Մանրամասներ են հայտնի դարձել Քլինթոնի ու Թրամփի հեռախոսազրույցից
Բաց մի թողեք
«Թրամփի ընտրությունն, ըստ էության, բողոքական ընտրազանգվածի հաղթանակն էր, որովհետեւ մարդիկ հոգնել էին, եւ ստանդարտից դուրս մոտեցումներն են հիմա ավելի պոպուլյար»,- Aravot.am-ի հետ զրույցում Հանրապետական Դոնալդ Թրամփի՝ ԱՄՆ 45-րդ նախագահի հաղթանակն այսպես մեկնաբանեց Հայաստան-ԱՄՆ բարեկամական խմբի անդամ, պատգամավոր Էդմոն Մարուքյանը: Նա ասաց, որ հիմա ոչ ստանդարտ մոտեցումներին են նախապատվությունը տալիս ոչ միայն ԱՄՆ-ում, այլեւ ամբողջ աշխարհում. «Սա տենդենց է, եւ միայն ամերիկյան ժողովրդավարության մոտ չէ, որ նման խնդիր է առաջանում: Ունենք այն, ինչ ունենք, եւ բոլորը պետք է հաշվի նստեն ԱՄՆ ժողովրդի ընտրության հետ»: Թե մեզ ինչ է տալու Թրամփի հաղթանակը՝ Էդմոն Մարուքյանն ասաց, որ հայ-ամերիկյան հարաբերությունների տեսանկյունից որեւէ փոփոխություն չի լինի, որովհետեւ այդ հարաբերությունները նախագահների ընտրությունից չեն փոխվում. «Միգուցե մեզ համար ավելի լավ լիներ, որ Քլինթոնն անցներ՝ այն առումով, որ Հայաստանում եղել է 2 անգամ, գիտի մեր խնդիրների մասին, ԼՂՀ խնդրի մասին լավատեղյակ էր: Այս մասով միգուցե մեզ համար ավելի լավ լիներ, եթե Հիլարի Քլինթոնի հաղթանակը լիներ: Բայց հիմա ունենք այն, ինչ ունենք»: Մեր հարցին՝ ճի՞շտ էր, որ ԱՄՆ-ի հայ համայնքը հայտարարեց, որ թեկնածուներից որեւէ մեկին չի սատարում՝ նա պատասխանեց. «Որքան գիտեմ, ձայները կիսվել են, համայնքի ներկայացուցիչները ե՛ւ Թրամփին են ձայն տվել, ե՛ւ Քլինթոնին»: Ինչպես հայտնի է, ընտրությունների արդյունքները հայտնի դառնալուց հետո Քլինթոնը զանգահարել է Թրամփին եւ շնորհավորել: Էդմոն Մարուքյանի խոսքերով՝ «Սա ամերիկյան ընտրությունների ավանդույթի մաս է կազմում: Բացի զանգահարելը նա պետք է ելույթ ունենար եւ հայտարարեր, որ ինքը պարտվել է: Դեռ հարց է՝ ելույթ կունենա՞, թե՞ ոչ, որովհետեւ տվյալներ կան, որ նա պայմանով է զանգել, որ էլ ելույթ չի ունենա, այսինքն, Թրամփը չի պահանջելու ելույթ ունենալ: Կա նման տեղեկություն»: Թե ինչու հայաստանյան ընտրություններից հետո նման բան տեղի չի ունենում, Էդմոն Մարուքյանի դիտարկմամբ՝ «Մինչեւ ընտրության օրը հասնելը այնքան խախտումներ են լինում, որ որեւէ տեղ չի մնում իրար շնորհավորելու եւ ընդունելու արդյունքները: Եթե արդար լիներ ընտրությունները, ես, օրինակ, ցանկացել եմ, որ եթե ես մասնակցեմ արդար ընտրությունների եւ պարտվեմ, ես շնորհավորեմ, եթե հաղթեմ՝ ինձ շնորհավորեն: Սա շատ կարեւոր ավանդույթ է, որ մենք պետք է զարգացնենք, բայց մինչ այդ ավանդույթը զարգացնելը պետք է արդար ընտրություններ անցկացնենք, նոր մարդկանցից պահանջենք շնորհավորել»:
Հռիփսիմե ՋԵԲԵՋՅԱՆ
1
2
3
4
5
1
2
3
4
5
1
3
4
5
