Վերադարձ օլիմպիական Ռիո․ 4 տարի առաջ այս օրը Հայաստանը նվաճեց 3 մեդալ (ֆոտո)

Ռիոյի Օլիմպիական խաղերը պատմական էին հայկական սպորտի, Հայաստանի եւ աշխարհի հայության համար, քանի որ հենց այս Խաղերում Հայաստանը 20 տարի դադարից հետո ունեցավ օլիմպիական չեմպիոն:

2016 թվականի օգոստոսի 5-21-ը Ռիոյում Հայաստանի 33 մարզիկ պայքարեցին օլիմպիական մեդալների, հաղթանակներ գրանցելու համար՝ երկրի պատիվը բարձր պահելու մեկ ընդհանուր նպատակով: Անկախ Հայաստանի ամենամեծ օլիմպիական հավաքականը 4 մեդալ նվաճեց Ռիոյում՝ մեկ ոսկի եւ երեք արծաթ:
Հենց այս օրը՝ օգոստոսի 16-ը, ամենահիշարժանն էր օլիմպիական Ռիոյում Հայաստանի պատվիրակության եւ, առհասարակ, Հայաստանի համար: Հենց այս օրը 4 տարի առաջ Արթուր Ալեքսանյանը նվաճեց Հայաստանի միակ ոսկե մեդալը Ռիոյի Օլիմպիական խաղերում: Նույն օրը մեդալակիրներ դարձան նաեւ հունահռոմեական ոճի ըմբիշ Միհրան Հարությունյանը եւ ծանրորդ Գոռ Մինասյանը: Ավելի վաղ Հայաստանի առաջին մեդալը նվաճել էր ծանրորդ Սիմոն Մարտիրոսյանը:

NEWS.am Sport-ը վերհիշել է Ռիոյի Օլիմպիական խաղերը 4 տարի անց:

Արթուր Ալեքսանյանի ոսկե հաղթանակը Ռիոյում

Արթուր Ալեքսանյանի հաղթանակին, հաջողությանը օլիմպիական գորգում եւ ոսկե մեդալին հավատում էին բոլորը: Գյումրեցի ըմբիշի գոտեմարտին սպասում էին Հայաստանի եւ աշխարհի բոլորը հայերը՝ մեծից փոքր:

Ալեքսանյանը նախորդ օրը վստահ հաղթանակներ տոնելուց հետո արդեն «հայտարարել» էր աշխարհին, որ եզրափակիչ գոտեմարտում գորգ է դուրս գալիս իր եւ բոլորիս վաղեմի երազանքն իրագործելու՝ ոսկե մեդալը նվաճելու:
Օլիմպիական խաղերի հունահռոմեական ըմբշամարտի մրցաշարի 98 կգ քաշայինների եզրափակիչում գյումրեցի ըմբիշը վստահ հաղթանակ տարավ կուբացի Դանիել Յասմանի Կաբրերայի նկատմամբ (3:0): Իսկ մինչ եզրափակիչ, աշխարհի կրկնակի չեմպիոնը 3 փայլուն հաղթանակներ էր տոնել իտալացի Դաիգորո Տիմոնչինիի (5:2), ռումինացի Ալին Ցիուրարուի (8:0) եւ թուրք Չենկ Իլդեմի նկատմամբ (9:0):

Եզրափակիչ գոտեմարտի եզրափակիչ սուլոցից հետո Ռիոյի օլիմպիական մարզադահլիճը մի ակնթարթ քարացավ եւ ցնծաց Արթուր Ալեքսանյանի հուզական բղավոցից եւ գորգի կենտրոնում ծնկի գալուց հետո: Oլիմպիական չեմպիոնի հետ ցնծաց ամբողջ Հայաստանը:

Օլիմպիական պատվո հարթակի ամենաբարձր աստիճանին հայ մարզասեր հանրությունը գյումրեցի ըմբիշին առաջին անգամ տեսավ արցունքներն աչքերին՝ ապրիլյան պատերազմի հերոս Ռոբերտ Աբաջյանի պատկերն էլ կրծքին: Թերեւս սա ամենահուզիչ տեսարանն էր աշխարհի հայության համար հեռուստաէկրաններից այս կողմը:

Այդ ժամանակ դեռ կրկնակի աշխարհի եւ եռակի Եվրոպայի չեմպիոնը 20 տարվա ընդմիջումից հետո դարձավ անկախ Հայաստանի պատմության երկրորդ օլիմպիական չեմպիոնը՝ Արմեն Նազարյանից հետո եւ Հայաստանի 14-րդ օլիմպիական չեմպիոնը:
Միհրան Հարությունյանի պարտությունը՝ կեցցեների եւ ծափահարությունների ներքո.

Հունահռոմեական ըմբշամարտի 66 կգ քաշայինների պայքարում Հայաստանի ներկայացուցիչ, Եվրոպական խաղերի փոխչեմպիոն Միհրան Հարությունյանին կողմնակալ մրցավարության պատճառով բաժին հասավ արծաթե մեդալին, որը սակայն ոսկու գին ուներ:

Ռիոյի Օլիմպիական խաղերը ընդմիշտ ցավալի հիշողություններ կթողնեն ինչպես Միհրան Հարությունյանի, այնպես էլ հայ մարզասեր հանրության համար:
66 կգ քաշայինների եզրափակիչ գոտեմարտում բացահայտ անարդար մրցավարության պատճառով Միհրան Հարությունյանը պարտվեց 2014 թվականի աշխարհի չեմպիոն, սերբ Դավոր Շտեֆանեկին եւ բավարարվեց արծաթե մեդալով: Միհրանը պարտվեց կեցցեների եւ ծափահարությունների ներքո: Մրցավարները բառացիորեն զրկեցին Միհրանին հաղթանակից՝ մի քանի անգամ պարտեր նստացնելով հայ ըմբիշին՝ մրցակցի պասիվ պայքարի պարագայում եւ նախազգուշացումով մեկ միավոր նվիրելով Շտեֆանեկին:

Պարգեւատրման արարողության ժամանակ Հարությունյանը չկարողացավ զսպել արցունքները՝ մի ամբողջ ազգի ստիպելով իր հետ միասին արտասվել եւ այդպես էլ չհամաձայնել պարտության հետ՝ թույլ չտալով կրծքին կախել արծաթե մեդալը:

Ցավալի միջադեպից հետո «Զվարթնոց» օդանավակայանում Միհրան Հարությունյանին երկրպագուները դիմավորեցին օլիմպիական չեմպիոնին վայել, իսկ նրա արծաթե մեդալը հենց օդանավակայանում նվերի տեսքով փոխարինվեց ոսկե մեդալով:

Գոռ Մինասյանի արծաթե հաղթանակը.

Հաղթական օրվա հաղթական ավարտը տվեց ծանրորդ Գոռ Մինասյանը՝ նվաճելով օլիմպիական փոխչեմպիոնի կոչումը:

31-րդ ամառային Օլիմպիական խաղերի ծանրամարտի մրցաշարի +105 կգ քաշայինների պայքարում 22-ամյա գյումրեցի ծանրորդը երկրորդ տեղը գրավեց 451 կգ երկամարտի արդյունքով: Գոռ Մինասյանի արծաթե մեդալը Ռիոյում իսկական սփոփանք դարձավ հայ մարզասեր հանրության համար՝ ուրախությամբ, ցնծությամբ եւ հիասթափությամբ խառնված մեդալային օրվա ավարտին:

Մեկ օր առաջ էլ օլիմպիական Ռիոյում ծանրամարտի մրցաշարում Հայաստանի առաջին մեդալն էր նվաճել 19-ամյա Սիմոն Մարտիրոսյանը՝ 105 կգ քաշայինների պայքարում՝ նվաճելով արծաթե մեդալ (երկամարտ 402 կգ): Նշենք, որ անկախ Հայաստանի պատմության մեջ Օլիմպիական խաղերում հայ ծանրորդներն առաջին անգամ նվաճեցին արծաթե մեդալներ:

Ռիոյի Օլիմպիական խաղերից անցել է 4 տարի, բայց չեմպիոնական Խաղերի հիշողությունները վառ են մնացել ինչպես մարզիկների, այնպես էլ յուրաքանչյուր հայի սրտում: Անցած 4 տարիների ընթացքում հայ մարզիկները կրկնապատկել են իրենց հաղթանակներն ու մեդալները՝ նվաճելով աշխարհի ու Եվրոպայի ոսկե մեդալներ՝ այդպիսով ձեռնոց նետելով Տոկիոյի Օլիմպիական խաղերին:

Այսպես՝ Արթուր Ալեքսանյանը աշխարհի եռակի, Եվրոպայի 5-ակի չեմպիոն է, Եվրոպական խաղերի չեմպիոն է եւ այժմ վստահ քայլերով գնում է օլիմպիական երկրորդ ոսկե մեդալի հետեւից:

Սիմոն Մարտիրոսյանը աշխարհի եւ Եվրոպայի կրկնակի չեմպիոն է. նա նույնպես Տոկիոյի օլիմպիական գլխավոր հույսերից է:

Գոռ Մինասյանը աշխարհի փոխչեմպիոն է: Նա շարունակում է համառ պայքարի մեջ լինել իր հիմնական մրցակից, վրացի Լաշա Տալախաձեի հետ: Օլիմպիական ոսկե մեդալի ակնկալիքով ծանրորդը պատրաստվում է Տոկիոյի Խաղերին:

Օլիմպիական մրցաշրջանը նոր աշխարհի ու Եվրոպայի չեմպիոններ է տվել ինչպես ըմբշամարտում եւ ծանրամարտում, այնպես էլ մյուս մարզաձեւերում, որոնք վստահ իրենց խոսքը կասեն օլիմպիական Տոկիոյում:

32-րդ ամառային Օլիմպիական խաղերը պետք է տեղի ունենային 2020 թվականի հուլիսի 23-ից օգոստոսի 9-ը Տոկիոյում, բայց կորոնավիրուսի պանդեմիայի պատճառով Խաղերը հետաձգվեցին մեկ տարով:

Ուրեմն՝ դեպի Տոկիո՝ օլիմպիական ոսկե մեդալների ակնկալիքով:

Շարունակություն