ՀԲՖ ղեկավարությունն հաստատեց, որ ֆեդերացիայում տիրում է անարդար մրցավարություն և կա խտրական վերաբերմունք մարզիկների նկատմամբ

Մերի Սերոբյանը ֆեյսբուքյան իր էջում գրում է.

Բռնցքամարտի ֆեդերացիայում կան բազմաթիվ խնդիրներ, որոնց մասին հաճախ բարձրաձայնում են թե՛ մարզիկները, և թե՛ մարզիչները: Այդ խնդիրները առկա լինելով, տարիներ շարունակ այդպես էլ իրենց լուծումը չեն ստացել և մինչև այժմ էլ խանգարում են Հայաստանում բռնցքամարտի բնականոն զարգացմանը:
Մասնավորապես՝ բոլորին հայտնի փաստ է, որ հայկական բռնցքամարտում տիրում է անարդար մրցավարություն, շատ հաճախ մարզիկների միջև խտրականություն է դրվում: Այն պարագաներում թե հաղթանակը ում շնորհել գործում է խնամի ծանոթ բարեկամ համակարգը: Սա իհարկե շատ արատավոր երևույթ է, որի լուծումը հնարավոր էր տալ այս տարիների ընթացքում, սակայն սայլը տեղից չի շարժվել, իսկ խնդիրները այդպես էլ մնացել են:
Այս հարցին անդրադարձ եղավ նաև ՀԲՖ-ի այսօրվա հրավիրած մամուլի ասուլիսի ժամանակ, երբ նախ ՀԲՖ ղեկավարությունը հայտարարեց, թե ֆեդերացիայում խնդիրներ չունեն, այնուհետև լրագրողի հարցին, թե անարդար մրցավարության խնդիր կա՞, նա պատասխանեց, որ այո կա նման խնդիր: Միմյանց հակասող հայտարարությունների մասին չէ, որ կցանկանանք այս պարագայում բարձրաձայնել, այլ այն խնդրի, որը տարիներ շարունակ ուղղակիորեն խոչընդոտել է ֆեդերացիայի բնականոն աշխատանքն ու հայկական բռնցքամարտի զարգացմանը:
Եվ երբ բռնցքամարտի ֆեդերացիայի նախագահը ասում է, որ բռնցքամարտի ֆեդերացիայում ամեն ինչ կարգին է և խնդիրներ չկան լավ կլինի ուսումնասիրի այն բոլոր օրինակները, երբ տուժել են մարզիկները անարդար մրցավարության և խտրական վերաբերմունքի պատճառով, հերիք է նշել դեպքերից մեկը, երբ օրինակ Հայստանի չեմպիոնը չի գնում Եվրոպայի առաջնության, փոխարենը նախապատվությունը տրվում է պարտված մարզիկին: Սա իհարկե անընդունելի երևույթ է և մարզիկների հաջողությունների հասնելու համար մեծ խոչընդոտ, երբ նրանք անընդհատ հանդիպում են խտրականության և անարդարության, իսկ ֆեդերացիայի կողմից էլ հարցի լուծմանն ու կարգավորմանը ուղղված որևէ աջակցություն չեն ստանում: