«Ալբերտ Բաղդասարյանը պետք է ներողություն խնդրի»․ Պ․ Մակեյան

«Թե ոնց հայտնվեց Ալբերտ Բաղդասարյանը հարթակում եւ սկսեց համակարգել, իր բացատրությամբ ես լիարժեք բավարարված եմ: Հասկացա, թե ոնց է հայտնվել եւ թե ոնց է անհետացել: Դրա պատասխանը ես իրենից ստացա: Բայց ինքը ցինիկ սուտ է խոսել, ես ո՞նց կարող էի «Սասնա ծռերի» մասով բացասական բան արտահայտվել, որի մասին ինքը խոսել է»,- Aravot.am-ի հետ զրույցում ասաց «Ժողովրդավարական հայրենիք» կուսակցության նախագահ Պետրոս Մակեյանը: Հիշեցնենք, որ երեկ Գերագույն խորհրդի նախկին պատգամավոր Ալբերտ Բաղդասարյանը բացատրելով, թե ինչու ինքը Հակաճգնաժամային խորհրդի կազմում չի ընդգրկել Պետրոս Մակեյանին՝ ասել էր, որ այդ ցուցակի մարդիկ պետք է 3 սկզբունքի դավաճանած չլինեին. «1. Այդ անհատները ոչ միայն չէին դատապարտել «Սասնա ծռերին», այլ գտել են, որ «Սասնա ծռերը» ժամանակի պահանջն էր: Պետրոս Մակեյանը այդպիսի հայտարարություն չի արել, նա ՀԱԿ-ի համակարգում է գործում, որը դատապարտել է տղաներին: Առաջինը անհրաժեշտ էր, որ նա տղաներին չդատապարտեր, այլ հայտարարեր, որ դա անհրաժեշտ երեւույթ էր»: Պետրոս Մակեյանի խոսքերով՝ «Ես ունեցել եմ հրապարակային ելույթներ Խորենացի փողոցից, Ազատության հրապարակից եւ մշտապես ասել եմ դա: Առավել եւս հուլիսի 17-ի հայտարարությունը կա մեր կուսակցության, որ կատարվածի պատասխանատվությունը ընկնում է Սերժ Սարգսյանի վրա, որ ժողովրդին զրկել են իշխանությունը ձեւավորելու իրավունքից, արժանավայել ապրելու իրավունքից եւ մղել են ապստամբության: Ասել եմ, որ ժողովրդի 90 տոկոսը ողջունում է այն անձնազոհ քայլը, որ տղաները արել են: Այդ տղաների կեսից ավելիին անձամբ ճանաչում եմ, շփումներ ունեցել եմ: Ալբերտ Բաղդասարյանը ո՞նց է իմացել, որ այդ տղաները կարող են իմ հնարավոր հայտնվելու մասով բացասական կարծիք հայտնել: Դրա համար իմ համար ամեն ինչ պարզ է, թե քամին որտեղից է փչել, ոնց է եկել»: Պետրոս Մակեյանն ասաց, որ «Ալբերտ Բաղդասարյանն իր կեղծիքի համար պետք է հրապարակային ներողություն խնդրի, ընդունի այդ կեղծիքը, հակառակ դեպքում ուրիշ հարթության վրա խոսակցությունը տեղափոխել սիրուն չի: 90-ականներից մենք շփվել ենք, հարաբերությունները վատ չեն եղել»: Մեր դիտարկմանը, որ ինքը բացատրում էր, որ ՀԱԿ-ի գիծն եք ընդունել, Պետրոս Մակեյանը արձագանքեց. «Եթե ինքը դա է ասում, ՀԱԿ-ը ինձ 4 տարի մրոտում, վատաբանում է, ինքը մամուլից տեղյակ չի՞: Եթե ինքը ինձ ՀԱԿ-ի դաշտն է տանում, այդ դեպքում ես կասեմ, որ 90-ին ՀՀՇ-ի դաշտում էլ ինքն է եղել»: