Արմավիրում 18-ամյա աղջիկը դանակահարել է մոր նախկին ընկերոջը

Արավիրի մարզի ընդհանուր իրավասության դատարանում Վահե Խալաթյանի նախագահությամբ ավարտվել է Մարի Փ.-ի (անունը փոխված է) գործի դատական քննությունը:

Դեպքի պահին 18-ամյա Մարիին նախաքննական մարմինը սկզբում մեղադրանք էր առաջադրել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Գործի դատական քննության ավարտական փուլում՝ 2018 թվականի հունիսի 6-ին, մեղադրող դատախազը փոփոխել է առաջադրված մեղադրանքը, Մարիին մեղադրանք է առաջադրել անհրաժեշտ պաշտպանության սահմանազանցմամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 116 հոդվածի 2-րդ մասով:

Դատարանը հաստատված է գնահատել հետևյալ փաստական հանգամանքները:

Մարիի մայրն ու հայրն ամուսնացել են 1997 թվականին: 1998 թվականին ծնվել է Մարին, մի քանի տարի հետո՝ Մարիի քույրը:

Ընտանեկան անհաշտության պատճառով Մարիի ծնողները 2003 թվականին ամուսնալուծվել են: Երկու դուստրերը մնացել են մոր խնամքին:

2012 թվականին Մարիի մայրը ծանոթացել ու փաստական կապի մեջ է մտել երևանաբնակ Սարգիս Ա.-ի հետ: Չորս երեխաների հայր Սարգիսը հեռացել էր օրինական կնոջից: Նա հիմնականում սկսել է բնակվել Մարիենց տանը: Սկզբնական շրջանում ապրել են հաշտ, բայց Սարգիսը հակում ուներ ալկոհոլի նկատմամբ, ինչի պատճառով վեճերը աստիճանաբար հաճախադեպ են դարձել:

2016 թվականի հունիսին Սարգիսը Մարիենց տանը ընկերների հետ մեծ քանակությամբ ալկոհոլ է օգտագործել և հյուրերի հեռանալուց հետո վիճաբանել է Մարիի մոր ու Մարիի հետ:

Այդ միջադեպից հետո Սարգիսը տևական ժամանակ Մարիենց տուն չի գնացել, քանի որ Մարիի մայրը հրաժարվել է նրա հետ հարաբերությունները շարունակելուց:

2016 թվականի օգոստոսի 24-ին, ժամը 22-ի սահմաններում Մարիենց տուն է այցելել վերջինիս հոր բարեկամ Սամվելը: Կեսգիշերին մոտ Մարին, նրա մայրն ու քույրը դուրս են եկել հյուրին ճանապարհելու: Բակում հանդիպել են Սարգսին, ով ալկոհոլ օգտագործած վիճակում էր:

Սարգիսը ցանկություն է հայտնել խոսելու Մարիի մայրիկի հետ, բայց վերջինս չի ցանկացել: Դրանից վրդովվելով՝ Սարգիսը բռնել է կնոջ մազերից, քաշքշել, վայրի է գցել նրան, ձեռքերով, ոտքերով հարվածներ է հասցրել:

Մարին, նրա անչափահաս քույրն ու նրանց հյուր Սամվելը փորձել են Սարգսին հեռացնել, թույլ չտալ, որ ծեծը շարունակի. Բայց չեն կարողացել:

Այդ ժամանակ Մարին, ցանկանալով պաշտպանել մայրիկին, գնացել է խոհանոց, դանակ է վերցրել, դուրս է եկել ու մթության մեջ դանակով մեկ անգամ հարվածել է Սարգիս Ա.-ի որովայնի ձախ հատվածին՝ նրա առողջությանը պատճառելով ծանր վնաս:

Դրանից հետո Մարիի մայրը զանգել է ոստիկանություն ու հայտնել է կատարվածի մասին: Սարգիս Ա.-ին շտապօգնության մեքենայով տեղափոխել են հիվանդանոց, ենթարկել են վիրահատության: Մարին ու մայրը կամովին ներկայացել են վարույթն իրականացնող մարմնին:

Մարին իրեն լիովին մեղավոր է ճանաչել նախաքննության սկզբից, երբ ծանր մեղադրանք էր առաջադրված: Միևնույն ժամանակ Մարին նշել է, թե Սարգսին դանակով մեկ անգամ հարվածել է՝ ցավեցնելու նպատակով՝ որ նա բաց թողնի իր մայրիկին: Սարգիսը, իրոք, դանակի հարվածից հետո կարծես «քարացել է» ու բաց է թողել մայրիկին…

Դատարանում Մարին նշել է, որ Սարգիսը խմած ու ագրեսիվ էր: Նա հարձակվել է իր մայրիկի վրա, քաշքշել ու ծեծել է մորը… Երբ ինքը դանակով նրան հարվածել է, նա ընկել ու պառկել է գետնին: Երբ ոստիկաններ են եկել, Սարգիսը գոռգոռացել, վիճել է ոստիկանների հետ: Նա փորձում էր վեր կենալ, մեքենա նստել, բայց չէր կարողանում:

Ըստ Մարիի՝ ինքը ցանկացել է մորը պաշտպանել, մոր կյանքին, իր կարծիքով, վտանգ էր սպառնում: Ինքը տեսել է՝ Սարգիսն ինչպես է մորը ծեծում, չի դիմացել, մտել է տուն ու դանակ է վերցրել… Իր «ուշքնումիտքը» մոր ծեծը դադարեցնելն էր: Հորեղբայրն էլ էր փորձում դադարեցնել, բայց չէր կարողանում…

Մարին հայտնել է, թե ինքը Սարգսին «տանել չէր կարողանում», նա իրեն բոլորովին դուր չէր գալիս, որովհետև ցանկանում էր «ինքնահաստատվել» իրենց տան մեջ: Բայց ինքը հայր ունի… Ինքը Սարգսի հեռանալուց հետո այրել էր նրա հագուստները, որ նա թողել էր իրենց տանը…

Մարին ասել է, թե դեպքի ժամանակ Սարգիսն իրեն չի հարվածել, ինքը դանակով մոտեցել, ասել է. «Թող հլը, արա՛…»:

Ըստ Մարիի՝ Սարգիսը ցանկանում էր մորը նստեցնել մեքենա ու տանել: Մայրը փորձել է փախչել, իսկ Սարգիսն ասել է՝ կանգնի, թե չէ կկրակեմ…

Մարին, այնուամենայնիվ, զղջացել է կատարածի համար…

Տուժող Սարգիս Ա.-ն հայտնել է, թե ամուսնալուծվել է իր չորս երեխաների մորից, հետո հանդիպել ու կապի մեջ է մտել Մարիի մայրիկի հետ: Հիմնականում բնակվել է վերջինիս տանը: Ընկերուհու երեխաներին՝ Մարիին ու նրա քույրիկին, ինքը վերաբերվել է՝ ինչպես իր երեխաներին: Մարին ու քույրիկը վաղ տարիքից զրկված են եղել հայրական գուրգուրանքից… Ինքը հայրական պարտականությունները վերցրել է իր վրա, բայց Մարին դա լավ չի ընդունել, հաճախ վիճել է իր հետ: Ինքը, միևնույն է, Մարիին վերաբերվել է որպես ծնող, ցանկացել է նրան դաստիարակել դեռահաս հասակում…

2016 թվականի հունիսին ինքն ու նախկին կինը վերականգնել են իրենց հարաբերությունները: Մարիի մայրն այդ պատճառով է վիճաբանել իր հետ, և իրենց հարաբերությունները խզվել են:

Դեպքի օրը՝ օգոստոսի 24-ին, ինքը երևանյան մի խաղատնից դուրս է եկել ու գնացել է Մարիենց տուն՝ այնտեղ մնացած իր անձնական իրերը վերցնելու: Կեսգիշերին հասել է նրանց տուն, բակում պատահաբար հանդիպել է նախկին ընկերուհուն, նրա դուստրերին ու բարեկամին:

Դրանից հետո ոչինչ չի հիշում, ուշքի է եկել հիվանդանոցում, ենթարկվել է վիրահատության: Դեպքի մանրամասները չի հիշում:

Տուժողը դատարան չի ներկայացել, դատարանը հետազոտել է նրա նախաքննական ցուցմունքները…

Դատարանը հաստատված է գնահատել, որ Մարի Փ.-ն մոր նախկին ընկերոջը դանակով հարվածել է՝ անհրաժեշտ պաշտպանության սահմանազանցմամբ՝ հանկարծակի առաջացած դիտավորությամբ:

Մարի Փ.-ն մեղավոր է ճանաչվել ՀՀ քրեական օրենսգրքի 116 հոդվածի 2-րդ մասով, դատապարտվել է 6 ամիս ազատազրկման, նրա նկատմամբ պայմանական դատապարտություն է կիրառվել, ու սահմանվել է 1 տարի փորձաշրջան: