Սերժ Սարգսյանը չի կարող Ղարաբաղի հարցում որեւէ տարածքային զիջման գնալ․ քաղաքագետ

«Որեւէ հայ գործիչ՝ ներառյալ Սերժ Սարգսյանը, չի կարող Ղարաբաղի հարցում որեւէ տարածքային զիջման գնալ»,— այս մասին NEWS.am-ի թղթակցի հետ զրույցում հայտարարել է քաղաքագետ, արեւելագետ Կարինե Գեւորգյանը:

Նրա խոսքով՝ իրադարձությունների այլ զարգացումը պարզապես քաղաքական մահ կլինի, այդ պատճառով դա անիրական է: «Քաղաքական որոշակի հաղթանակի մասին պատրանքը, որ ապրիլյան պատերազմից հետո առաջացել է Ադրբեջանի փորձագիտական հանրության շրջանում, բավական վտանգավոր պատրանք է: Գործընթացները, որոնք ընդհանրապես տեղի են ունենում տարածաշրջանում, այնպիսին են, որ իլիպականների մի մասը, իսկապես, տեղ ունի Ադրբեջանում: Բայց հաշվի առնելով, որ ներկայում Ադրբեջանի բնակչության առնվազն 60%-ը շիաներ են՝ ԻՊ-ականների վատթարագույն թշնամիները, ապա չեմ պատկերացնում, թե ինչ կլինի»,- նշեց Գեւորգյանը:

Որոշ տարածքների հնարավոր հանձնման մասին Հայաստանում տարածվող լուրերը ոմանք, չգիտես ինչու, «Լավրովի պլան» են կոչում: «Այնքան էլ հասկանալի չէ, թե ինչպես կարող է Լավրովը ԵԱՀԿ Մինսկի խմբի շրջանակից դուրս ինչ-որ բան քննարկել եւ միակողմանի դա անել: Անհնար է: Այդ պատճառով դրանք ընդամենը լուրեր են: Իհարկե՝ Լավրովը կարող է ինչ-որ բան առաջարկել, բայց այս դեպքում որոշումը չի կարող Ռուսաստանինը լինել: Մինսկի խումբը համատեղ է որոշում կայացնելու»,- նշեց քաղաքագետը:

Նա ընդգծեց, որ Լեռնային Ղարաբաղը երբեք չի հանձնի այդ տարածքները, կպայքարի դրանց համար: «Խառնաշփոթ կսկսվի: Հնարավոր է՝ ինչ-որ մեկին դա ձեռնտու կլինի: Բայց ես դրանում լուրջ սպառնալիքներ եմ տեսնում, այդ թվում՝ Ադրբեջանի համար»,- նշեց քաղաքագետը:

Հիշեցնենք, որ օգոստոսի 10-ին Մոսկվայում կայանալու է Հայաստանի եւ Ռուսաստանի նախագահներ Սերժ Սարգսյանի եւ Վլադիմիր Պուտինի հանդիպումը: Բարձրագույն մակարդակով հանդիպման ընթացքում քննարկվելու են երկու պետությունների միջեւ երկկողմ փոխգործակցության օրակարգային հարցեր: Կարծիքներ կփոխանակվեն նաեւ ղարաբաղյան հակամարտության կարգավորման շուրջ: