Սերժ Սարգսյանն ընդդեմ վարչապետի

1in.am-ը գրում է․

Սերժ Սարգսյանն «Ալ Ջազերա» հեռուստաընկերությանը տված հարցազրույցում հայտարարել է, որ նախագահի պաշտոնը թողնելուց հետո վարչապետի պաշտոնում իր առաջադրման հեռանկարի մասին խոսելը վաղ է, և դա կախված է նրանից, թե ինչ արդյունք կարձանագրի ՀՀԿ-ն 2017 թվականի խորհրդարանական ընտրություններում: Սերժ Սարգսյանը հայտարարել է, որ դա կախված է շատ լավ քվե ստանալուց:

Սերժ Սարգսյանը փաստորեն չի բացառում, որ իր քաղաքական ծրագրերում առկա է նախագահի պաշտոնը թողնելուց հետո վարչապետի պաշտոնում առաջադրվելու տարբերակը: Սակայն մեծ հաշվով սա, իհարկե, չի կարող հասարակության համար զարմանալի լինել, և ոչ այն պատճառով, որ Սերժ Սարգսյանը դեռևս մեկ տարի առաջ ըստ էության արդեն իսկ նման հեռանկարները պայմանավորել էր 2017 թվականի ընտրությունների արդյունքով:

Տվյալ պարագայում արժե ուշադրության արժանացնել մեկ այլ հանգամանք: Խոսքն այն մասին է, որ թեև Սերժ Սարգսյանը խոսում է շատ լավ քվե ստանալուց կախվածության մասին, այնուհանդերձ՝ ոչինչ միանշանակ չէ, և առաջին հայացքից գուցե տարօրինակ հնչի, սակայն իրականում Սերժ Սարգսյանի վարչապետական հեռանկարի կամ հավակնությունների հարցում կարող է ավելի մեծ նշանակություն ունենալ ՀՀԿ-ի, այսպես ասած, ավելի վատ արդյունքը, ավելի վատ կամ համեմատաբար դժվար քվեն:

Խնդիրն այն է, որ 2017 թվականի ընտրություններում ՀՀԿ-ի լավ արդյունքը, ամենայն հավանականությամբ, լինելու է կառավարության լավ աշխատանքի արդյունք: Բոլորս, իհարկե, հասկանում ենք, որ լավ արդյունք ասվածը բոլոր դեպքերում, առավել ևս՝ ՀՀԿ-ի դեպքում, խիստ հարաբերական է և ամենևին հոմանիշ չէ արդար կամ օրինական արդյունքին: Սա իմիջիայլոց:

Այսուհանդերձ, ՀՀԿ-ի «լավ քվեն», ըստ էության, նշանակելու է Կարեն Կարապետյանի լավ աշխատանքի արդյունք: Եվ այս պարագայում, բնականաբար, խիստ անտրամաբանական կլինի, եթե Կարեն Կարապետյանը լավ աշխատի, լավ արդյունքներ ապահովի, թեկուզ ՀՀԿ-ին բնորոշ արդյունքի տրամաբանության մեջ, սակայն հանկարծ նա հեռանա, և լավ աշխատող վարչապետին փոխարինի նախագահական պաշտոնը թողած Սերժ Սարգսյանը:

Եվ սա նշանակում է, որ խորքային առումով Սերժ Սարգսյանի համար առավել նախընտրելի է լինելու, եթե ՀՀԿ-ն արձանագրի համեմատության և հարաբերականության տիրույթում գտնվող «վատ արդյունք», որը չլինի, իհարկե, այնպիսին, որ առաջացնի հետընտրական ցնցումներ, սակայն չլինի նաև այնպիսին, որ աներկբայորեն վկայի Կարեն Կարապետյանի հաջողության մասին: Այլ կերպ ասած՝ Սերժ Սարգսյանին պետք է այնպիսի իրավիճակ, երբ արդյունք կլինի, սակայն զուգահեռ կլինի նաև Կարեն Կարապետյանի կառավարության անհաջողություն և անարդյունավետություն:

Եվ եթե սա չլինի մինչև 2017 թվականը, ապա նույնիսկ այս պարագայում՝ Կարապետյանի լավ արդյունքի դեպքում, 2017 թվականից հետո Սերժ Սարգսյանը պետք է ամեն ինչ անի Կարապետյանի կառավարության անարդյունավետության համար, որպեսզի դրանով նախապատրաստի իր վարչապետության հիմքերը:

Ասել կուզի՝ Սերժ Սարգսյանն ըստ էության հայտարարել է, որ Կարեն Կարապետյանն իր ապագա մրցակիցն է կամ «զոհը»: