Փոստանջյանի երեւակայությունը զարմացրեց Վիգեն Սարգսյանին. Նա հիշեց հումորիստ Արկադի Ռայկինին

aravot.am

«Ժառանգության» պատգամավոր Զարուհի Փոստանջյանն այսօր ԱԺ-ում ափսոսանք հայտնեց, որ ՊՆ նոր նախարար Վիգեն Սարգսյանը ԱԺ առաջին անգամ նախագիծ է բերել ոչ թե մեր ազգային անվտանգության նոր հայեցակարգի հետ կապված, այլ՝ գումար հավաքելու: Խոսքը 1000 դրամ պարտադիր վճարի մասին է՝ յուրաքանչյուր աշխատողից: Նա իր հերթին ցույց տվեց այն գումարների տեղը, որոնցից կարող էին հիմնադրամը ֆինանսավորել՝ յուրաքանչյուր բանտարկյալի համար պետբյուջեից հատկացվող 5000 դրամը կրճատելով առնվազն 2 եւ ավելի անգամ: Զարուհի Փոստանջյանն ասաց, որ ՀՀ-ում այսօր կա 22 հազար ոստիկան: Այդ ոստիկանները 2 մլն բնակչության համար ահռելի քանակ են կազմում: Նա առաջարկեց կրճատել ոստիկաններին. «Գնացեք հաշվեք եւ կտեսնեք, որ այս աղբյուրները լիարժեք բավարար են ձեր նպատակների համար»: ՊՆ նախարար Վիգեն Սարգսյանը հիշեց Սովետական միության հումորիստ Արկադի Ռայկինին. «Նա ասում էր՝ եթե բալերինայի ոտին դինամո կապեն, նա շատ հոսանք կարող է արտադրել պտտվելու ընթացքում: Ձեր առաջարկը ինձ հիշեցրեց մոտավորապես նույն տրամաբանությունը: Ես չեմ կարծում, որ մարդուն նստացնում են բանտ՝ փող ծախսելու, կամ իրեն ազատում են՝ փող շահելու համար, բայց դուք, որպես պատգամավոր, ազատ եք ունենալ ցանկացած երեւակայություն: Ես ուրախ եմ, որ դուք այդ երեւակայությամբ փոքրամասնություն ներկայացնող ֆրակցիայի պատգամավոր եք»: Զարուհի Փոստանջյանը եզրակացրեց՝ փաստորեն նորանշանակ նախարարը համամիտ է, որ ընդամենը 2 մլն բնակչություն ունեցող ՀՀ-ում կարող է լինել 22 հազար ոստիկան եւ 5000 բանտարկյալ, կարող է չլինել վաղաժամկետ պայմանական ազատման ինստիտուտը»: Ի պատասխան՝ Վիգեն Սարգսյանն ասաց, որ հպարտ է՝ մեր երկրում չկան քաղբանտարկյալներ: Նախարարն ասաց, որ պատերազմող երկրում կարող են լինել այդքան ոստիկաններ, որոնց գործառույթները մեծ են, իսկ ինչ վերաբերում է բանտարկյալների թվին՝ Վիգեն Սարգսյանը վստահեցրեց, որ այդ թիվը սխալ է, մեր բնակչության համեմատ բանտարկյալների թիվը չափազանց փոքր է:

Հռիփսիմե ՋԵԲԵՋՅԱՆ