«Էրեխեք ջան, սա 21-րդ դարն է»․ վարչապետը՝ Սյունիքում
ՀասարակությունՎարչապետ Նիկոլ Փաշինյանը Սիսիան կատարած այցի ժամանակ իր հերթին ճշտող հարցեր էր տալիս քաղաքացիներին, մասնավորապես՝ հասկանալու համար երիտասարդները, աշակերտները ինչպես են ներգրավված կրթական, ինժեներական ծրագրերում:
Փաշինյանի հարցին՝ Սիսիանի Դարբաս համայնքի ինժեներական լաբորատորիայում քանի՞ աշակերտ է սովորում, «Արմատ» ինժեներական լաբորատորայի խմբակավար Հայկը պատասխանեց. «Թեպետ վաթսունից ավելի տեղ կա, սակայն աշխատանքներում ներգրավված է մոտ տասնչորս հոգի, որոնցից այս ոլորտում ապագա մասնագետ կարող են լինել ութը»: Այս առթիվ վարչապետը իր մտահոգությունը հայտնեց՝ դիմելով հանդիպմանը ներկա երեխաներին.
«Էրեխեք ջան, սա 21-րդ դարն է, ես ձեզ կոչ եմ անում անպայման զբաղվել ինժեներական լաբորատորիայի գործերով, մասնագիտանալ, որովհետեւ այդ ուղղությամբ մասնագիտանալը ձեզ երաշխավորում է, որ դուք կունենաք լավ աշխատանք: Այսօր Հայաստանում մասնագետների խնդիր կա տեխնոլոգիաների ոլորտում: Ձեր երեխաներին բացատրեք, թող գնան սովորեն: Չեմ ասում, որ բոլորը պետք է ինժեներ դառնան, բայց մեծ թվով մարդիկ պետք է դառնան ինժեներ: Ես ափսոսում եմ, որ ինժեներ չդարձա, լրագրող դարձա: Իհարկե, կատակում եմ՝ ով ինչ մասնագիտություն սիրում է»,- ծիծաղում է վարչապետը՝ հավելելով, որ իրականում սա շատ կարեւոր խնդիր է ոչ միայն Սիսիսանում, այլ ամբողջ Հայաստանում:
Վարչապետը, անդրադառնալով քաղաքացներից մեկի հարցին՝ կապված տարբեր չարաշահումների հետ, նշեց, որ սիսիանցիները կարող են կոռուպցիոն որեւէ հանգամանքի դեպքում անհապաղ դիմել իրավապահ մարմիններին՝ շեշտելով, որ վերջիններս ցանկացած դեպքում զբաղվելու են նմանատիպ հարցերով:
Փաշինյանը խոսեց նաեւ այն մասին, քաղաքացիները իրենք պետք է նախաձեռնող լինեն, հույսը միայն կառավարության վրա չդնեն: Նա նշեց, որ ողջ Հայաստանը կորած է աղբի մեջ.
«Եթե ասենք աղբաման չկա, գնացեք քաղաքապետի մոտ, ասեք՝ խնդիր կա, պետք է լուծել: Նախաձեռնեք ինքներդ: Եթե առաջ ինչ-որ հակամարտության ռեժիմ կար ժողովրդի ու կառավարության միջև, այդ ռեժիմը էլ չկա: Մենք մի մարմին ենք, սա պետք է օգտագործենք համագործակցության եւ հարցեր լուծելու համար»,- ասաց վարչապետը:
1
2
3
4
5
1
2
3
4
5
1
3
