Օպերային ներկայացում, համերգային ծրագրեր. Ֆրանկոֆոնիայի գագաթնաժողովը հագեցած կլինի նաև մշակութային միջոցառումներով

ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Ֆրանկոֆոնիայի միջազգային 17-րդ գագաթնաժողովի շրջանակում, որը կանցկացվի հոկտեմբերի 7-12 Երևանում, Հայաստանի մայրաքաղաքում և ՀՀ մարզերում տարբեր մշակութային միջոցառումներ կանցկացվեն: Կիրականացվեն թատերական ներկայացումներ, ցուցահանդեսներ, համերգային ծրագրեր, որոնք միտված կլինեն հայ-ֆրանսիական հարաբերությունների կարևորությունն ընդգծելուն և դրանք ամրապնդելուն:

Կայանալիք կարևորագույն միջոցառումների մասին «Արմենպրես»-ի թղթակիցը զրուցել է ՀՀ մշակույթի նախարարության արտաքին կապերի վարչության պետ Լուսինե Քարամյանի հետ:

«Այս տարի Ֆրանկոֆոնիայի գագաթնաժողովը մշակութային չէ. այն տնտեսական ուղղվածություն ունի, սակայն առկա է նաև մշակութային բաղադրիչը: Նախարարությունը փորձել է կայանալիք միջոցառումներում ներառել մշակույթի բոլոր ճյուղերը, որպեսզի յուրաքանչյուր մարդ կարողանա գտնել իրեն հետաքրքրող ուղղությունը»,-նշեց Քարամյանը:

Նա շեշտեց, որ ամենասպասված և խոշոր միջոցառումը «Ֆրանկոֆոնիայի ավանն» է, որը կանցկացվի հոկտեմբերի 7-12-ը Ազատության հրապարակում: «Ֆրանկոֆոն երկրները, որոնք մասնակցում են տնտեսական ֆորումին, իրենց մշակույթը կներկայացնեն տարբեր տաղավարներում: Կցուցադրվեն ձեռագործ աշխատանքներ, ազգային նվաճումները ներկայացնող գործեր և այլն: Այդ հատվածում կլինի բեմահարթակ, որտեղ Ֆրանկոֆոն երկրների ներկայացուցիչները հանդես կգան երգով, պարով, թատերական ներկայացումներով: Նախարարությունը կանի հնարավորինս այդ միջոցառումը պատշաճ մակարդակով կազմակերպելու համար»,-ընդգծեց վարչության պետը:

Ա. Սպենդիարյանի անվան օպերայի և բալետի ազգային ակադեմիական թատրոնն անմասն չի մնա Ֆրանկոֆոնիայից: Թատրոնը արվեստասեր հասարակության դատին կհանձնի ֆրանսիացի երգահան Ժյուլ Մասնեի «Մանոն» օպերան: Առաջնախաղը տեղի կունենա հոկտեմբերի 7-ին, իսկ հոկտեմբերի տասի ներկայացմանը ներկա կլինի Ֆրանսիայի նախագահ Էմանուել Մակրոնը:

«Ներկայացումը կընդգրկվի օպերային թատրոնի խաղացանկում»,-հավելեց Քարամյանը:

Հոկտեմբերի 4-25-ը Գ. Սունդուկյանի անվան ազգային ակադեմիական թատրոնի ձմեռային այգում կցուցադրվեն ֆրանսահայ գեղանկարչուհի Ասիլվայի ստեղծագործությունները: Քարամյանի խոսքով` Ասիլվան բավականին հետաքրքիր արվեստագետ է և կարող է դուր գալ շատերին:

Ֆրանսիական ժամանակակից գրականությունն ու թատերարվեստը կներկայացվեն Յ. Ղեզայի «Սպանդի աստվածը» բեմադրության մեջ, որը հոկտեմբերի 13, 14, 16-ին արվեստասերները հնարավորություն կունենան դիտել Երևանում, իսկ հոկտեմբերի 20-ին ԱՊՀ պատմամշակութային մայրաքաղաք Գորիսում:

«Շատ եմ կարևորում նաև հոկտեմբերի տասին Կ. Ստանիսլավսկու անվան ռուսական դրամատիկական թատրոնի ճեմասրահում կայանալիք «Գիրք և գինի» ցուցահանդեսը, որի նպատակը մեր երկրում Ֆրանկոֆոնիայի պատմությունը ներկայացնելն է: Կցուցադրվի Ֆրանսալեզու գրականություն, հյուրերը հայկական գինիներ համտեսելու հնարավորություն կունենան: Նույն միջոցառման շրջանակում տեղի կունենա Լեյլա Սլիմանիի «Մեղմիկ երգը» գրքի շնորհանդեսը»,-ասաց Լուսինե Քարամյանը:

Նա նշեց, որ մենահամերգ ունենալու նպատակով ՀՀ մշակույթի նախարարությանն է դիմել հայկական ֆոլկ երաժշտություն ներկայացնող Մխիթարյան քույրեր և ընկերներ խումբը: Նրանց համերգային երեկոն տեղի կունենա հոկտեմբերի 9-ին Հ. Պարոնյանի անվան երաժշտական կոմեդիայի պետական թատրոնում: Խումբը հայկական ազգային մշակույթը կներկայացնի նորովի մոտեցումներով:

Հոկտեմբերի 7-12-ը Հայաստանի ազգային պատկերասրահում կանցկացվի հայ արվեստագետների ցուցահանդես: «Արվեստագետները` գեղանկարիչներ, քանդակագործներ, լուսանկարիչներ, կցուցադրեն գործեր, որոնք ուղղված են հայ-ֆրանսիական մշակույթի հանրահռչակմանը: Նրանք այն արվեստագետներն են, որոնք 2009 թվականից սկսած մասնակցել են Ֆրանկոֆոնիային և հաջողություններ են գրանցել»,-փաստեց Քարամյանը:

Հատկապես երիտասարդները կարող են մեծ բավականություն ստանալ կարճ ժամանակում աշխարհում լայն ճանաչում ձեռք բերած երգչուհի Զազի մենահամերգին: Այն տեղի կունենա հոկտեմբերի 12-ին Հանրապետության Հրապարակում: «Համերգին պետք է մասնակցեր նաև մեծն շանսոնյե Շառլ Ազնավուրը: Ցավում եմ, որ դա անհնար դարձավ: Ազնավուրի հարցազրույցներից մեկի ընթացքում նա խոսեց Զազի մասին` երգչուհուն առանձնացնելով բոլորից և նշեց, որ Զազն այն քիչ կատարողներից է, որը ոչ ոքի չի կրկնօրինակում»,-պատմեց վարչության պետը:

Անդրադառնալով Ֆրանկոֆոնիայի շրջանակում Շառլ Ազնավուրին նվիրված որևէ միջոցառում անցկացնելուն` Քարամյանն ասաց, որ իրենք խորապես ցնցված են նրա մահվան լուրից և կարծում են, որ անպայման անհրաժեշտ է ինչ-որ բան նախաձեռնել, բայց դեռ չեն քննարկել այդ հարցը: Նա հույս հայտնեց, որ կիրականացնեն միջոցառում մեծ հային ևս մեկ անգամ հիշելու և նրան հարգանքի տուրք մատուցելու համար:

Հայաստանը Ֆրանկոֆոնիայի շարժմանը մասնակցում է 2004 թվականից` սկզբում որպես դիտորդ, 2008 թվականից որպես ասոցացված անդամ, իսկ 2012 թվականի հոկտեմբերից որպես լիիրավ անդամ: 2009 թվականից ՀՀ մշակույթի նախարարությունը մասնակցում է Ֆրանկոֆոնիայի շարժմանը` ամեն տարի մարտ-ապրիլ ամիսներին Հայաստանում` Երևանում և մարզերում բազմաժանր միջոցառումներ անցկացնելով: