Սերժ Սարգսյանը գցեց Կարապետյանի արժեթղթերի գինը

1in.am-ը գրում է․

Հայաստանի կառավարությունը ներկայացնում է 2017 թվականի բյուջեն, և այդ բյուջեի նախագծի վերաբերյալ հարցը ավելի շատ ոչ թե բյուջեի կատարման իրատեսականությունն է, այլ այն, թե արդյոք ներկայացնող կառավարությո՞ւնն է շարունակելու կատարել այդ բյուջեն:

Եվ բանը միայն այն չէ, որ 2017 թվականի ապրիլին խորհրդարանի ընտրություն է, որից հետո լինելու է նոր կառավարություն: Բանը նաև այն է, որ ներկայիս կառավարությունը դեռևս ունի նաև ՀՀԿ-ում հաստատվելու անհրաժեշտություն, առավել ևս այն բանից հետո, երբ Սերժ Սարգսյանը հերթական անգամ բաց պահեց իր վարչապետական հեռանկարի հարցը:

Բանն այն է, որ այդօրինակ ակնարկները իշխանության մեջ առաջ են բերում հոգեբանական բավականին բուռն վայրիվերումներ և տրանսֆորմացիաներ: Մի բան է, երբ համակարգում կարծում են, որ Սարգսյանը վարչապետ չի լինելու, մեկ այլ բան, երբ ազդակ են ստանում, որ նա, այնուհանդերձ, ունի այդպիսի պլաններ և արդեն երկրորդ անգամ դրանք չի էլ փորձում թաքցնել, այլ ընդամենը գերադասում է դրա մասին չխոսել:

Իսկ դա նշանակում է, որ Սարգսյանը կտրուկ գցում է Կարապետյանի վարչապետական արժեթղթերի գինը: Անգամ այն դեպքում, եթե Սարգսյանը դիտարկում է իր վարչապետության տարբերակները 2018-ից հետո, երբ թողնի նախագահի պաշտոնը: Թեև այդ պարագայում Կարեն Կարապետյանի համար մնում է առնվազն մեկ տարի ինտերվալ, 2017 թվականը մնում է, այսպես ասած, նրա իրավասության ներքո, այնուհանդերձ՝ երբ Սերժ Սարգսյանը բաց է թողնում իր վարչապետական հեռանկարը, այն էլ հրապարակավ, դա գցում է գործող վարչապետի արժեթղթերի գինը: Այդպիսով Կարեն Կարապետյանը ՀՀԿ-ականների մոտ ընկալվում է որպես ժամանակավոր:

Բացառված չէ, իհարկե, որ Սերժ Սարգսյանը իր վարչապետության հարցը բաց է թողնում պարզապես տակտիկական նկատառումներից ելնելով, որպեսզի Կարեն Կարապետյանի մոտ չառաջանա զգացում, որ Սերժ Սարգսյանը կախված է նրա կառավարությունից, նրա վարչապետությունից: Երբ ՀՀԿ-ում նա գցում է Կարապետյանի արժեթղթերի գինը, դրանով Կարապետյանին կախվածության մեջ է գցում իրենից:

Մյուս կողմից՝ Սարգսյանի այս տակտիկան կարող է պարունակել մեկ այլ հնարք հակառակ տրամաբանությամբ՝ այդպիսով ձևավորելով Սերժ Սարգսյանի համար առանցքային նշանակություն ունեցող երկակիության, փոխադարձ զսպման միջավայր:

Կարապետյանի հանդեպ ՀՀԿ-ում առաջացնելով ժամանակավորության ընկալում՝ Սերժ Սարգսյանը միգուցե այդպիսով փորձում է թուլացնել ՀՀԿ-ի բացասական տրամադրվածությունը նրա հանդեպ՝ այդպիսով Կարապետյանին որոշակիորեն ապահովագրելով այդ բացասական տրամադրվածությունից բխող որոշակի ռիսկերից և բացելով գործելու դաշտ ու այդպիսով Կարեն Կարապետյանին զրկելով իր նախագահի պաշտոնից հետո վարչապետի պաշտոնում առաջադրվելու մասին հայտարարությունների կապակցությամբ դժգոհության առիթներից և հիմքերից: