Պետական համակարգի աշխատողները վախի մեջ են

tert.am

Պետական համակարգում ընթացող կրճատումները բացասական են ազդում համակարգի վրա, քանի որ արդեն մի քանի ամիս այդ խոսակցությունները գնում են, և պետական աշխատողները վախի զգացումով են աշխատում, չգիտեն, թե վաղն իրենց հետ ինչ է լինելու:

Այս մասին Tert.am-ի հետ զրույցում ասաց Հայաստանի պետական հիմնարկների արհմիությունների ճյուղային արհմիության նախագահ Անահիտ Ասատրյանը:

Պետական կառավարման համակարգում ընթացող կրճատումների առթիվ Հայաստանի պետական հիմնարկների արհմիությունը նոյեմբերի 2-ին նամակ է հղել վարչապետ Կարեն Կարապետյանին՝ առաջարկելով կանգնեցնել կրճատման գործընթացը:

«Քանի որ մեր երկրում հանրապետական կոլեկտիվ համաձայնագիր կա կնքված և սոցիալական գործընկերությունը աշխատանքային հարաբերությունների հիմքում է դրված, մինչ օպտիմալացման մասին որոշումը պետք է անպայման լիներ արհմիությունների հետ խորհրդատվություն: Այս հարցը պետք է քննարկվեր նաև արհմիությունների աշխատողների ներկայացուցիչների հետ, բայց դա չի արվել, դրա համար մենք առաջարկել ենք կանգնեցնել կրճատման գործընթացը, քանի որ կոնկրետ խորը վերլուծություն չկա, թե դրանից ինչ բարոյական վնաս կկրի պետական համակարգը»,- ասաց Անահիտ Ասատրյանը։

Արհմիությունը դեռ պատասխան չի ստացել վարչապետից: Անահիտ Ասատրյանը հարցը բարձրացրել է եռակողմ հանձնաժողովի նիստի ժամանակ, սակայն աշխատանքի և սոցիալական հարցերի նախարարը, որը նաև հանձնաժողովի նախագահն է, պարզաբանել է, թե հստակ կրճատումների քանակ նախատեսված չէ, պարզապես յուրաքանչյուր գերատեսչություն իր հաստիքների վերանայում է կատարում, ուսումնասիրում է՝ կրկնվող գործառույթներ կա՞ն, թե՞ ոչ:

Հիշեցնենք, որ ավելի քան մեկ ամիս առաջ վարչապետ Կարեն Կարապետյանը հանձնարարեց բոլոր գերատեսչություններին ներկայացնել առաջարկություններ՝ փոխելու իրենց կառավարման կառուցվածքը:

«Երկրորդ, օպտիմալացում բառը փոխարինում ենք կտրուկ կրճատմամբ, որպեսզի օպտիմալացումը տարբեր կերպ չմեկնաբանվի: Գնում ենք ՊՈԱԿ-ների՝ բալաստից ազատման, այն գործառույթները, որոնք անհասկանալի են, վերջնական վարչարարությունը չի կատարվում, հրաժարվում ենք»,- ասել էր վարչապետը` հավելելով, որ գործադիրը հրաժարվում է ՊՈԱԿ-ներից, ավելորդ կառույցներից ու ԾԻԳ-երից։

«Այսպիսով՝ սոցիալական լարվածությունն է ավելանում երկրում: Ավելի ճիշտ կլիներ տնտեսության զարգացման ուղղությամբ քայլերից հետո նման քայլի գնալ, հնարավոր է՝ կրճատվողների թիվը մինչև 1000-ի հասնի, ու 1000 ընտանիք կմնա առանց ապրուստի միջոցի: Դա նաև սոցիալական խնդիր էր լուծում: Մեր կարծիքն այն է, որ պետք է խորը վերլուծություն արվեր՝ թե ինչ կշահի ու ինչ կկորցնի պետությունը: Ի վերջո՝ ամեն ինչ չի փողով չափվում: Եթե մարդկային ռեսուրսներ ես կորցնում երկրում, եթե մարդկանց անվստահությունն է շատանում երկրում, սա պետության համար կարող է ավելի վնաս լինել, քան ինչ որ գումար խնայելը: Դրա համար մենք առաջարկում էինք, որ վերլուծություն ներկայացվեր, որ քննարկվեր, մարդիկ էլ իմանային՝ ինչ է կրճատումների հիմքում: Տպավորությունն այն է, որ թերի հավաքագրումների հարցը ուզում են լուծել մարդկանց կրճատելով: Սակայն արդյոք դրական բան կստանա՞ պետությունը, թե՞ չէ»,-ասաց արհմիության ներկայացուցիչը:

Քաղաքագետ Վիգեն Հակոբյանը Tert.am-ի հետ զրույցում կարծիք հայտնեց, որ նախընտրական շրջանում օպտիմալացման գնալը շատ ռիսկային է:

«Կարծում եմ, լուրջ համարձակություն է պետք ունենալ, որ նախընտրական տարում նման քայլերի գնալ: Դա բավականին համարձակ քայլ է, քանի որ մենք համարժեք աշխատատեղեր պետական համակարգից դուրս չենք ստեղծել: Եվ այդ մարդիկ ոչ միշտ են մրցունակ մասնավոր սեկտորում: Կրճատվածներն ու նրանց ընտանիքի անդամները իրենց բացասական վերաբերմունքը ցուցաբերելու են ապագա ընտրություններում»,-ասաց քաղաքագետը:

Մյուս կողմից՝ Վիգեն Հակոբյանը կարծում է, որ ՊՈԱԿ-ների ու ԾԻԳ-երի կրճատումներն անհրաժեշտ են, քանի որ դրանք պետություններ են պետությունների մեջ և այնտեղ հայկական ստանդարտներից բավական բարձր աշխատավարձեր են ստանում։ Ըստ քաղաքագետի՝ նրանք, բնական է, դժգոհելու են, քանի որ կադրային քաղաքականությունը ՀՀ-ում հիմնականում եղել է քավոր-սանիկ հարաբերություններում, նման մարդիկ են տեղավորվել, որ լավ բարձր աշխատավարձ ստանան