Աղմկահարույց գործով ամբաստանյալը հայտարարեց, որ իրեն խոշտանգել են

Pastinfo.am

Սոցցանցերում և առհասարակ հասարակության շրջանում մեծապես քննարկված՝ Մաշտոցի պողոտայում տեղի ունեցած աղմկահարույց ծեծկռտուքի գործով այսօրվա դատական նիստում հետաքրքրական հայտարարություններ հնչեցին:
Այսպես, ամբաստանյալներն ու նրանց պաշտպանները հայտարարեցին, որ դեպքը պատկերող տեսագրության զննման արձանագրության մեջ առկա նկարագրությունը չի համապատասխանում բուն տեսագրությանը:
Մասնավորապես, ամբաստանյալ Գարիկ Բաբախանյանի պաշտպան, փաստաբան Վարդան Զուռնաչյանը հայտնեց, որ իր պաշտպանյալի գործողությունները կռվողներին բաժանելու գործողություններ են, նա թույլ չի տվել, որ կռիվը շարունակվի, այսինքն՝ որևէ հիմք չկա խուլիգանության մեղադրանքի համար: Իսկ զննության արձանագրությունն, ըստ նրա, ոչ թե զննության արձանագրություն է, այլ ավելի շատ մեկնաբանություն։ Նրա գնահատմամբ՝ զննման արձանագրությունը բացարձակապես թերի է:
Ամբաստանյալ Անդրանիկ Գաբրիելյանը կողոպուտի դրվագի առնչությամբ հայտարարեց, որ ոչ ոք մեղավոր չի, ինքն է խփել անձին, հեռախոսը վերցրել՝ ասելով պարտքի գումարը կվերադարձնես, հետ կստանաս հեռախոսը:
Դատարանում հետազոտվեց նաև Ա.Գաբրիելյանին պատկերող տեսաձայնագրությունը: Ամբաստանյալը հայտարարեց, որ իր ասածները չեն համապատասխանում իրականությանը՝ ինքը եղել է դեղահաբերի ազդեցության տակ և որ իր նկատմամբ խոշտանգում է կիրառվել, ձեռքն են ջարդել: Ամբաստանյալը նշեց, որ իրեն խոշտանգել են երկու պաշտոնատար անձինք, նշեց նրանց պաշտոնները:
Ամբաստանյալն իր այս հաղորդումը պնդեց նաև սուտ մատնության մասին մեղադրողի կողմից նախազգուշացվելուց հետո: Մեղադրողը դատարանին հայտնեց, որ օրենքով սահմանված կարգով հաղորդմանը ընթացք կտրվի:

Հիշեցնենք, որ անցած տարվա սեպտեմբերի 19-ին՝ առավոտյան ժամը 7:00-ի սահմաններում Երևանի Մաշտոցի պողոտայում տեղի էր ունեցել ծեծկռտուք: Ազգային ժողովի պատգամավոր Գուրգեն Արսենյանն ականատես էր եղել, թե ինչպես չորս հոգի գետնին են տապալել մի երիտասարդի ու նրան ծեծում:
Պատգամավորը կանգնեցրել էր ավտոմեքենան, փորձել էր նրանց կարգի հրավիրել, սակայն երիտասարդները թողնելով հիշյալ երիտասարդին, կենտրոնացել էին արդեն պատգամավորի վրա, այդ ընթացքում վերջինիս օգնականը դանակահարվել էր:
Այսպես, ըստ մեղադրանքի, Անդրանիկ Գաբրիելյանը Սամվել Սաֆարյանի, Հակոբ Բոյաջյանի և Գարիկ Բաբախանյանի հետ գույքի հափշտակություն կատարելու շուրջ նախնական համաձայնության գալով, Երևան քաղաքի Հանրապետության հրապարակում Ռուբիկ Առաքելյանի առողջության համար ոչ վտանգավոր բռնություն գործադրելով, ձեռքերով և ոտքերով ծեծի են ենթարկել նրան` պատճառելով առողջության թեթև վնասի հատկանիշներ չպարունակող մարմնական վնասվածքներ, ապա բացահայտ հափշտակել են Ռ. Առաքելյանին պատկանող զգալի չափի` 400.000 ՀՀ դրամ արժողության «Այֆոն» տեսակի բջջային հեռախոսը, 1.500 ՀՀ դրամ գումարը և 200 դրամ արժողության կրակայրիչն ու դիմել փախուստի:

Կռվողներին բաժանելը խուլիգանությո՞ւն է. սկսվել է պատգամավորի մասնակցությամբ միջադեպի դատաքննությունը
Գարիկ Բաբախանյանն, ըստ մեղադրանքի, Երևան քաղաքի Վ. Սարգսյան փողոցի Հանրապետության հրապարակին հարող տարածքում բացահայտ հափշտակել է Արամ Վարդանյանի կողմից շահագործվող` Արարատ Հայրապետյանին պատկանող զգալի չափի` 12.000 ՀՀ դրամ արժողության «Սամսունգ» տեսակի բջջային հեռախոսը:
Ըստ Հակոբ Բոյաջյանին և Սամվել Սաֆարյանին առաջադրված մեղադրանքի, նա Գարիկ Բաբախանյանի, Սամվել Սաֆարյանի և Անդրանիկ Գաբրիելյանի հետ գույքի հափշտակություն կատարելու շուրջ նախնական համաձայնության գալով, Երևան քաղաքի Հանրապետության հրապարակում Ռուբիկ Առաքելյանի առողջության համար ոչ վտանգավոր բռնություն գործադրելով, ձեռքերով և ոտքերով ծեծի են ենթարկել նրան` պատճառելով առողջության թեթև վնասի հատկանիշներ չպարունակող մարմնական վնասվածքներ, ապա բացահայտ հափշտակել են Ռ. Առաքելյանին պատկանող զգալի չափի` 400.000 ՀՀ դրամ արժողության «Այֆոն» տեսակի բջջային հեռախոսը, 1.500 ՀՀ դրամ գումարը և 200 դրամ արժողության կրակայրիչն ու դիմել փախուստի:
Անդրանիկ Գաբրիելյանին մեղադրանք է առաջադրվել ՀՀ քրեական օրենսգրքի 176-րդ հոդվածի երկրորդ մասի 1-ին և 4-րդ կետերով՝ մի խումբ անձանց կողմից նախնական համաձայնությամբ կատարված կողոպուտ, որը զուգորդվել է կյանքի կամ առողջության համար ոչ վտանգավոր բռնություն գործադրելով, 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, 34-104-րդ հոդվածի 2-րդ մասի 2-րդ կետ՝ ծառայողական գործունեության կամ հասարակական պարտքի կատարման հետ կապված սպանության փորձ:
Գարիկ Բաբախանյանը մեղադրվում է ՀՀ քրեական օրենսգրքի 176-րդ հոդվածի 1-ին մասով, նույն հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով՝ մի խումբ անձանց կամ կազմակերպված խմբի կողմից կատարված խուլիգանություն, որը զուգորդվել է հասարակական կարգի պահպանություն իրականացնող կամ հասարակական կարգի խախտումը խափանող անձին դիմադրություն ցույց տալով:
Հակոբ Բոյաջյանին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով, իսկ Սամվել Սաֆարյանը՝ ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով: