«Մկրտչյանին պետք է վառել»․ ինչ է ասվել ոստիկանությունում՝ գեներալ Մանվելի փաստաբանին սպառնացողին

Մանվել Գրիգորյանի փաստաբան Արսեն Մկրտչյանի հասցեին սպառնալիքներ հնչեցրած անձը հայտնաբերվել է: Նա 33-ամյա Կարեն Սաթյանն է, որը հունիսի 23-ին ներկայացել է ոստիկանության Արաբկիրի բաժին ու բացատրություն տվել։

Araratnews.am-ը կապ հաստատեց Կարեն Սաթյանի հետ՝ մանրամասներ իմանալու: Նրա խոսքով՝ իրենից բացի՝ ոստիկանություն էին տարվել  եւս 7 հոգի: Նրանց Կարեն Սաթյանը չի ճանաչում: Միայն գիտի, որ քաղաքացիական շարժումների են ակտիվ մասնակցում:   7 հոգուց մեկն էլ «Ֆեյսբուքում» գրել էր՝ Արսեն Մկրտչյանին պետք է հրապարակում վառել:

Արաբկիրի ոստիկանության աշխատակիցները, Կարեն Սաթյանի տեղեկացմամբ, հորդորել են այլեւս նման սպառնալիքներ չհնչեցնել: «Ընդհանուր առմամբ  կարգին, լավ մարդիկ էին»,- ասաց Սաթյանը:

Կարեն Սաթյանի խոսքով՝ Արսեն Մկրտչյանը հունիսի 22-ին՝ ժամը 14:00-ին,  ագրեսիվ ու լարված  է եղել, երբ դիմել է ոստիկանություն ու հաղորդում ներկայացրել. «Ասում են, որ ոստիկանության աշխատակիցները դժվարությամբ են հանգստացրել փաստաբանին»:

Մանվել Գրիգորյանի փաստաբան Արսեն Մկրտչյանից էլ հետաքրքրվեցինք՝ հոգեբանորեն  դժվար չէ՞ նրա համար ստանձնել մի մարդու պաշտպանությունը, որի նկատմամբ նման մեղադրանքներ են առաջադրվել:  Նա ասաց՝ առաջին  դեպքը չէ. «Մենք մասնագետ ենք, պրոֆեսիոնալ, կատարում ենք մեր մասնագիտական պարտականությունները: Անսպասելի իրադարձությունների  էլ ենք պատրաստ»:

Մեր մյուս հարցին՝ կպահանջի՞ իրավապահներից խստորեն պատժել իրեն սպառնացողներին, Արսեն Մկրտչյանը բացասաբար պատասխանեց. «Ոչ մի բան էլ չեմ պահանջելու: Բավարարված եմ ոստիկանության իրավաչափ  գործողություններից եւ իմ բնավորությամբ էլ բողոքող անձնավորություն չեմ»:

Արսեն Մկրտչյանի պարզաբանմամբ՝ իր բողոքը ոստիկանությանը եղել է ազդակ, որ այդպիսի սպառնալիքներն անհետեւանք ու անպատժելի չեն: