ԱԱԾ-ն վախենո՞ւմ է․ ի՞նչ էր ասելու Վահան Շիրխանյանը լրագրողներին
ՔաղաքականությունՊաշտպանության նախկին փոխնախարար Վահան Շիրխանյանի և ԶԼՄ-ների ներկայացուցիչների հետ հանդիպումը չկայացավ։ Փաստորեն, ԱԱԾ քննիչները ամեն ինչ արեցին` խոչընդոտելու համար լրագրողների հետ նրա հանդիպելու իրավունքը։ Հավանաբար, Շիրխանյանը իրոք մի այնպիսի բան էր ասելու, որից իշխանությունը վախենում է։ Նախ, ՔԿՀ անցակետի աշխատակիցը պարտադրեց լրագրողներին դիմումներ գրել՝ նշելով դրա մեջ, որ 10 լրագրողներից բաղկացած խումբ է միաժամանակ մուտք գործում կալանավայր։ Հետո դիմումները մերժեցին` պատճառաբանելով, որ միաժամանակ առնվազն երեք լրագրող կարող է դիմել, իսկ երբ լրագրողները նոր դիմումներ գրեցին՝ խմբակային և անհատական և մի ժամ սպասեցին ԱԱԾ անցակետի մոտ, նրանց նոր մերժման որոշումներ բաժանվեցին։ Այս անգամ ՔԿՀ պետը մերժումը պատճառաբանեց իր աշխատակիցների ծանրաբեռնվածությամբ և նրանով, որ «Վահան Շիրխանյանին 2016 թվականի նոյեմբեր ամսին արդեն իսկ տրամադրվել է երկու տեսակցություն նրա մերձավոր ազգականների հետ»։
Ի դեպ, «Երևան- Կենտրոնի» պետ Պապոյանը նախկինում ԱԱԾ-ում քննիչ է աշխատել։ Ի պատասխան այս թյուր պատճառաբանությանը` նկատենք, որ մենք Վահան Շիրխանյանի ազգականները չենք, ոչ էլ մերձավորները, մենք նրա հետ ոչ թե տեսակցության էինք եկել, այլ հանդիպման` իրացնելով նրա՝ լրագրողների հետ հանդիպելու և մեր՝ տեղեկատվություն տարածելու իրավունքները։ Ուղիղ երկու ժամ 10 լրատվամիջոցների ներկայացուցիչներ սպասեցին ԱԱԾ անցակետում։ Լուր տարածվեց, որ ՔԿՎ պետ Արթուր Օսիկյանն է գալիս, բայց ոչ ոք չհավատաց, քանի որ Օսիկյանը լրագրողից ամենաշատ խուսափող, եթե չասենք՝ վախեցող պաշտոնյաներից է։ Պարզ է, որ նա չէր գա և նրան չէին էլ թողնի, որ գար, եթե անգամ նա անվախ լիներ։
ԱԱԾ անցակետում ԶԼՄ-ների հարցերին պատասխանեց Շիրխանյանի շահերի պաշտպան Հայկ Ալումյանը։ Նա հայտնեց, որ խնդրել էր «Երևան-Կենտրոն» ՔԿՀ-ի պետ, արդարադատության գնդապետ Վ․ Պապոյանին օր ու ժամ սահմանել, երբ լրագրողները կարող էին հանդիպել Վահան Շիրխանյանի հետ։ «Կասկածի տակ չդնելով ԶԼՄ-ների և Շիրխանյանի հանդիպումը` պետը պատասխանել է, որ օր ու ժամ ինքը չի սահմանում, այսինքն` դա ազատ է։ Մենք մեր կողմից սահմանեցինք, որ այն տեղի կունենա այսօր` 14.00, և համապատասխան դիմումով կալանավորված Շիրխանյանը մոտ մեկ շաբաթ առաջ դիմել է ՔԿՀ պետին», - ասաց նա։ Փաստորեն, նախնական գրավոր թույլտվություն չի եղել։ Այն, ինչ կատարվեց ԱԱԾ-ի անցակետում, Հայկ Ալումյանը բնորոշեց մի բառով՝ աճպարարություն։ «Այսպիսի լուրջ հիմնարկի սազական մոտեցում չի։ Սկզբում դուք յուրաքանչյուրդ գրեցիք առանձին դիմումներ, հետո, երբ դուք գրեցիք, որ ուզում եք տեսակցել 10 հոգով, ասացին, որ երեք հոգուց ավելի չպիտի գրեք։ Սրա միակ նպատակը նա է, որ հնարավորինս շատ խոչընդոտներ ստեղծեն ձեր և պարոն Շիրխանյանի միջև տեսակցության»։ Իսկ Շիրխանյանը պատրաստվում էր պատճառաբանություններ հայտնել իրեն ներկայացվող մեղադրանքների՝ իշխանության յուրացնելու նախապատրաստում, հանցավոր համագործակցության մասնակցելը, զենք դիրքորոշման հետ կապված, ինչպես նաև հայտնել, թե ինչու են իր նկատմամբ հետապնդումներ իրականացվում, ում կողմից են դրանք հրահրված և ինչու։ Հայկ Ալումյանը հրաժարվեց մանրամասներ հայտնել մեկ տարի առաջ Նորք –Մարաշի առանձնատանը բացահայտված հանցավոր խմբի գործից։ «Դատավարությանը կգաք, ամեն ինչ կտեսնեք», - ասաց նա։
Հարցին, թե արդյոք կապ կա Վահան Շիրխանյանի դեմ իրականացվող քրեական հետապնդումների և նրա կնոջ մեքենայի հետ պատահած վթարի միջև, նա ասաց․ «Ես չգիտեմ, չեմ կարող ասել, որ հաստատ իրար հետ կապված է, բայց նրա հարազատների մեջ կա նման վարկած, որ վթարը կապակցված է։ Շիրխանյանի առողջական վիճակը գնահատեց «շատ վատ»։ «Դուք նրան կտեսնեք, հավաբանար, համեմատեք նրան այն մարդու հետ, ով վերջին անգամ հարցազրույց էր տվել նախկան կալանավորումը։ Կարող է, մի քանի հատոր բժշկական փաստաթղթեր ձեզ ներկայացնեն, թե իրենք ինչ լավ են բուժում, ինչքան հետազոտություններ են անցկացնում»։ Նա դժվարությամբ է հասնում իր խցից տեսակցությունների սենյակ, որը 30-40 մետր է հեռու, մի ձեռքում ձեռնափայտ է, մյուս ձեռքից նրան բռնում է ՔԿՀ աշխատակիցը։
Սյուզան Սիմոնյան
1
2
3
4
5
2
3
4
5
1
3
4
