Մասոնական կատաղի պայքար

Ռուսաստանյան մամուլից

Միայն Վրաստանին ենք զիջում մի քիչ

novostink.ru-ն «Հայաստանը գրավում է 120-րդ տեղը անվտանգ երկրների ցանկում» հոդվածում գրում է, որ համաձայն աշխարհի 163 երկրների անվտանգության ցանկի, Հայաստանը 120-րդ տեղում է: Այդ մասին ասվում է Institute for Economics and Peace կազմակերպության պաշտանական էջում: Ցանկի հաշվարկի հիմքում ընկած են երկիրը նկարագրող 23 որակական ցուցանիշներ, որոնք վերցվում են հեղինակավոր աղբյուրներից: Հաշվի են առնվում սոցիալական անվտանգության մակարդակը, ներքին և արտաքին հակամարտությունների ծավալները, հասարակության ռազմականացման աստիճանը, քրեական վիճակի աստիճանը, ահաբեկչական գործողությունների քանակը, զենքի ներկրումը և արտահանումը, կոռուպցիայի մակարդակը և այլն:
Այս ցանկում, որպես ամենավտանգավոր երկիր, առաջին տեղում Սիրիան է, հետո Աֆղանստանը, Հյուսիսային Սուդանը, Իրաքը: Ռուսաստանը 154-րդ տեղում է, Թուրքիան՝ 149-րդ, Ադրբեջանը՝ 132-րդ և Վրաստանը՝ 102-րդ: Այսպիսով, անվտանգության տեսակետից տարածաշրջանում Հայաստանը զիջում է միայն Վրաստանին:

Մասոնական կատաղի պայքար

regnum.ru-ն գրում է, որ ռուսական մասոնական օթյակի ղեկավար Անդրեյ Բոգդանովը այցելել է Բաքու: Նա ասել է, որ ամեն տարի այս օրերին նա այցելում է Ադրբեջան՝ մասնակցելու այդ երկրի մեծ մասոնական օթյակի համաժողովին: Մասոնական շարժման ադրբեջանցի մի ակտիվիստ պատմել է, որ հարց է դրված «ունենալ սեփական մարդկանց կառավարությունում», և շուտով դա կլինի և կտեսնենք, թե ինչքան կաճի մասոնության դերը Ադրբեջանում: Անանուն մնալու պայմանով որոշ բաքվեցի մասոններ նշում են, որ մասոնների մեջ հայեր չկան, բայց Բոգդանովը հաստատում է, որ Հայաստանում մասոնությունը Ադրբեջանից վաղ է եղել՝ 15 տարի առաջ, և կոչվում է «Մեծ հայկական օթյակ»: Նա նշում է նաև, որ հայ և ադրբեջանցի մասոները շփում չունեն և միմյանց չեն ընդունում, նրանք հանդիպում են միմյանց միայն Ռուսաստանի, ԱՄՆ-ի կամ Եվրոպայի օթյակների համաժողովների ժամանակ: Այլ խոսքով, այս երկու օթյակների միջև չերևացող կատաղի պայքար է ընթանում:

Կամո Խաչիկյան