«Ղազախստանում ինձ բավականին ճանաչում են». Սիլվա Հակոբյան

Երգչուհի Սիլվա Հակոբյանն ու ազգությամբ ղազախ երգիչ Ադիլբեք Բայթանաթը նոր երգ ունեն, որի պրեմիերան տեղի կունենա այսօր: Tert.am Life-ի հետ զրույցում Սիլվան պատմել է Ադիլբեքի հետ համագործակցության մասին: Երգի երաժշտության հեղինակը Կուաթ Աբիլովն է, ղազախերեն խոսքերի հեղինակն Ադիլբեքն է, հայերենինը` Մանե Հակոբյանը:

«Մանեն մինչև այս Կուաթի հեղինակած երաժշտության հիման վրա գրել էր «Չի լինի» երգը, որը ս կատարեցի: Կուաթն ինձ պարբերաբար երգեր էր ուղարկում, երբ սա ուղարկեց, շատ հավանեցի, Կուաթն առաջարկեց զուգերգով ներկայացնել: Ադիլբեք Բայթանաթը երգել էր իմ «Գիշեր է» երգը, այն տեղադրել էի իմ էջում, նրա ձայնն ինձ դուր էր գալիս: Երգը կյանքի դժվարությունների մասին է: Իրենց առաջարկով երգի մեջ նաև դուդուկ եղավ, նվագեց ամուսնուս եղբայրը` Արմեն Մանուկյանը, ով Ֆրանսիայում է բնակվում: Այնտեղից ձայնագրեց դուդուկի հատվածներն ու ուղարկեց»,- պատմեց Սիլվան:

Սիլվան և Ադիլբեքը ցանկացել են տեսահոլովակ բայց ներկա իրավիճակով պայմանավորված այս շրջանում չեն նկարահանել. «Չի բացառվում, որ հետագայում տեսահոլովակ լինի, կախված է մարդկանց արձագանքներից: Անձամբ ինձ երգը շատ է դուր գալիս: Թեև մեղեդային է, աղջիկս` Միլան, ամեն անգամ լսելիս պարում է»:

Սիլվայի խոսքով` Ղազախստանում ինքն արդեն բավականին ճանաչում ունի, քանի որ սա ղազախ երգիչների հետ 4-րդ համագործակցությունն է: Ղազախների հետ երգչուհուն կապող առաջին օղակը եղել է վաստակավոր արտիստ, կոմպոզիտոր Ուլիկան Ժոլդասովը. «Նրա հեղինակած երաժշտությամբ իմ «Հեռու կամ մոտ» երգը շատ սիրվեց: Նա ինձ հրավիրեց իր համերգին` որպես հատուկ հյուր: Մինչ օրս այդ համերգը իրենց հանրային ալիքով ցուցադրվում է: Ղազախներից համագործակցելու առաջարկներ շատ եմ ստանում, շուտով մեկ այլ երգչի հետ էլ պետք է համագործակցեմ»:

Հարցին՝ հնարավո՞ր է հետագայում Ղազախստանում մենահամերգով հանդես գա, Սիլվան պատասխանեց. «Ուլիկանն ինքն է ասել, որ կարող ենք կազմակերպել իմ մենահամերգը Ղազախստանում: Եթե ամեն ինչ հաջողվի, դուետներն էլ շատ սիրվեն, գուցե, հետագայում Ղազախստանում մենահամերգ ունենամ»:

Ավելին՝ այստեղ