշկական կենտրոն` հետազոտելու: Մեզ հաջողվեց մի քանի լուսանկար անել, որոնք փաստում են, որ նա չի կարողանում քայլել և հյուծված տեսք ունի:

Լիդա Եղիազարյան