«Պատրաստ եմ նյութեր ներկայացնել»․ քաղաքացին՝ հանցագործության փաստով դիմում է վարչապետին

Քաղաքացի Սամվել Հարությունյանը բաց նամակով դիմում է ՀՀ վարչապետ Նիկոլ Փաշինյանին, ներկայացնելով նյութեր, որտեղ երեւում է, թե ինչպես են իր դեմ անօրինական որոշում կայացրել:

«Մի խումբ հանցագործներ՝ ունենալով քաղաքական հովանավորություն Բաղրամյան 26-ից, կեղծիքների միջոցով սնանկության են ենթարկել Վանաձորի «Ստանկոմետ» ընկերությունը: Հանցագործության մեջ ներքաշված են բարձրաստիճան իրավապահներ: Հանցագործությունը կատարվել է ակնհայտ, փաստաթղթեր կեղծելով, ինչի ապացույցներն առկա են:

Լոռու մարզի քննչական վարչությունում հերթական անգամ կարճվել է քրեական գործը, առաջին ատյանի դատարանում գտնելով՝ իր հովանավորչությունը, այսինքն՝ կոռումպացված համակարգը անում էր այն, ինչ պետք է աներ:

Ոչինչ չէր զարմացնի, եթե… Երկրում կատարված հեղափոխությունից հետո, երբ ՀՀ վարչապետ Նիկոլ Փաշինյանը հայտարարում է, որ Բաղրամյան 26-ից այսուհետեւ ոչ ոք չի միջնորդելու դատարաններին, Հայաստանում կոռումպացված համակարգի հենասյուներից մեկը ՝ Հովհաննես Հովսեփյանը, հրահանգ է տալիս վերաքննիչ դատարանին ապօրինի որոշում կայացնել, ինչով ուզում է փակել հանցագործության բացահայտման ճանապարհները:

2018թ. մայիսի 21-ին վերաքննիչ դատարանը կայացրել է այնպիսի ճչացող անօրինական որոշում, որ վախենում է այն տրամադրել ինձ՝ հասկանալով հետեւանքների մասին: ՀՀ վարչապետ Նիկոլ Փաշինյանը հորդորում է ՀՀ քաղաքացիներին՝ հայտնել կոռուպցիոն դեպքերի մասին՝ գրելով մամուլում: Հիմա ես հայտնում եմ, պատրաստ եմ նյութեր ներկայացնել հատուկ քննչական ծառայությանը եւ պատասխանատվություն եմ կրում իմ խոսքերի համար:

Ընդհատակից գործող Բաղրամյան 26-ը շարունակում է քանդել մեր տնտեսությունը: Խնդրում եմ հրապարակել իմ հայտարարությունը:

Սամվել Հարությունյան, Վանաձորի «Ստանկոմետ» ընկերության 90% բաժնետեր»,- ասված է բաց նամակի մեջ:

Կից ներկայացնում ենք նյութի հետ կցված փաստաթղթերի լուսանկարները: